[1] དེ་ནས་ཨེས་ཡོབ་ཀྱིས་བཀའ་ལན་གནང་སྟེ་འདི་ལྟར་གསུངས་པ།
[2] ང་ཡི་སྡུག་བསྔལ་ཚད་ན་ཅི་མ་རུང་། ། གནོད་འཚེ་ལྷན་ཅིག་སྲང་ནང་བཅལ་ན་ལེགས། །
[3] ད་ལྟ་རྒྱ་མཚོའི་བྱེ་མ་ལས་ཀྱང་ལྕི། ། དེའི་ཕྱིར་གཏམ་རྩུབ་བདག་གིས་བརྗོད་པ་ཡིན། །
[4] ཀུན་དབང་ཁོང་གི་མདའ་ངའི་ལུས་སྟེང་ཕོག ། ང་ཡི་སེམས་ཀྱིས་དུག་དེ་ཡོངས་སུ་འཐུང་། ། དཀོན་མཆོག་ཉིད་ཀྱི་འཇིགས་པས་ང་གཡུལ་བཤམས། །
[5] གཟན་རྩྭ་ཡོད་དུས་རྐྱང་གིས་ཅི་ལ་འབོད། ། གཟན་ཆས་ཡོད་དུས་གླང་གིས་ཅིའི་ཕྱིར་འབོད། །
[6] བྲོ་མེད་ཚྭ་མེད་བཟའ་བཏུང་ཅི་ལྟར་སྤྱོད། ། སྒོ་ངའི་དཀར་སྤྲིར་བྲོ་བ་ཅི་ལྟར་ལྡན། །
[7] ལོངས་སུ་སྤྱོད་འདོད་མེད་པའི་བཟའ་བཏུང་དག ། ང་ཡི་ཡིད་སེམས་ཀྱིས་ནི་རེག་མི་འདོད། །
[8] བདག་གི་གསོལ་བ་བསྐང་ཞིང་དཀོན་མཆོག་གིས། ། བདག་གིས་འདུན་པ་གནང་ན་ཅི་མ་རུང་། །
[9] ང་རང་ཚར་གཅོད་བྱེད་དུ་ཐུགས་དགྱེས་ཤིང་། ། ཕྱག་ཟུང་བརྐྱངས་ནས་ངའི་སྲོག་གཅོད་པར་ཤོག །
[10] དམ་པ་གཅིག་པོའི་བཀའ་གསུང་མ་བཟློག་པས། ། དེ་ལས་ང་ལ་ད་དུང་སེམས་གསོ་ལྡན། ། སྡུག་བསྔལ་རྫོགས་མཐའ་བྲལ་ཡང་སྲོན་པར་འགྱུར། །
[11] རེ་སྒུག་བྱེད་པར་བདག་ལ་སྟོབས་ཅི་ཡོད། ། མཇུག་འབྲས་གང་ཕྱིར་བདག་གིས་བཟོད་སེམས་སྒོམ། །
[12] ང་ཡི་སྟོབས་ཤུགས་རྡོ་ལྟར་མ་ཡིན་ལ། ། བདག་གི་ལུས་ཀྱང་ལི་ལས་མ་གྲུབ་ཏེ། །
[13] བདག་གི་ནང་དུ་རོགས་རམ་མེད་པ་དང་། ། ཤེས་རབས་སེམས་ནས་དོར་བ་མ་ཡིན་ནམ། །
[14] ཡིད་སེམས་ཕམ་པར་མཛའ་བོས་སྙིང་རྗེ་དགོས། ། རྒྱུ་མཚན་དེ་ཡིས་ཀུན་དབང་ཁོང་ཉིད་ལ། ། གུས་ཤིང་འཇིགས་པའི་སེམས་པ་འདོར་ངེས་ཡིན། །
[15] གཙང་པོ་རྒྱུ་བའི་ཆུ་ལམ་ཇི་བཞིན་དུ། ། ང་ཡི་སྤུན་མཆེད་རྣམས་ལ་གཡོ་སྒྱུ་ལྡན། །
