[1] شُل بیر واقتدا سولُس عیسانینگ شَگیرتلِرینه هِنیزِم اُلوم قُرقوسینی سالیاردی و باش کاهینینگ یانینا گیدیپ،
[2] اُندان دمشق‌دَکی کِنیسه‌لِر اوچین نامه یازیپ بِرمِگینی خاییش اِتدی. اُل یِرده عیسانینگ یُلونا دوشیَنلِری آیال-اِرکِک دییمَن، کیمی تاپسا، اِل-آیاغینی باغلاپ، اورشلیمه گِتیرمَگه اِجازا ایسلِدی.
[3] اُل دمشقه یِتیپ باریارقا، بیردِنکَه آسماندان بیر پارلاپ نور اُنونگ داش-تُوِرِگینی یاغتیلتدی.
[4] سولُس یِره ییقیلدی. شُندا اُل: «سولُس! سولُس! نَمه اوچین مانگا آزار بِریَرسینگ؟» دییِن سِسی اِشیتدی.
[5] اُل: «آقام، سِن کیم؟» دییّپ سُرادی. اُنگا: «مِن سِنینگ آزار بِریَن عیسانگ. ایندی تور-دا، شَهره گیت، نَمه اِتمِلیدیگینگ سانگا شُل یِرده آیدیلار» دییدی.
[7] سولُس بیلِن باریان آداملار دوران یِرلِرینده دُنگوپ قالدیلار. اُلار سِسی اِشیتسِلِر-ده، هیچ کیمی گُرمِیَردیلِر.
[8] یِریندِن توروپ، سولُس گُزونی آچاندا، هیچ زات گُروپ بیلمِدی. اُنونگ اِلیندِن توتوپ، دمشقه کُمِک اِدیپ گِتیردیلِر.
[9] اوچ گونلَپ اُنونگ گُزلِری گُرمِدی، شُل واقتینگ دُوامیندا اُل هیچ زات اییّپ-ایچمِدی.
[10] دمشق‌ده عیسانینگ حَنانیا آدلی بیر شَگیردی باردی. تانگری عیسی اُنگا رویادا گُرنوپ: «اِی حَنانیا!» دییدی. اُل هِم: «لِپبِیک، تانگریم!» دییّپ جُغاپ بِردی.
[11] تانگری اُنگا شِیله دییدی: «تور، ”دُغری“ آدلی کُچَه بار-دا، یهودانینگ اُیوندِن تارسوسلی سولُس دییِن آدامی سُرا. حَضیر اُل دُغا اِدیَر.
[12] سولُسا بیر رویا آیان بُلدی. رویادا اُل یانینا حَنانیا دییِن بیر آدامینگ گِلیپ، گُزلِرینینگ آچیلماغی اوچین، اوستونه اِل‍لِرینی قُیاندیغینی گُردی.»
[13] حَنانیا شِیله جُغاپ بِردی: «یا تانگریم! مِن کَن آداملاردان بو آدامینگ اورشلیمده سِنینگ سایلاپ-سِچِنلِرینگه اِدِن اِنچِمه یامانلیقلاری بارادا اِشیتدیم.
[14] سِنینگ آدینگی آغزان هِر بیر آدامی زیندان اِتمَگه اُنونگ بو یِرده-ده یُلباشچی کاهینلاردان ایختییار نامه‌سی بار.»
[15] اِمّا تانگری اُنگا: «بار، یُلا دوش! بو آدام مِنینگ سایلاپ سِچِنیمدیر. اُل باشغا میلِّتلِرینگ، پادیشاهلارینگ و اسرائیل خالقینینگ اُوونده مِنینگ آدیمی اِعلان اِدِر.
[16] مِنینگ آدیم اوغروندا نَهیلی عاذاپ چِکمِلیدیگینی مِن اُنگا گُرکِزِرین» دییدی.
[17] شِیلِلیکده، حَنانیا باریپ، شُل اُیه گیردی، اِل‍لِرینی سولُسینگ اوستونده قُیوپ: «سولُس دُغان! گُزلِرینگ یِنه آچیلیپ، مُقادِّس روحدان دُلماغینگ اوچین، مِنی بو یِره گِلیَرکَنگ، سانگا گُرنِن تانگری، یَعنی شُل عیسی، ایبِردی» دییدی.
[18] شُل واقتدا گُزلِریندِن بیر پولَک قاچان یالی، سولُسینگ گُزلِری آچیلدی. اُل یِریندِن توروپ، تَعمید آلدی.
[19] سُنگرا ناهارلانیپ، قایتادان قوواتلاندی. سولُس بیرنَچه گونلَپ دمشق‌ده شَگیرتلِرینگ یانیندا قالدی.
[20] شُل واقتدا کِنیسه‌لِره باریپ، «عیسی خودایینگ اُغلی» دییّپ واغیظ اِتمَگه باشلادی.
[21] مونی اِشیدِنلِرینگ باری گِنگ قالیپ: «بو آدام اورشلیمده عیسانینگ ایزینا دوشِنلِره آزار بِرِن آدام دَلمی؟ اُل بو یِره هِم اُلارینگ اِل-آیاغینی دانگیپ، یُلباشچی کاهینلارینگ یانینا اَکیتمَگه گِلمَنمیدی نَمه؟» دییّشیَردیلِر.
[22] سولُس بُلسا گون-گوندِن گویچلِنیَردی و اُل عیسانینگ مسیحدیگینی تاصدیق اِتمِک بیلِن، دمشق‌ده یاشایان یَهودیلِرینگ باشینی چاشیردی.
