[1] དེ་ནས་ཨེས་ཡོབ་ཀྱིས་འདི་ལྟར་ལན་གསུངས་པ་སྟེ།
[2] དེ་བཞིན་ལགས་པ་ང་ཡིས་ཤེས་ན་ཡང་། ། མི་ནི་ཁོང་དྲུང་དྲང་པོར་ཅི་ལྟར་འགྱུར། །
[3] གལ་ཏེ་མི་རྣམས་ཁོང་དང་རྩོད་འདོད་ན། ། སྟོང་ཆའི་གཅིག་གི་ལན་ཡང་ཞུ་མི་ནུས། །
[4] ཁོང་ནི་ཤེས་རབ་ལྡན་ཞིང་མཐུ་སྟོབས་ཆེ། ། ཁོང་ལ་རྒོལ་ཡང་བདེ་བར་ལུས་པ་སུ། །
[5] ཁོང་གིས་རི་བོ་སྤོས་ཀྱང་དེ་ཡིས་མ་ཚོར་ཞིང་། ། ཁོང་གིས་ཐུགས་ཁྲོ་ནང་དུ་རི་བོ་སློག་པར་མཛད། །
[6] ཁོང་གིས་ས་གཞི་རང་གནས་ལས་གཡོས་ཤིང་། ། ས་གཞིའི་ཀ་བ་རྣམས་ནི་ཡོམ་ཡོམ་འདར། །
[7] ཉི་མར་བཀའ་གསུང་གནང་བས་དེ་མི་ཤར། ། སྐར་མ་རྣམས་ལ་ཕྱག་རྒྱ་འདེབས་པར་མཛད། །
[8] ཁོང་ཉིད་གཅིག་པུས་ནམ་མཁའ་མཐར་བརྐྱངས་ཤིང་། ། རྒྱ་མཚོའི་རྦ་རླབས་སྟེང་དུ་ཞབས་ཀྱིས་བཅགས། །
[9] སྨིན་བདུན་དྲང་སྲོང་སྨིན་དྲུག་གསུམ་པོ་དང་། ། ལྷོ་ཕྱོགས་སྐར་ཁྱིམ་རྣམས་ནི་ཁོང་གིས་མཛད། །
[10] ཁོང་གི་འཕྲིན་ལས་ཆེན་པོ་བསམ་མི་ཁྱབ། ། ངོ་མཚར་དོན་ནི་བགྲང་ལས་འདས་པ་མཛད། །
[11] ཁོང་ངའི་གམ་ནས་གཤེགས་ཀྱང་ངས་མི་མཐོང་། ། ཁོང་ངའི་མདུན་ནས་ཕེབས་ཀྱང་ངས་མི་ཚོར། །
[12] ཁོང་གིས་ཕྲོགས་ན་སུ་ཡིས་བཟློག་ནུས་སམ། ། ཁྱེད་ཀྱིས་ཅི་ཞིག་མཛད་པ་ཡིན་ནམ་ཞེས། ། སུ་ཡིས་ཁོང་ལ་བཀའ་འདྲི་ཞུ་ཕོད་དམ། །
[13] ཁོང་གིས་ཉིད་ཀྱི་ཐུགས་ཁྲོ་བཟོད་མི་བྱ། ། ཁོང་འོག་རློམ་སེམས་ཅན་གྱི་སྡོངས་གྲོགས་འཁུམ། །
[14] དེ་ལྟར་ཡིན་པས་བདག་གིས་བརྗོད་མ་ཕོད། ། ཁོང་གི་དྲུང་དུ་ཅི་ལྟར་རྩོད་ནུས་སམ། །
[15] བདག་ནི་དྲང་ཡང་ལན་ནི་བཟློག་མ་ནུས། ། རང་ལ་ཉེས་ཆད་གཅོད་མཁན་ཁོང་ལ་ཞུ། །
[16] ང་ཡིས་ཞུས་ན་ཁོང་གིས་བཀའ་ལན་གནང་ངེས་ཀྱང་། ། ཁོང་གིས་བདག་ལ་གསན་པར་ང་རང་ཡིད་མི་ཆེས། །
[17] ཁོང་གིས་རླུང་དམར་དང་བཅས་བདག་ལ་བར་ཆད་གཏོང་། ། རྒྱུ་མཚན་མེད་པར་ང་ཡི་རྨ་རྣམས་ཁྱབ་པར་མཛད། །
[18] ཁོང་གིས་བདག་ལ་དབུགས་ལེན་ལོང་མི་གནང་། ། དེའི་ཁར་བདག་ལ་དཀའ་སྡུག་མྱངས་པར་མཛད། །
[19] སྟོབས་ཤུགས་གླེང་ན་ཀྱེ་ཧོ་ཁོང་སྟོབས་ལྡན། ། དྲང་གཞག་གླེང་ན་སུ་ཡིས་བདག་འབོད་དམ། །
