[1] «اِی دُغانلار و آتالار! ایندی مِنینگ اُزوم حاقلی دیگِم اوچین و آیتجاق سُزومه قولاق آسینگ.»
[2] آداملار اُنونگ عِبرانیچا کِپلِیَندیگینی اِشیدیپ، سِسلِرینه سو سِپیلِن یالی بُلدولار. پولس سُزونی دُوام اِتدی:
[3] «مِن یَهودیدیرین. کیلیکیه‌نینگ تارسوس شَهرینده دُغدیم، اِمّا شو شَهرده اولالدیم. بو یِرده غامالائیلینگ شَگیردی بُلوپ، آتا-بابالاریمیزینگ شِریغاتینینگ گویچلی عاداتلارینا گُرَه تَعلیم آلدیم. بو گونکی سیزینگ بُلشونگیز یالی، مِنِم خودایا خاص قایراتلیدیم.
[4] عیسانینگ یُلونا دوشِنلِره اُلوم قُرقینی سالیپ آزارلاردیم، آیال-اِرکِک دییمَن، اِلینی-آیاغینی باغلاپ، هِمّه‌سینی زیندانا زینگیاردیم.
[5] آیدیانلاریمینگ حاقیقاتدیغینی باش کاهین بیلِن مِجلِسینگ هِمّه‌سی تاصدیقلاپ بیلِر. مِن حتّیٰ اُلاردان دمشق‌دَکی یَهودی دُغانلاریمیزی توتماغا اِجازا نامه‌سینی هِم آلدیم. اُلارینگ اِلینی-آیاغینی باغلاپ، اورشلیمه گِتیریپ، جِزالاندیرماق ماقصادی بیلِن دمشقه طاراف یُلا دوشدوم.
[6] «گونُرتا واقتی دمشقه قُلایلاپ باریارقام، بیردِنکَه آسماندان پارلایان نور داش-تُوِرِگیمه یاغتی سالدی.
[7] مِن یِره ییقیلدیم. شُل واقت: ”سولُس، سولُس، نَمه اوچین سِن مانگا آزار بِریَرسینگ؟“ دییِن سِسی اِشیتدیم.
[8] مِن: ”آقام، سِن کیم؟“ دییّپ سُرادیم. اُل مانگا: ”مِن سِنینگ آزار بِریَن ناصِره‌لی عیسانگ“ دییّپ جُغاپ بِردی.
[9] مِنینگ یانیمداقیلار نوری گُروپ قُرقدولار، اِمّا مِنینگ بیلِن کِپلِشِن سِسه دوشونمِدیلِر.
[10] مِن: ”یا آقام! مِن نَمه اِتمِلی؟“ دییّپ سُرادیم. عیسی هِم مانگا: ”یِرینگدِن تور-دا، دمشقه گیت. نَمه اِتمِلیدیگینگ سانگا شُل یِرده آیدیلار“ دییدی.
[11] یانگقی نورینگ یالقیمیندان یانگا گُزلِریم کُر بُلدی. شُنونگ اوچین یانیمداقی یُلداشلاریم دمشقه مِنینگ اِلیمدِن توتوپ اَکیتدیلِر.
[12] «اُل یِرده حَنانیا آدلی دیندار و هِم شِریغاتا باغلی بیر آدام یاشایاردی. دمشق‌دَکی هِمّه یَهودیلِرینگ آراسیندا اولی حُرماتی باردی.
[13] اُل مِنینگ یانیما گِلیپ: ”سولُس دُغان! قُی، گُزلِرینگ یِنه آچیلسین!“ دییدی. مِنینگ گُزلِریم شُل واقتدا آچیلیپ، اُنی گُردوم.
[14] حَنانیا مانگا: ”آتا-بابالاریمیزینگ خودایی سِنی سایلادی. اُل مونی اُنونگ ایسلِگینی بیلمِگینگ، دُغری بُلانی گُروپ، سُزونی اِشیتمِگینگ اوچین اِتدی.
[15] سِن گُروپ-اِشیدِنلِرینگی هِمّه اینسانلارا یایرادیپ، اُنونگ اوچین شاهاتلیق اِدِرسینگ.
