[1] དེའི་རྗེས་སུ་ཨེས་ཡོབ་ཀྱིས་ཁ་ནས་རང་གི་ཚེ་ལ་དམོད་མོ་བརྒྱབ་སྟེ།
[2] འདི་ལྟར་སྨྲས་པ།
[3] ང་རང་བཙས་པའི་ཉིན་མོ་དང་། ། བུ་ཞིག་ཆགས་འདུག་ཅེས་སྨྲས་པའི། ། མཚན་མོ་དེ་ནི་སྟོངས་བར་ཤོག །
[4] ཉིན་དེ་མུན་པར་གྱུར་ནས་ནི། ། དཀོན་མཆོག་གིས་དེར་མི་གཟིགས་ཤིང་། ། དེའི་སྟེང་འོད་ཀྱང་སྤྲོ་མ་འགྱུར། །
[5] མུན་པ་དང་ནི་སྨག་རུམ་གྱིས། ། ཉིན་མོ་དེ་ནི་བཟློག་གྱུར་ཅིག ། དེའི་སྟེང་སྤྲིན་ནག་འཁྲིགས་ནས་ནི། ། ཉིན་འཛིན་དེ་ལ་འཇིགས་བསྐུལ་ཤོག །
[6] མཚན་དེ་སྨག་རུམ་གྱིས་འཕྲོག་ཅིང་། ། ལོ་རྩིས་ནང་དེར་དགའ་སྤྲོ་མེད། ། ཟླ་རྩིས་ནང་དེ་མ་རྩིས་ཤིག །
[7] ལྟོས་དང་མཚན་མོ་དེ་ལ་མངལ་ནི་མི་ཆགས་ཤིང་། ། དེའི་ནང་དགའ་སྤྲོའི་སྐད་ཀྱང་འབྱུང་བར་མ་གྱུར་ཅིག །
[8] ཉིན་མོར་དམོད་མོ་འདེབས་པ་དང་། ། ཆུ་སྲིན་སློང་བར་ནུས་པ་རྣམས། ། མཚན་མོ་དེར་ཡང་དམོད་པར་ཤོག །
[9] མཚན་དེའི་ཞོགས་པའི་སྐར་མ་སྒྲིབ་པར་ཤོག ། དེ་ཡིས་འོད་ལ་རེ་ཡང་རྙེད་མི་འགྱུར། ། སྐྱ་མདའ་གཏོང་བ་ཡང་ནི་མི་མཐོང་ངོ་། །
[10] བདག་གི་མ་ཡི་མངལ་སྒོ་མ་བཅད་པར། ། ང་ཡི་མིག་ནས་སྡུག་བསྔལ་མ་སྦས་རྐྱེན། །
[11] ཅིའི་ཕྱིར་བདག་ནི་མངལ་ནང་མ་ཤིའམ། ། ཅིའི་ཕྱིར་མངལ་ནང་ང་རང་དབུགས་མ་ཆད། །
[12] ཅིའི་ཕྱིར་པུས་མོ་བཙུགས་ནས་བདག་བསུས་ཏེ། ། ང་ཡིས་འཇིབ་ཏུ་ཅིའི་ཕྱིར་འོ་མ་ཐོན། །
[13] དེ་མིན་ད་ལྟ་བདག་ནི་ལྷིང་འཇགས་ངང། ། ལྷོད་ལ་བབས་ནས་གཉིད་ཅིང་ངལ་གསོ་ཐོབ། །
[14] སྟོང་སར་རང་རང་གནས་ཕྱིར་བརྩིགས་པ་ཡི། ། རྒྱལ་པོ་བཀའ་བློན་རྣམས་དང་ལྷན་ཅིག་གམ། །
[15] ཡང་ན་ཁང་པར་དངུལ་གྱིས་བཀང་བ་ཡི། ། གསེར་བདག་རྒྱལ་སྲས་མཉམ་དུ་འདུག་ཐུབ་ལ། །
[16] ང་རང་ཅིའི་ཕྱིར་ལྐོག་གྱུར་ངང་གིས་ནི། ། མ་ཡི་མངལ་ལས་ལྷུང་བའི་ཕྲུ་གུ་དང་། ། འོད་སྣང་མ་མཐོང་ཕྲུ་གུ་ལྟར་མ་ཡིན། །
[17] གནས་དེར་མི་ངན་དག་ནི་ངལ་གསོས་པས། ། ཁྱོད་ལ་བར་ཆད་ཅི་ཡང་མེད་པ་སྟེ། ། གནས་དེར་ཉམ་ཐག་རྣམས་ལ་ངལ་གསོ་ཐོབ། །
[18] དེ་རུ་བཙོན་པའི་སེམས་ཀྱང་ལྷོད་ལ་བབས། ། དེ་ཚོས་དབང་སྒྱུར་མཁན་གྱི་སྒྲ་མི་ཐོས། །
[19] ཆེ་ཆུང་ཀུན་པོ་དེ་རུ་འདྲ་མཉམ་ཡིན། ། བྲན་པོ་བདག་པོའི་དབང་ལས་ཐར་བ་ཡིན། །
[20] སྡུག་བསྔལ་ཅན་ལ་འོད་ནི་ཅི་ལ་གནང་། ། སེམས་སྡུག་ཅན་ལ་སྲོག་ནི་ཅི་ལ་གནང་། །
[21] དེ་ཚོས་འཆི་བར་སྒུག་ཡང་དེ་མི་འོང་། ། སྦས་པའི་གཏེར་ལས་ལྷག་པར་འཆི་བ་འབྲུ། །
[22] དེ་ཚོས་དུར་ཁྲོད་རྙེད་གྱུར་དུས། ། རབ་ཏུ་དགའ་ཞིང་མགུ་བར་བྱེད། །
[23] མི་ཡི་ལམ་ནི་སྦས་ཤིང་དཀོན་མཆོག་གིས། ། ཕྱོགས་བཞིར་ཁོ་རང་སྡུག་ལ་སྦྱར་བས་ན། ། དེ་ལ་འོད་སྣང་སྦྱིན་པའི་རྒྱུ་མཚན་ཅི། །
[24] མ་ཟོས་གོང་དུ་བདག་གིས་ཤུགས་ནར་ཕྱུང་། ། ཆུ་བོ་བཞིན་དུ་བདག་གིས་འཁུན་སྒྲ་བསྒྲགས། །
[25] ང་རང་འཇིགས་པ་དེ་ནི་ངའི་ཐོག་བབས། ། ང་རང་སྐྲག་པ་དེ་ཡིས་ང་རང་བསུས། །
[26] བདག་ལ་ཞི་བདེ་དང་ནི་ལྷིང་འཇགས་མེད། ། ངལ་གསོ་མེད་པའི་སྟེང་དུ་དཀའ་སྡུག་གོ །