[20] བདག་ནི་དྲང་བདེན་ཡིན་ན་ཡང་། ། རང་གི་སྨྲ་སྒོས་ཉེས་ཅན་བརྩི། ། ང་རང་ཆ་ཚང་ཡིན་ཡང་དེས། ། སྐྱོན་ཅན་ཡིན་པར་བདེན་དཔང་བྱེད། །
[21] བདག་ནི་ཆ་ཚང་ཡིན་ཡང་རང་ཉིད་མི་བསམ་པས། ། ང་ནི་རང་གི་སྲོག་ལ་སུན་སྣང་རབ་ཏུ་སྐྱེས། །
[22] དེའི་ཕྱིར་བདག་གིས་འདི་ལྟར་བརྗོད། ། ཆ་ཚང་ཅན་དང་སྡིག་སྤྱོད་ཅན། ། ཡོད་ཚད་གཅིག་མཚུངས་ཡིན་པ་དང་། ། ཁོང་གིས་རྩ་མེད་གཏོང་བར་མཛད། །
[23] གནོད་འཚེས་གློ་བུར་འཆི་བ་ཁྱེར་འོངས་ན། ། ཉེས་མེད་དཀའ་སྡུག་འཕྲད་པར་ཁོང་བཞད་ངེས། །
[24] སྡིག་སྤྱོད་ལག་ཏུ་ས་གཞི་གཏད་གྱུར་ན། ། ཁོང་གིས་ཁྲིམས་དཔོན་དག་གི་གདོང་བཏུམ་སྟེ། ། དེ་ནི་ཁོང་ཉིད་མིན་ན་གཞན་སུ་ཡིན། །
[25] བདག་གི་ཚེ་ནི་བང་ཆེན་ལས་མྱུར་ཞིང་། ། དེ་རྣམས་ལམ་སེང་འདས་པས་སྐྱིད་མི་མཐོང་། །
[26] བདག་གི་ཚེ་ནི་པ་པི་རའི་གྲུ་དང་། ། ཁྱི་ར་རྒྱག་པའི་བྱ་རྒྱལ་ལྟར་དུ་ཤོར། །
[27] རང་སྡུག་བརྗེད་དེ་སྐྱོ་གདོང་བསྐྱུར་ནས་ནི། ། འཛུམ་མདངས་རྒྱས་པར་བྱ་ཞེས་ངས་སྨྲས་ན། །
[28] ཁྱེད་ཀྱིས་ང་རང་ནོངས་མེད་མི་མཛད་ངས་ཤེས་པས། ། ང་ནི་རང་གི་དཀའ་སྡུག་ཀུན་ཕྱིར་འཇིགས་སྣང་སྐྱེས། །
[29] བདག་ནི་སྡིག་པ་ཅན་དུ་བརྩི་མཛད་ན། ། དོན་མེད་དཀའ་བ་ཅི་ལ་སྤྱོད་དགོས་སམ། །
[30] གལ་ཏེ་བདག་གིས་ཁ་བས་ལུས་བཀྲུས་ཏེ། ། རང་གི་ལག་པར་བ་ཚྭ་བརྒྱབ་ན་ཡང་། །
[31] ཁྱེད་ཀྱིས་ས་དོང་ནང་དུ་བདག་གཡུག་ཅིང་། ། ང་ཡི་གོས་ཀྱང་བདག་ལ་ཞེན་ལོག་འོང་། །
[32] ཁོང་ནི་བདག་གིས་ལན་འདེབས་ནུས་པ་དང་། ། རང་ཅག་ལྷན་ཅིག་ཁྲིམས་ཆད་ཉན་ཆོག་པའི། ། ང་དང་འདྲ་བའི་མི་ནི་མ་ཡིན་ནོ། །
[33] ངེད་གཉིས་སྟེང་དུ་ལག་པ་འཇོག་ནུས་པའི། ། ཁྲིམས་ཐག་གཅོད་མཁན་བར་ན་སུ་ཡང་མེད། །
[34] ཁོང་གིས་ཉིད་ཀྱི་ཕྱག་འཁར་བདག་ལས་འཐེན་པར་ཤོག ། བརྗིད་ཉམས་ཀྱིས་ནི་འཇིགས་སྣང་བསྐུལ་བར་མ་གྱུར་ཅིག །
[35] དེ་ནས་བདག་གིས་འཇིགས་པ་མེད་པར་ཁོང་ལ་ཞུ། ། རྒྱུ་མཚན་བདག་ནི་དེ་འདྲ་མ་ཡིན་རྐྱེན་གྱིས་སོ། །