[1] དེ་ནས་ཨེས་ཡོབ་ཀྱིས་ལན་བཏབ་ཅིང་གསུངས་པ།
[2] བདག་གིས་འདི་འདྲའི་གཏམ་ནི་མང་དུ་ཐོས། ། ཁྱོད་རྣམས་སེམས་གསོ་བྱེད་མཁན་ཐབས་རྡུག་ཡིན། །
[3] འཆོལ་གཏམ་ལ་ནི་རྫོགས་པའི་དུས་ཡོད་དམ། ། ཁྱོད་ལན་ཟློག་པའི་ཤེད་དེ་གང་ནས་བྱུང་། །
[4] ངས་ཀྱང་ཁྱོད་ཚོའི་གཏམ་བཞིན་གླེང་ནུས་ཏེ། ། ཁྱོད་ཚོ་ང་ཡི་གནས་སུ་ལྷུང་གྱུར་ན། ། ངས་ཀྱང་ཁྱོད་ལ་རྒོལ་བའི་གཏམ་གླེང་ནུས། ། ཁྱོད་ཚོའི་ཕྱོགས་སུ་མགོ་ཡང་དབྱུག་པར་ནུས། །
[5] ཡིན་ཡང་བདག་གིས་ཁྱོད་ཚོ་བརྟན་པོར་བྱེད། ། སྨྲ་སྒོས་ཁྱོད་རྣམས་སེམས་སྡུག་མེད་པར་བྱ། །
[6] ང་ཡིས་བརྗོད་ཀྱང་སྡུག་བསྔལ་མ་ཞུ་སྟེ། ། ངས་ངག་བསྡམས་ན་སྡུག་བསྔལ་འབྲལ་འགྱུར་རམ། །
[7] ད་ནི་དཀོན་མཆོག་ཁོང་གིས་ང་རང་ཆད་དུ་བཅུག ། ང་ཡི་གཡོག་འཁོར་ཐམས་ཅད་ང་དང་འབྲལ་བར་མཛད། །
[8] དེ་མིན་ཁྱེད་ཀྱིས་ང་རང་བཟུང་ནས་ནི། ། བདེན་དཔང་དང་བཅས་ང་ལ་རྒོལ་བ་དང་། ། བདག་གི་ལུས་ཟུངས་རིད་པོ་འདི་ཡིས་ཀྱང་། ། དངོས་སུ་ང་ཡི་ཉེས་པར་དཔང་པོ་བྱེད། །
[9] ཁོང་གི་ཐུགས་ཁྲོས་ང་རང་དབྲལ་བ་དང་། ། ཁོང་གི་ཐུགས་ཁྲོས་བདག་ལ་བཙན་སྐུལ་བྱེད། ། བདག་ཕྱོགས་ཁོང་གི་ཚེམས་ཀྱང་གཙིག་པར་མཛད། ། དགྲ་བོས་སྡང་བའི་མིག་གིས་བདག་ལ་ལྟ། །
[10] དེ་ཚོས་ང་ཡི་ཕྱོགས་སུ་ཁ་གདང་ཞིང་། ། བརྙས་བཅོས་གཏོང་ཆེད་ང་ལ་འགྲམ་ལྕག་གཞུས། ། དེ་རྣམས་ལྷན་ཅིག་འཛོམས་ཏེ་ང་ལ་རྒོལ། །
[11] ཆོས་མེད་ལག་པར་ཁོང་གིས་ང་རང་གཏད། ། སྡིག་སྤྱོད་ལག་ནང་ཁོང་གིས་བདག་ནི་བཅུག །
[12] བདེ་བར་སྡོད་དུས་ཁོང་གིས་ཆག་པར་མཛད། ། ང་ཡི་གཉའ་ནས་བཟུང་སྟེ་སར་བརྒྱབ་ཅིང་། ། ཁོང་གི་འབེན་དུ་བདག་ནི་སློང་བར་མཛད། །
[13] ཁོང་གི་མདའ་པས་བདག་གི་མཐའ་ནས་བསྐོར། ། སྙིང་རྗེ་མེད་པར་བདག་གི་གློ་སྙིང་ཕུག ། བདག་གི་མཁྲིས་ཁུ་ས་རུ་འཕོ་བར་མཛད། །
[14] ཁོང་གིས་ང་རང་ཡང་ནས་ཡང་དུ་གཏོར། ། དཔའ་བོ་ནང་བཞིན་བདག་གི་ཕྱོགས་སུ་འཁྱོངས། །
[15] ང་ཡིས་སྐྱི་མོ་སྟེང་དུ་གཙོ་མ་བཙེམས། ། རང་གི་རྭ་ཅོ་ཐལ་བའི་ནང་དུ་བཞག །
[16] བདག་ནི་ངུས་པས་ངོ་གདོང་དམར་པོར་གྱུར། ། ང་ཡི་མིག་ལྕིབས་སྟེང་དུ་འཆི་བ་ཡོད། །
[17] འོན་ཀྱང་ང་ཡི་ལག་པར་གདུག་རྩུབ་མེད། ། བདག་གི་སྨོན་ལམ་རྣམ་དག་ཡིན་པར་ངེས། །
[18] ཀྱེ་ཀྱེ་ས་གཞི་ངའི་ཁྲག་མ་སྦས་ཤིག ། ང་ཡི་འོ་དོད་འགོག་པར་མི་མཛད་རོགས། །
[19] ད་ལྟ་ནམ་མཁར་ང་ཡི་བདེན་དཔང་མཆིས། ། ང་ཡི་སྲུང་མཁན་མཐོན་པོའི་གནས་སུ་བཞུགས། །
[20] བདག་གི་གྲོགས་པོས་བདག་ལ་འཕྱས་ན་ཡང་། ། དཀོན་མཆོག་ཕྱོགས་སུ་ང་ཡིས་མིག་ཆུ་བཞུར། །
[21] མི་ཡིས་རང་གི་གྲོགས་པོ་བཞིན། ། དཀོན་མཆོག་ལའང་རྩོད་པར་ཤོག །
[22] རྒྱུ་མཚན་ལོ་འགའ་ཕྱིན་པའི་རྗེས། ། བདག་ནི་མི་ལྡོག་ལམ་དུ་འཇུག །