[16] ایندی نَمه دوریارسینگ؟ تور، خودایینگ آدینی چاغیریپ، تَعمیدلِن و گونَه‌لِرینگدِن پَکلِن“ دییدی.
[17] «اورشلیمه دُلانیپ گِلیپ، عیباداتخانادا دُغا اِدیپ اُتیرقام، مانگا بیر رویا آیان بُلدی.
[18] مِن عیسانی گُردوم، اُل مانگا: ”تیز بُل، دِرِّو اورشلیمدِن گیت، سِبَبی اُلار سِنینگ مِن حاقدَکی شاهاتلیغینگی قابول اِتمِزلِر“ دییدی.
[19] مِن: ”اِی آقام، اُلار مِنینگ کِنیسه‌دِن-کِنیسه آیلانیپ، سانگا ایمان گِتیرِنلِری زیندان اِدیپ یِنجِنیمی قاوی بیلیَرلِر.
[20] سِنینگ شاهادینگ اِستیفان اُلدوریلِنده، مِن هِم شُل یِردِدیم. بو ایشی دُغری بیلدیم و اُنی اُلدورِنلِرینگ لِباسلارینی ساقلادیم“ دییدیم.
[21] اُل مانگا: ”بار، مِن سِنی داشداقی باشغا میلِّتلِرینگ یانینا ایبِریَرین“ دییدی.»
[22] خالق پولسی شو یِره چِنلی دینگلِدی، اِمّا بو سُزی اِشیدِنلِرینده، قاتی سِس بیلِن: «بو آدامی یِر یوزوندِن یُق اِدینگ! اُل یاشاماغا میناسیپ دَل» دییّپ قیغیردیلار.
[23] اُلار قیغیریشیپ، لِباسلارینی قاقیپ، چانگ-تُزانینی هُوا قالدیردیلار.
[24] شُندا سِردار پولسینگ قلعه اَکیدیلمِگینی تابشیردی. خالقینگ نَمه اوچین اُنونگ اوستونه قیغیریاندیغینی بیلمِک اوچین، اُنی شالّاقلاپ، سُراغا چِکیلمِگینی ایسلِدی.
[25] پولسی شالّاقلاماق اوچین باغلانلاریندا، پولس یانیندا دوران اَفسَردِن: «روم میلّیِتینینگ هیچ بیر عاییبی یُق هِم بُلسا، اُنی شالّاقلاماق سیزینگ قانونینگیزا لاییق گِلیَرمی؟» دییّپ سُرادی.
[26] اَفسَر مونی اِشیدیپ، سِردارنینگ یانینا باریپ: «نَمه اِتجِک بُلیانگ؟ بو آدام روم میلّیِتلی آخیری» دییّپ خابار بِردی.
[27] شُندا سِردار پولسینگ یانینا گِلیپ: «مانگا آیت، سِن روم میلّیِتلیمی؟» دییّپ سُرادی. اُل: «هاووا» دییّپ جُغاپ بِردی.
[28] سِردار: «مِنِم! یُنه مِن بو میلّیِتلیگی کَن پول تُلَپ آلدیم» دییدی. پولس: «مِن بُلسا روم میلّیِتلی بُلوپ دُغدیم» دییدی.
[29] اُنی سُراغا چِکجِک بُلوپ دورانلار شو واقتدا اُنونگ یانیندان چِکیلدیلِر. سِردار هِم پولسینگ روم میلّیِتلیدیگینی بیلِنده، اُنونگ اِلینی-آیاغینی باغلادانی اوچین قُرقدی.
[30] سِردار اِرتیسی گون یَهودیلِرینگ پولسی نَمِده عاییپلایاندیقلارینی داقیق بیلمِک ایسلِدی. شُنونگ اوچین پولسی آزاد اِدیپ، یُلباشچی کاهینلار بیلِن باش مِجلِسینگ ییغنانماغینی دِستور بِردی. اُنسُنگ پولسی اُلارینگ حوضورینا آلیپ گِلدی.