[16] འཁྱགས་རོམ་བཞུ་བས་ཆུ་རྒྱུན་མི་གཙང་ཞིང་། ། དེ་ཡི་ནང་དུ་ཁ་བ་སྦས་ནས་ཡོད། །
[17] དྲོད་འབེབས་དུས་སུ་དེ་དག་བཞུ་འགྲོ་ཞིང་། ། ཚ་བའི་དུས་སུ་དེ་དག་རང་སར་སྐམ། །
[18] ཚོང་པས་ཆུ་རྒྱུན་དེད་ནས་ལམ་གཟུར་ཅིང་། ། དབེན་སྟོང་གནས་སུ་དེ་རྣམས་ཚེ་ལས་འདས། །
[19] ཐེ་མཱའི་ཚོང་པས་ཆུ་བོར་རེ་ལྟོས་བཅངས། ། ཤེ་བཱའི་མགྲོན་པོས་ཆུ་རྒྱུན་བསྒུགས་ནས་ཡོད། །
[20] ཁོང་ཚོའི་རེ་བ་སྟོངས་པས་ངོ་གནོང་ཞིང་། ། དེ་རུ་ཕྱིན་ནས་དེ་ཚོ་ཡིད་སེམས་ཕམ། །
[21] ད་ལྟ་ཁྱོད་རྣམས་དེ་དང་དེ་བཞིན་ཡིན། ། འཇིགས་རུང་དོན་རྣམས་མཐོང་སྟེ་སྐྲག་སྣང་སྐྱེས། །
[22] བདག་ལ་སྦྱིན་ཞིག་ཡང་ན་ཁྱོད་ཅག་གི ། ནོར་ལས་ལེགས་སྐྱེས་ཐོངས་ཞེས་ཞུས་མྱོང་ངམ། །
[23] ཡང་ན་དགྲ་ཡི་ལག་ནས་བདག་སྐྱོབ་རོགས། ། གདུག་རྩུབ་ཅན་ལས་སྒྲོལ་བར་མཛོད་ཞུས་སམ། །
[24] ཁྱོད་ཀྱིས་བདག་ལ་སློབས་ཤིག་ངས་མི་སྨྲ། ། ང་རང་གང་ནས་འཕྱུགས་པ་ཤེས་སུ་གསོལ། །
[25] དྲང་བའི་ཚིག་ནི་ཅི་འདྲའི་སྟོབས་ལྡན་ཨང་། ། ཡིན་ཡང་ཁྱོད་ཚོས་ཅིའི་ཕྱིར་བཀའ་བཀྱོན་གནང་། །
[26] ཡིད་སེམས་ཕམ་པའི་གཏམ་གླེང་རླུང་དང་མཚུངས། ། ཁྱོད་ཚོས་ད་དུང་དགག་ལན་སྤྲོད་དམ་ཅི། །
[27] ཁྱོད་ཚོས་དྭ་ཕྲུག་ཆེད་དུ་རྒྱན་འཕེན་ཞིང་། ། རང་གི་མཆེད་གྲོགས་འཚོང་བའི་ཚོང་ཟོག་བྱེད། །
[28] ད་ལྟ་ཁྱོད་ཅག་གིས་ནི་ང་ལ་གཟིགས། ། ང་ཡིས་ཁྱོད་ཚོའི་མདུན་དུ་རྫུན་མི་སྨྲ། །
[29] ཁྱོད་རྣམས་བསམ་བློ་བསྒྱུར་བར་མཛོད། ། དྲང་བདེན་མིན་པ་ཀུན་ནས་སྤོངས། ། ཡང་ནས་ཡང་དུ་བསམ་བློ་བསྒྱུར། ། ང་ཡི་དོན་ལ་གནས་ལུགས་ཡོད། །
[30] ང་ཡི་ལྕེ་ཐོག་དྲང་བདེན་མེད་དམ་ཅི། ། ང་ཡི་སེམས་པས་གཡོ་ཅན་མི་ཤེས་སམ། །