[1] بیز کِنارا ساغامان چیقانیمیزدان سُنگ، بو جِزیره‌نینگ آدینینگ مالتادیغینی بیلدیک.
[2] شُل یِرده یاشایان خالق بیزینگ بیلِن خاص میلاییملی بُلدی. حَوّا یاغینلی و سُووق بُلانسُنگ، اُلار اُد یاقیپ، هِمَّه‌میزی قاوی قارشی آلدیلار.
[3] پولس بیر اویشمِک اُدون چُپلَپ، اُدونگ اوستونه قُیاندا، بیر زَهِرلی ییلان اُدونگ حاوروندان قاچیپ، اُنونگ اِلینه یاپیشدی.
[4] شُل یِرده یاشایان خالق اُنونگ اِلیندِن ییلانینگ سالّانیپ دورشونی گُرِنده، بیری-بیرینه: «بو آدام قاتل بُلسا گِرِک، اُل دِریادان نِجات تاپسا-دا، تاقدیری اُنی یاشاماغا قُیمادی» دییّشدیلِر.
[5] اِمّا پولس اِلینی سیلکیپ، ییلانی اُدونگ ایچینه زینگدی، هیچ بیر زییان هِم گُرمِدی.
[6] آداملار اُنونگ چیشمِگینه یا-دا بیردِنکَه اُلوپ ییقیلماغینا قاراشدیلار. اِمّا کَن قاراشیپ، اُنگا هیچ زات بُلماندیغینی گُرِنلِرینده، فیکرلِرینی اویتگِدیپ: «اُل خودایلارینگ بیریدیر!» دییّشدیلِر.
[7] اُل یِرینگ قُلاییندا جِزیره‌نینگ پوبلیوس آدلی باشلیغینینگ مولکی باردی. پوبلیوس بیزی میهمان آلیپ، اوچ گونلَپ یورِکدِن خیدمات اِتدی.
[8] شُل واقت اُنونگ آتاسینی قیزّیرما و ایچاغیری توتوپ یاتیردی. پولس مِریضینگ یانینا گِلدی و دُغا اِتدی-ده، اُنونگ اوستونه اِلینی قُیوپ، شِفا بِردی.
[9] بو واقادان سُنگ، جِزیره‌دَکی بِیلِکی مِریضلِر-ده گِلیپ شِفا تاپدیلار.
[10] اُلار بیزه کَن سیلاغ-حُرمات اِتدیلِر. یُلا اوغراماقچی بُلانیمیزدا، بیزه ضِرورلی هِمّه زاتلاری گِتیریپ، کِشتیَه یوکلِدیلِر.
[11] اوچ آیدان سُنگ، بیز اِکیز خودایلار عالاماتلی کِشتی بیلِن دِریایا چیقدیق. بو کِشتی اسکندریه‌دِن گِلیپ، قیشدا شُل جِزیره‌ده قالیپدی.
[12] بیز سیراکوز شَهرینه باریپ، اُل یِرده اوچ گون قالدیق.
[13] اُل یِردِن آیلانیپ، ریگیونا گِلیپ یِتدیک. اِرتیسی گون ایلِری یِلی اُسوپ باشلادی. مونونگ کُمِگی بیلِن ایکی گونده پوتیولی شَهرینه یِتدیک.
[14] اُل یِرده بیرنَچه دُغانلاری تاپدیق. اُلار بیزدِن یانلاریندا قالماغیمیزی خاییش اِتدیلِر و بیز اُل یِرده بیر هِفته قالدیق. شُندان سُنگ بیز روما گِلدیک.
[15] رومداقی دُغانلار بیزینگ گِلِندیگیمیزی اِشیدیپ، بیزی قارشیلاماق اوچین اُل یِردِن آپیوس بازارینا و «اوچ کِروِنسارای» دییِن اُبا چِنلی گِلدیلِر. پولس اُلاری گُرِنده، خودایا شوکور اِدیپ، یِنه قوواتلاندی.
[16] بیز روما گِلِنیمیزدِن سُنگ، پولسه بیر سِربازینگ قاراوولچیلیغی بیلِن یِکِلیکده یاشاماغا اِجازا بِریلدی.
