[1] Kalbas tiyaboy sa kangay in osai ka pansokat kagwali sikkor. Siyabi keyen, Kao tomaydek, kaimo sokaten in balay lakoy Diyos, osai in pagpangandogan. Osai kaimo bilangen in mga asin agsamba.
[2] Kamay ayaw kaimo agsokaten in tongkodan, angkataw ina tiyaboy wa sa mga mangyan yewed agpaniwala sa Diyos. Batay kansiro piyanlaedan in Maal wano pag bayan apatnapo dowai ka bolan.
[3] Kamay kangay batay siyogo in kangay dowai ka agsabi in betek, aglambongan sako. Osai ka libo dowai ka daan animnapo (1,260) ka ibeng siro batay agpabarita in agiplaong Diyos.
[4] Ina pag dokalaki, siro in dowai ka poon olibo, osai in dowai ka tinglaw sa adap in Kapwan kobat.
[5] No apo batay agpakaskit sa kansiro na batay lomwas sa kansiro bibi in baya agtebed sa kansiro mga kaaway. Kataw ina batay biyono no nakay in batay agpakaskit sa kansiro.
[6] Ina din kabaloy agbengbeng in langit, matang ayaw omodan sa betek siro agpabarita in agiplaong Diyos. Siro apo din kabaloyan in sapa piyangwat daya. Osai baatte kansiro beet agpababa in kamayba nakay pag pandalan sa mga mangyan.
[7] Paka kalbas wa in dokalaki agpabarita in Agiplaong Diyos, in ayop lakoy batay monaik batang sa langa idapo potok, batay aglaban sa kansiro. Siro batay diyaeg in ayop lakoy, batay biyono.
[8] In kansiro bilog batay agibolalang sa karsada in bayan lakoy. No piyagpatolad ina pag bayan na maal piyagawit Sodoma, no yewed Iipto. Asin din piyako sa kodos in kansiro Kapwan.
[9] Tolo ka ibeng kalaati in kansiro bilog batay piyagpangkit mga mangyan, kamayba batang sa nakay pag kobat, tiribo, agiplaong, bayan. Siro batay agayaw piyaglebeng in kansiro mga bilog.
[10] In boo mangyan sa kobat batay agkaanggay panawen matay wa ina pag dokalaki, siro agpalkaanggay, batay agpaltaboyan kamayba nakay. Angkataw ina pag dokalaki agpabarita in batang sa Diyos, batang agpaidap wano sa mga mangyan.
[11] Paka kadalan in tolo ka ibeng kalaati, in Diyos agpoypoy sa dokalaki, agpaboway wakay, kalbas siro tomaydek. Alimowan wa gayed in mga mangyan kangitan.
[12] Kalbas siro karengey agiplaong lakoy batang sa langit keyen, Kamo monaik wa atai. Siro monaik sa osai ka libo anggan sa langit. Agpangkit daan in kansiro mga kaaway.
[13] Ina pag betek lomoni wa anggan, maregnas in baatte kasampo ka balay. Pito ka libo ka mangyan in matay sa loni. In mga mangyan agkaboway kay maloba agkalimo. Siro keyen, Lakonaw ngani in Diyos sa langit.
[14] Kadalan wa in dowai ka maidap. Idwa din dogay batay rateng in katolo.
[15] Paka piyagana in kapito ka angil in kansiyo bodyong, apo miplaong maksen batang sa langit keyen, In kantam Kapwan osai in kansiyo Kiristo in apo kabaloyan agpoon lakoy sa boo kobat. Anggan idapo kalobosan siyo in agpoon lakoy.
[16] Kalbas in dalwampot opat ka koyay in agitokkaw sa kansiro mga pagpanokkawan sa adap Diyos, siro patalegeb, agsamba sa kansiyo.
[17] Siro keyen, Diyos, kanyam Kapwan, apo kabaloyan sa boo, Diyos tangona, Diyos ngona wa daan. Kami agkaanggay angkataw sa kaimo lakonaw pag kabaloyan kao agpoon lakoy.
[18] In mga yewed agpaniwala sa Diyos agkagalit wano. Kamay rateng wa in kabetek kao agparosa sa mga daet pag mga matay, osai agtaboy bayad sa kaimo mga poropita, anggan sa kaimo mga iidang, sa boo agkalimo sa kaimo, kamayba lakonaw, kamayba kalakoyte. Kabetek wa kaimo bonowen in mga agbono sa mga mangyan sa kobat.
[19] Biyoswang in balay lakoy Diyos ista sa langit. In baol in pagbetangan in kansiyo pangako ngiitan sa galem in kansiyo balay. Kalbas toloy mangkilat, omaleng, domalegdeg, lomoni, omodan mga kagwali bato.