[1] དེ་ནས་ན་ཨ་མད་པ་ཚའོ་ཕར་གྱིས་ལན་བཏབ་ཅིང་སྨྲས་པ།
[2] ང་ཡི་སེམས་པ་ཤིན་ཏུ་འཚབ་པས་ན། ། ང་ཡི་བསམ་པས་ལན་ཞིག་འདེབས་སུ་འཇུག །
[3] བདག་ལ་བརྙས་པའི་བཀའ་བཀྱོན་ངས་ཐོས་པས། ། ང་ཡི་གོ་རྟོགས་ཀྱིས་ནི་ལན་འདེབས་འཇུག །
[4] ས་སྟེང་མི་བུ་བཀོད་ནས་ད་ལྟའི་བར། ། ཁྱེད་ཀྱིས་འདི་ནི་སྔར་ནས་མ་རྟོགས་སམ། །
[5] སྡིག་སྤྱོད་མི་ཡི་དཔལ་ནི་དུས་ཐུང་ཞིང་། ། ཆོས་མེད་མི་ཡི་དགའ་སྤྲོ་ཡུད་ཙམ་ཡིན། །
[6] དེ་ཡི་གཟི་དཔལ་ནམ་མཁའི་བར་དུ་ཕྱིན། ། མགོ་བོ་སྤྲིན་པའི་ནང་དུ་ཟུག་ན་ཡང་། །
[7] ཁོ་ནི་རྟུག་པ་བཞིན་དུ་མེད་པར་འགྱུར། ། གང་དུ་ཡོད་ཅེས་མཐོང་མཁན་རྣམས་ཀྱིས་འདྲི། །
[8] ཁོ་ནི་རྨི་ལམ་ལྟར་དུ་ཡལ་བས་རྙེད་མི་འགྱུར། ། མཚན་མོའི་མིག་འཕྲུལ་བཞིན་དུ་ཁོ་ནི་འདེད་པར་འགྱུར། །
[9] ཁོ་སྔར་མཐོང་བའི་མིག་གིས་ཁོ་མི་མཐོང་། ། རང་ཁྱིམ་ལ་ཡང་ཁོ་ནི་མཐོང་མི་འགྱུར། །
[10] དེ་ཡི་བུ་ཚོས་དབུལ་པོར་ངོ་སོ་བྱེད། ། དེ་ཡི་ལག་པས་རྒྱུ་ནོར་ཕྱི་རུ་སྤྲོད། །
[11] རུས་པར་ན་གཞོན་ལྟ་བུའི་ཤེད་ལྡན་ཡང་། ། ཁོ་དང་མཉམ་དུ་རྡུལ་ནང་ཉལ་བར་འགྱུར། །
[12] དེ་ཡི་ཁ་ལ་ཉེས་སྡིག་མངར་མོ་ཡིན། ། ལྕེ་ཡི་འོག་ཏུ་ཉེས་སྡིག་སྦ་བ་དང་། །
[13] དེ་ལ་ཆགས་ཤིང་འདོར་བར་མི་འདོད་དེ། ། རང་གི་ཁ་ནང་སྦས་ནས་འཇོག་མོད་ཀྱང་། །
[14] དེ་ཡི་ཁ་ཟས་ལྟོ་བར་རུལ་ནས་ནི། ། ཁོག་ནང་དུག་སྦྲུལ་དུག་ཆུ་བཞིན་དུ་འགྱུར། །
[15] དེ་ཡིས་ནོར་རྣམས་མིད་ཀྱང་སླར་སྐྱུགས་ངེས། ། དཀོན་མཆོག་གིས་ནི་ནང་ནས་འདོན་པར་མཛད། །
[16] དུག་སྦྲུལ་གྱི་ནི་དུག་ཆུ་ཁོས་གཞིབ་སྟེ། ། ལྟོ་འགྲོ་ལྕེ་ཡིས་ཁོའི་སྲོག་གཅོད་པར་འགྱུར། །
