[1] གཙོ་བོ་ཡ་ཝཱེས་ཡང་ཨེས་ཡོབ་ལ་བཀའ་ལན་གནང་སྟེ་འདི་སྐད་གསུངས་པ།
[2] ཧམ་རྩོད་ཅན་གྱིས་ཀུན་དབང་ཁོང་དང་རྩོད་རུང་ངམ། ། དཀོན་མཆོག་ཁོང་ལ་རྩོད་པའི་མི་ཡིས་ལན་ཐོབས་ཤོག །
[3] དེ་ནས་ཨེས་ཡོབ་ཀྱིས་གཙོ་བོ་ཡ་ཝཱེ་ལ་ལན་ཞུས་ཏེ་འདི་ལྟར།
[4] གཟིགས་དང་བདག་ནི་དམན་པ་སྟེ། ། བདག་གིས་ཁྱེད་ལ་ལན་ཅི་ཞུ། ། བདག་གིས་སྨྲ་སྒོ་ལག་པས་འགེབ། །
[5] བདག་གིས་ཐེངས་གཅིག་སྨྲས་པ་ན། ། དེ་ནས་ཡང་བསྐྱར་ལན་མི་གདབ། ། བདག་གིས་ཐེངས་གཉིས་སྨྲས་པ་ན། ། རྗེས་སུ་ནམ་ཡང་གླེང་མི་བྱ། །
[6] དེ་ནས་གཙོ་བོ་ཡ་ཝཱེས་རླུང་འཚུབ་ནང་ཨེས་ཡོབ་ལ་བཀའ་ལན་གནང་བ་སྟེ།
[7] ཁྱོད་ཀྱིས་དཔའ་བོ་བཞིན་དུ་སྐ་རགས་སྡོམས། ། བདག་གིས་འདྲི་འོང་ཁྱོད་ཀྱིས་ང་ལ་ཤོད། །
[8] ཁྱོད་ཀྱིས་བདག་གི་བཀའ་བཅད་འདོར་རུང་ངམ། ། ཁྱོད་རང་དྲང་ཕྱིར་བདག་ལ་སྐྱོན་འདོགས་སམ། །
[9] ཁྱོད་ལ་དཀོན་མཆོག་དཔུང་ངར་ལྡན་ནམ་ཅི། ། ཁོང་འདྲར་ཁྱོད་ཀྱིས་འབྲུག་སྐད་ལྡིར་ནུས་སམ། །
[10] གཟི་བརྗིད་བཀྲག་མདངས་ཀྱིས་ནི་རང་ཉིད་སྤྲོས། ། བཀུར་སྟི་གཟི་བྱིན་གོས་ལྟར་གཡོག་པར་གྱིས། །
[11] རང་གི་ཁྲོ་གཏུམ་མ་འགོག་ཡོངས་སུ་བླུགས། ། ང་རྒྱལ་ཅན་ནི་དམན་སར་དབབ་པར་གྱིས། །
[12] ང་རྒྱལ་ཅན་ནི་ཁྱོད་ཀྱིས་འདུལ་བ་དང་། ། ངན་པ་རང་གི་གནས་སུ་རྡོག་པས་རྫིས། །
[13] ཁྱོད་ཀྱིས་དེ་རྣམས་ལྷན་ཅིག་རྡུལ་ནང་སྦོས། ། དེ་ཚོའི་གདོང་ནི་གསང་བའི་གནས་སུ་སྒྲིབས། །
[14] དེ་ནས་བདག་གིས་ཁྱོད་ཀྱི་གཡས་ལག་གིས། ། ཁྱོད་རང་སྐྱོབ་པར་ནུས་པ་ཁས་ལེན་འོང་། །
[15] བདག་གིས་ཆུ་རྟ་བཞིན་དུ་ཁྱོད་ཀྱང་བཀོད། ། ལྟོས་དང་དེ་ཡིས་གླང་ལྟར་རྩྭ་ཟ་སྟེ། །
[16] ལྟོས་དང་དེ་ཡི་སྟོབས་ནི་རྐེད་པར་ཡོད། ། གྲོད་པའི་ལྟེ་བར་དེ་ཡི་ཤ་ཤེད་རྒྱས། །
[17] དེ་ཡི་རྔ་མ་ཐང་ཤིང་བཞིན་དུ་དྲང་། ། དེ་ཡི་བརླ་རྩ་གཅིག་དང་གཅིག་སྦྲེལ་འདུག །
[18] རུས་པ་རྣམས་ཀྱང་ལི་ཡི་སྦུ་གུ་བཞིན། ། དེ་ཡི་ཡན་ལག་ལྕགས་ཀྱི་དབྱུག་པ་འདྲ། །
[19] དེ་ནི་དཀོན་མཆོག་ཁོང་གི་བཀོད་པ་ཡི། ། འཕྲིན་ལས་རྣམས་ཀྱི་ཐོག་མ་ཡིན་པ་དང་། ། དེ་ཉིད་འགོད་མཁན་ཁོང་ཉིད་གཅིག་པུ་ཡིས། ། རལ་གྲི་དེའི་སྟེང་འབབ་པར་མཛད་ནུས་སོ། །
[20] རི་རྒྱུ་རྣམས་ཀྱིས་དེའི་དོན་ཟས་རིགས་སྐྱེད། ། རི་དྭགས་སྣ་ཚོགས་གནས་དེར་རྩེད་འཇོར་རོལ། །
[21] དེ་ནི་པད་མའི་འདབ་མ་འོག་ཏུ་སྦས། ། འདམ་རྩྭའི་གསེབ་དང་ན་ཁུག་རྣམས་སུ་གནས། །
[22] པད་འདབ་གྲིབ་བསིལ་གྱིས་ནི་དེ་སྒྲིབ་ཅིང་། ། གྲོག་མོའི་ལྕང་ཤིང་དག་གིས་མཐའ་ནས་སྐོར། །
[23] གཙང་པོ་འཕེལ་ཡང་དེ་ནི་སེམས་མི་འཚབ། ། ཡོར་དན་གཙང་པོ་དེ་ཡི་ཁར་འཕེལ་ཡང་། ། དེ་ནི་འཚེར་སྣང་མེད་ཅིང་བདེ་བར་གནས། །
[24] སུ་ཡིས་དེ་ཡི་མིག་མདུན་དེ་འཛིན་ཐུབ། ། སུ་ཡིས་རྙི་རྒྱས་དེ་ཡི་སྣ་དབུག་ནུས། །