[17] اوچ گوندِن سُنگ پولس یَهودیلِرینگ باشلیقلارینی چاغیردی. اُلار بیر یِره اویشِنده، پولس اُلارا شِیله دییدی: «اِی دُغانلار! مِن خالقیمیزا یا-دا آتا-بابالاریمیزینگ عاداتلارینا قارشی هیچ زات اِتمِسِم-ده، اورشلیمده زیندان اِدیلیپ، رومیلارینگ اِلینه تابشیریلدیم.
[18] اُلار مِنی سُراغا چِکِنلِریندِن سُنگ، بُشاتجاق بُلدولار، سِبَبی مِنی اُلدورمَگه هیچ بیر دِلیل تاپمادیلار.
[19] اِمّا یَهودیلِر قارشی چیقانلاریندا، مِن داعوامی ایمپِراطُرا عارض اِتمَگه مِجبور بُلدوم. بِیتمِک بیلِن مِن اُز خالقیمی عاییپلاماقچی دَلدیرین.
[20] شو سِبَپدِن مِن سیزینگ بیلِن گُرشوپ، گورّونگ اِتمِک اوچین، سیزی بو یِره چاغیردیم. آصلیندا مِن اسرائیل‌ینگ اومیدی اوچین زینجیرلاندیم.»
[21] اُلار پولسه شِیله دییدیلِر: «بیز سِن حاقدا یهودیه‌دِن هیچ بیر نامه آلمادیق، اُل یِردِن گِلِن دُغانلاریمیزدان هِم هیچ کیم سِن بارادا یاخشیدان-یاماندان هیچ زات خابار بِرمِدی.
[22] اِمّا بیز سِنینگ فیکرلِرینگی اُزونگدِن اِشیدِسیمیز گِلیَر، سِبَبی هِمّه یِرده بو دینی تُپلانتییا قارشی چیقیلیاندیغینی بیلیَریس.»
[23] شِیلِلیکده، اُلار پولس بیلِن ساتاشماقلیق گونونی بِلِّدیلِر. شُل گون اُنونگ بُلیان یِرینه خاص کَن آدام گِلدی. پولس اِرتیردِن آغشاما چِنلی اُلارا خودایینگ پادیشاهلیغینی دوشوندیریپ، واغیظ اِتدی. موندان باشغا-دا اُلاری ایناندیریپ، موسانینگ تُوراتی بیلِن پیغامبارلار یازغیلاریندان عیسی باراسیندا ایناندیریجی دِلیل‍لِر گِتیردی.
[24] کَبیرلِری اُنونگ سُزلِرینه ایناندی، اِمّا باشغالاری اینانمادی.
[25] اُلار بیری-بیری بیلِن اُزآرا راضیلاشمادیلار. اُلار گیتمِکچی بُلوپ دورقالار، پولس شِیله دییدی: «اِشعیا پیغامبارینگ اوستو بیلِن مُقادِّس روح آتا-بابالارینگیزا شو سُزلِری قاوی آیدیپدیر:
[26] ”بار-دا، بو خالقا شِیله دیی: اِشیتمِسینه اِشیدیَرسینگیز، یُنه دوشونمِیَرسینگیز. گُرمِسینه گُریَرسینگیز، یُنه عاقیل یِتیریپ بیلمِیَرسینگیز.
[27] چونکی بو خالقینگ یورِگی قاتیدی، قولاقلاری آغرالدی، گُزلِری یومولدی. یُغسام گُزلِری بیلِن گُروپ، قولاقلاری بیلِن اِشیدِردیلِر، یورِکلِری بیلِن دوشونیپ، یِنه مانگا طاراف دُلاناردیلار، مِن هِم اُلارا شِفا بِرِردیم“.
[28] «شُنونگ اوچین ایندی شونی بیلیپ قُیونگ: خودایینگ نِجات بِرمِک باراداقی خوش خاباری یَهودی دَل‍لِره ایبِریلدی. اُلار قولاق آسارلار.» [
[29] پولس مونی آیداندان سُنگ، یَهودیلِر اُز آرالاریندا کَن جِدِلِّشیپ گیتدیلِر.]
[30] پولس اِجارا آلان اُیونده ایکی ییل تامام یاشادی و یانینا گِلِنلِرینگ هِمّه‌سینی قابول اِتدی.
[31] اُل باتیرلیق بیلِن و هیچ بیر قارشیلیقسیز خودایینگ پادیشاهلیغینی واغیظ اِدیپ، تانگریمیز عیسی مسیح بارادا تَعلیم بِریَردی.