[17] འོ་མ་དང་ནི་སྦྲང་རྩིའི་ཆུ་ཀླུང་དང་། ། གྲོག་ཆུ་རྣམས་ནི་ཁོས་ནི་མཐོང་མི་འགྱུར། །
[18] དེ་ཡིས་འབད་ཀྱིས་ཐོབ་སྐལ་རྙེད་ཀྱང་མིད་མི་འགྱུར། ། རྒྱུ་ནོར་ལོངས་སྤྱོད་རྙེད་ཀྱང་དགའ་སྤྲོ་མི་རྙེད་དེ། །
[19] དེ་ཡིས་དབུལ་པོར་བརྙས་ཏེ་ཕྱིར་བསྐྲད་ཅིང་། ། རང་གི་མིན་པའི་ཁང་པ་བཙན་གྱིས་བླངས། །
[20] དེ་ཡི་ལྟོ་བས་བདེ་བ་མི་ཚོར་ཏེ། ། ཆགས་པ་ཅི་ཡང་ལུས་པར་མི་འགྱུར་རོ། །
[21] ལུས་པ་གཅིག་ཀྱང་མིད་ནས་མ་བཞག་པས། ། དེ་ཡི་ལོངས་སྤྱོད་ཡུན་རིང་གནས་མི་འགྱུར། །
[22] ཚིམ་པའི་དུས་ལ་ཁོ་རང་འུ་ཐུག་འགྱུར། ། ཉོན་མོངས་ཅན་གྱི་ལག་ཀུན་དེའི་ཐོག་དབབ། །
[23] རང་གི་ལྟོ་བ་འགྲངས་སུ་འཇུག་པའི་དུས། ། དཀོན་མཆོག་ཁོང་གི་ཐུགས་ཁྲོ་དེའི་སྟེང་དབབ། ། དེ་ཡིས་ཁ་ཟས་ལ་ནི་རོལ་བའི་དུས། ། ཐུགས་ཁྲོ་ཆར་བ་བཞིན་དུ་དེའི་ཐོག་དབབ། །
[24] ལྕགས་ཀྱི་མཚོན་ཆ་ལས་ཁོ་བྲོས་ན་ཡང་། ། ལི་ཡི་མདའ་གཞུས་ཁོ་ནི་དབུག་པར་འགྱུར། །
[25] མདའ་མོ་བཏོན་པར་རྒྱབ་ནས་ཐོན་པ་དང་། ། འོད་སྤྲོ་མདའ་མགོ་མཁལ་མའི་ནང་ནས་ཐོན། ། དངངས་སྐྲག་གིས་ནི་ཁོ་རང་འཇོམས་པར་འགྱུར། །
[26] དེ་ཡི་གཏེར་ནི་མུན་པའི་ནང་དུ་ལྟུང་། ། མི་ཡིས་མ་སྦར་མེས་དེ་བསྲེག་པར་འགྱུར། ། གུར་གྱི་ནང་གི་ལྷག་མ་རྣམས་བསྲེག་འོང་། །
[27] གནམ་གྱིས་དེ་ཡི་སྡིག་ཉེས་མངོན་པར་བྱ། ། ས་གཞི་ཡང་ནི་དེ་ཡི་དགྲ་རུ་ལངས། །
[28] དེ་ཡི་ཁྱིམ་གྱི་ཐོན་རྫས་མེད་པར་འགྱུར་བ་དང་། ། དཀོན་མཆོག་ཐུགས་ཁྲོའི་ཉིན་མོར་རྒྱུ་ནོར་ཟད་པར་འགྱུར། །
[29] འདི་ནི་སྡིག་སྤྱོད་ཅན་ལ་ཐོབ་པའི་སྐལ་བ་སྟེ། ། དཀོན་མཆོག་ཉིད་ཀྱིས་དེ་ལ་གནང་བའི་ནོར་སྐལ་ལོ། །