[1] Ako karengey osai ka agiplaong maksen sa balay lakoy Diyos agsogo sa pito ka angil keyen, Panaw wa kamo. Kanyo wa bobowen sa kobat in galem in pito ka tasa in galit Diyos.
[2] Panaw wa in tokawan pag angil, biyobo sa kobat in galem kansiyo tasa. In mga mangyan apo tanda in ayop lakoy, in mga agmaal sa kansiyo rarawan, toloy apo wa mga sogat maloba wano maskit.
[3] Biyobo sa dagat in kadowai ka angil in galem kansiyo tasa. In sapa mibaloy wa kagwali daya mangyan matay wa. In baatte agkaboway sa dagat mangatay wa.
[4] Biyobo in katolo ka angil in galem kansiyo tasa sa mga sapa, sa mga bokal. Toloy wa din daya.
[5] Ako karengey agsabi in angil in agalapet mga sapa keyen, Kao maal wano, in agkaboway tangona, anggan ngona. Kao ngani betek, in kao agparosa kataw ina.
[6] Angkataw kansiro biyono, biyobo in daya kaimo mga iidang, osai in mga poropita, Na siro piyainem daya. Ina in maal sa kansiro.
[7] Kadogay ako karengey agiplaong batang sa pagpangandogan keyen, Diyos Kapwan, apo Kabaloyan sa boo, totoo betek in kaimo parosa sa kansiro.
[8] Biyobo sa ibeng in kaopat ka angil in galem kansiyo tasa. In ibeng piyakan kabaloyan agtebed sa mga mangyan in maloba wano pag maibeng.
[9] Matebed ngani siro, kamay siro agsabi daan baribid agkairis sa Diyos in kabaloy agpababa kaloba ina pag mga kaidapan. Kamay yewed din siro agbenglay in kansiro mga daet, agmaal sa Diyos.
[10] Biyobo in kalima ka angil in galem kansiyo tasa sa pagtokkawan in ayop lakoy. Lomened in kansiyo sakopan. In mga mangyan agkayat ngoso panawen sa maskit.
[11] Siro agkairis sa Diyos panawen sa mga maidap, maskit in mga sogat, kamay yewed din siro agbenglay kansiro mga daet pag panawen.
[12] Biyobo in kaenem ka angil in galem kansiyo tasa sa sapa lakoy Yopratis. Toloy maikat in sapa, toloy wa apo dalan in mga poon lakoy batang sa paglowasan ibeng.
[13] Ako kangitan lomwas batang sa bibi daragon, osai sa ayop lakoy, kadayo din sa agpadaya pag poropita, tolo ka marames pag mamaw, kagwali palaka.
[14] Ina pag mga mamaw agpamangwat makasoyo. Kansiro piyagdalan in boo poon lakoy sa boo kobat matang piyagtipon batay aggira sa lakonaw pag Ibeng Diyos in apo Kabaloyan sa boo.
[15] Apo miplaong keyen, Agparengey kamo. Ako agrateng kataw in agpanakaw. Agkaanggay in palagi agipolaw, osai yewed agkowa in kansiyo lambong, matang siyo idbatay panaw idapo lambong, yewed arikoyan sa amat.
[16] In mga poon lakoy tiipon in mga mamaw sa osai ka kobat sa agiplaong Ibriyo piyagawit Armagidon.
[17] Biyobo sa kiwang in kapito ka angil in kansiyo galem tasa. Apo miplaong maksen batang sa pagpanokkawan lakoy sa balay lakoy Diyos keyen, Mibaloy wa.
[18] Mangkilat, omaleng, domalegdeg, lomoni lakoy anggan. Ina in maeyat pag loni, sogod tangona idapo batang kaeyat ina, ina maloba wano maeyat.
[19] Mangagetek wa in bayan lakoy, mibaloy wa tolo. Mangayopang in boo bayan sa boo kobat. Kadayo in bayan lakoy Babilonya piyarosa din in Diyos, piyainem din in kansiyo maloba wano pag galit kataw alak.
[20] In boo poro kobat sa dagat maidapo. Maidapo wa din in mga boksor.
[21] Omodan mga kagwali bato, in baatte osai in kabyaten agkabangen limampo ka kilo. Tiyamaan in mga mangyan. In mga mangyan agkairis sa Diyos, panawen asin pag kaidapan makapangirabot.