[23] بیرنَچه گوندِن سُنگ، یَهودیلِر اُنی اُلدورمِگینگ ماصلاحاتینی اِتدیلِر.
[24] اِمّا نییِتلِری سولُسا بِلّی بُلدی و اُنی اُلدورمِک اوچین گیجه-گوندیز شَهر دِروِزه‌لِرینی قاراوولّایاردیلار.
[25] سُنگرا شَگیرتلِر بُلسا گیجَه‌نینگ بیر واقتی اُنی سِبِدینگ ایچینه سالیپ، شَهرینگ دیواریندان سالّاپ دوشوردیلِر.
[26] سولُس اورشلیمه گِلیپ، شَگیرتلِره قُشولماغا گیریشدی، اِمّا شَگیرتلِرینگ هِمّه‌سی اُندان قُرقیاردی. سولُسینگ عیسانینگ شَگیردیدیگینه اینانمادیلار.
[27] اُنسُنگ بارنابا سولُسی آلیپ، رِسول‍لارینگ یانینا گِتیردی. اُل سولُسینگ یُلدا عیسانی گُرِندیگینی، عیسانینگ اُنونگ بیلِن کِپلِشِندیگینی، دمشق‌ده عیسانینگ آدی بیلِن هیچ بیر قُرقوسیز واغیظ اِدِندیگینی اُلارا گورّونگ بِردی.
[28] شِیلِلیکده، سولُس اُلارینگ یانیندا قالدی و اورشلیمینگ هِمّه یِرینده عیسانینگ آدی بیلِن باتیرلیق بیلِن واغیظ اِدیَردی.
[29] اُل یونانیچا کِپلِیَن یَهودیلِر بیلِن گورلِشیپ، اُلار بیلِن چِکِلِشیَردی. اُنسُنگ اُلار سولُسی اُلدورمِگینگ قاصدینا چیقدیلار.
[30] دُغانلار مونی بیلِنلِرینده، اُنی قیصریه گِتیریپ، تارسوسا، اُز دُغدوق مِکانینا طاراف یُلا سالدیلار.
[31] هِمّه یهودیه‌دَکی، جلیل‌دَکی و سامِره‌دَکی کِلیسالاردا پاراحاتلیق تاپیپ، ایماندارلار باردیقچا گویچلِنیَردی. اُلار خودایدان قُرقوپ، مُقادِّس روحونگ گُوونلیگی بیلِن هِر گون کَنِلیَردی.
[32] هِمّه یِرلِره آیلانیپ یُرِن پِطرُس لُداداقی ایماندارلاری هِم گُرمَگه گِلدی.
[33] اُل یِرده پِطرُس اینیاس آدلی بیر آداما ساتاشدی. اینیاس سِکیز ییل بَری دوشِکده فِلِج بُلوپ یاتیردی.
[34] پِطرُس اُنگا: «اینیاس، عیسی مسیح سانگا شِفا بِریَر. یِرینگدِن تور-دا، یُرغان-دوشِگینگی ییغنا!» دییدی. اُل هِم دِرِّو یِریندِن توردی.
[35] لُدادا و شاروندا یاشایانلارینگ هِمّه‌سی اُنی گُروپ، عیسی طارافینا گِلدیلِر.
[36] یافادا تابیتا آدلی بیر آیال شَگیرت باردی. آدینینگ مَعنیسی جِرِن. مونونگ اِدِن یاخشی ایشلِری، بِرِن صاداقالاری قاتی کَندی.
[37] شُل گونلِرده اُل مِریضلَپ، آرادان چیقدی. اُنونگ جِسِدینی یوووپ، یُقارقی مِرتِبه‌دَکی اُتاقدا قُیدولار.
[38] لُدا شَهری یافا شَهرینه قُلایدی. شَگیرتلِر پِطرُسینگ لُدادادیغینی اِشیدیپ، اُنونگ یانینا ایکی آدامی یُلّادیلار و: «گیجَه قُیمان، بیزینگ یانیمیزا گِل» دییّپ خاییش اِتدیلِر.
[39] پِطرُس توروپ، اُلار بیلِن گیتدی. اُل اُیه گِلِنده، اُنی یُقاری مِرتِبه‌دَکی اُتاقا چیقاردیلار. هِمّه دول آیال‍لار پِطرُسینگ یانینا ییغنانیپ، تابیتا دیریکَه اُزلِرینه تیکِن هِمّه دُنلاری و کُینِکلِرینی گُرکِزیپ آغلاشدیلار.
[40] پِطرُس هِمّه‌سینی داشاری چیقاردی و دیزا چُکوپ، خودایا دُغا اِتدی. سُنگرا اُل جِسِده طاراف اُورولیپ: «تابیتا، تور!» دییدی. آیال گُزلِرینی آچدی، پِطرُسی گُروپ، دیک اُتوردی.
[41] پِطرُس اِلینی اوزادیپ، اُنگا تورماغا کُمِک اِتدی. اُنسُنگ ایمانلی دول آیال‍لاری و بِیلِکی ایماندارلاری چاغیریپ، یانگقی آیالی اُلارا دیری تابشیردی.
[42] بو خابار تامام یافا یایراپ، کَن آدام عیسی ایمان گِتیردیلِر.
[43] پِطرُس بیرنَچه گونلَپ یافادا، شمعون آدلی بیر دِریچینینگ یانیندا قالدی.