[1] ཨེས་ཡོབ་ཀྱིས་མུ་མཐུད་དུ་རང་གི་གཏམ་སྨྲས་ཏེ་ན་རེ།
[2] བདག་གིས་རང་ལས་བདེན་དྲང་ཕྲོགས་པ་ཡི། ། ངའི་སེམས་སྡུག་པར་མཛད་པའི་ཀུན་དབང་ཉིད། ། ཇི་སྲིད་བར་དུ་གནས་པའི་དཀོན་མཆོག་ཁོང་། ། དཔང་དུ་བཙུགས་ཏེ་འདི་ལྟར་སྨྲས་པ་སྟེ། །
[3] བདག་ནང་ཚེ་སྲོག་ལྡན་པ་དང་། ། དཀོན་མཆོག་ཁོང་གིས་གནང་པའི་དབུགས། ། སྣ་ཁུང་ནང་དུ་ཡོད་པའི་ཚེ། །
[4] བདག་གི་མཆུ་ཡིས་ཚིག་ངན་སྨྲ་མི་བྱ། ། བདག་གི་ལྕེ་ཡིས་རྫུན་གཏམ་གླེང་མི་བྱ། །
[5] བདག་གིས་ཁྱོད་ཚོ་དྲང་བདེན་དུ་མི་བརྩི། ། འཆི་ཡང་རང་གི་ལྷད་མེད་འདོར་མི་འགྱུར། །
[6] བདག་གིས་དྲང་བདེན་འཛིན་ཞིང་མི་སྤོང་སྟེ། ། གསོན་དུས་རང་གི་སེམས་གྱིས་སྐྱོན་མི་འཛུགས། །
[7] བདག་གི་དགྲ་ནི་མི་ངན་བཞིན་གྱུར་ཅིག ། བདག་ལ་རྒོལ་མཁན་ཆོས་མེད་བཞིན་གྱུར་ཅིག །
[8] དད་མེད་ཅན་ལ་རེ་བ་ཅི་ཡོད་དམ། ། དཀོན་མཆོག་ཉིད་ཀྱིས་ཁོ་རང་ཚར་གཅོད་ཅིང་། ། ད་དུང་དེ་ཡི་སྲོག་ཀྱང་ལེན་པར་ངེས། །
[9] དེ་ལ་སྡུག་བསྔལ་འབྱུང་བའི་དུས་སུའང་། ། དཀོན་མཆོག་ཉིད་ཀྱིས་གསན་པར་ག་ལ་འགྱུར། །
[10] དེ་ཡིས་ཀུན་དབང་དགའ་སྤྲོར་བརྩིས་ནས་ནི། ། ནམ་རྒྱུན་དཀོན་མཆོག་ཁོང་ལ་ཞུ་མི་འགྱུར། །
[11] དཀོན་མཆོག་ཕྱག་གིས་མཛད་པ་དེ། ། བདག་གིས་ཁྱོད་ཚོར་སྟོན་པར་བྱ། ། ཀུན་དབང་ཁོང་གི་མཛད་རྗེས་ཀྱང་། ། བདག་གིས་ཁྱོད་ཚོར་གསང་མི་འགྱུར། །
[12] ཁྱོད་ཚོས་འདི་ཀུན་མཐོང་མོད་ཀྱང་། ། ཅིའི་ཕྱིར་ཐམས་ཅད་ཁུངས་མེད་གྱུར། །
[13] འདི་ནི་དཀོན་མཆོག་ཁོང་ཉིད་ཀྱིས། ། མི་ངན་རྣམས་ལ་གནང་བའི་སྐལ། ། གདུག་གཙུབ་ཅན་ལ་ཀུན་དབང་ནས། ། ཐོབ་པའི་ནོར་སྐལ་འདི་ཡིན་ལགས། །
[14] དེ་ཚོའི་བུ་ཕྲུག་འཕེལ་ཡང་རལ་གྲིའི་དོན་དུ་ཡིན། ། དེ་ཡི་བུ་རྒྱུད་ཟས་ཀྱིས་འགྲང་བར་མི་འགྱུར་ཏོ། །
[15] དེ་ལས་ལུས་པ་འཆི་ནས་བསྐུང་བར་འགྱུར། ། དེ་ཡི་ཡུགས་མོ་རྣམས་ནི་ངུ་མི་འགྱུར། །
[16] དེ་ཡིས་བྱེ་མ་བཞིན་དུ་དངུལ་བསགས་ནས། ། འདམ་བག་ལྟར་དུ་གོས་རྣམས་སྤུངས་ན་ཡང་། །
[17] དེ་ཡིས་སྤུངས་པ་དྲང་བདེན་ཅན་གྱིས་གྱོན། ། ཉེས་མེད་རྣམས་ཀྱིས་དངུལ་དེ་བགོ་བར་བྱ། །
[18] དེ་ཡིས་ཁང་པ་བརྩིགས་པ་ནི། ། འབུ་ཡིས་ཁུང་བུ་རྐོ་བ་བཞིན། ། ཡང་ན་སོ་པས་གུར་ཕུབ་འདྲ། །
[19] དེ་ནི་ཉལ་དུས་ཕྱུག་ཀྱང་བདག་པོ་རྒྱག་རྒྱུ་མེད། ། དེ་ཡིས་མིག་ཟུང་འབྱེད་དུས་རྒྱུ་ནོར་མེད་པར་གྱུར། །
[20] འཇིགས་སྐྲག་ཆུ་ལོག་བཞིན་དུ་ཁོའི་རྗེས་འདེད། ། མཚན་མོའི་དྲག་རླུང་གིས་ནི་ཁོ་རང་འཁུར། །
[21] ཤར་རླུང་གིས་ནི་ཁོ་རང་འཁྱེར་ནས་འགྲོ། ། དེས་ཁོ་རང་གི་གནས་དང་འབྲལ་དུ་འཇུག །
[22] དཀོན་མཆོག་ཁོང་གིས་ཕངས་མེད་ཁོ་ལ་བརྒྱབ། ། ཁོང་གི་ཕྱག་ལས་ཐར་བར་རབ་ཏུ་དགའ། །
[23] དཀོན་མཆོག་ཉིད་ཀྱིས་ཁོ་ལ་ཕྱག་རྡེབ་ཅིང་། ། ད་དུང་ཐུགས་ཁྲོའི་ང་རོ་བསྒྲགས་ནས་ནི། ། དེ་ནི་རང་གི་གནས་ལས་བསྐྲད་འགྱུར་རོ། །