[1] بیز اُلار بیلِن خوشلاشیپ، کِشتیده دُغری کوس جِزیره‌سینه، اِرتیسی گون رودِسه و اُل یِردِن هِم پاتارا گِلدیک.
[2] اُنسُنگ فینیقیه باریان بیر کِشتی تاپیپ میندیک و دِریایا چیقدیق.
[3] قِپرِسه قُلایلانیمیزدا، اُنونگ ایلِریسیندِن گِچیپ، سوریه طاراف گیتدیک. سُنگرا صورا باریپ یِتدیک، سِبَبی کِشتی شُل یِرده یوکونی دوشورمِلیدی.
[4] بیز شَگیرتلِری تاپیپ، اُل یِرده یِدی گون قالدیق. شَگیرتلِر مُقادِّس روحونگ ایلهامی بیلِن پولسه اورشلیمه گیتمِلی دَلدیگینی آیتدیلار.
[5] بیزینگ واقتیمیز دُلاندا، یِنه یُلا دوشوپ، گِزِلِنچیمیزی دُوام اِتدیردیک. ایماندارلارینگ هِمّه‌سی، آیال‍لاری و اُغلان-اوشاقلاری بیلِن بیله شَهرینگ داشینا چِنلی بیزی یُلا سالدیلار. اُنسُنگ کِناردا دیزا چُکوپ، دُغا اِتدیک.
[6] بیری-بیریمیز بیلِن خوشلاشانیمیزدان سُنگ، کِشتیَه میندیک، اُلار هِم اُیلِرینه قایتدیلار.
[7] بیز یُلومیزی صوردان دُوام اِتدیریپ، پتولامیس شَهرینه گِلدیک. اُل یِردَکی دُغانلارینگقا گُرمه-گُرشه باریپ، بیر گون اُلارینگ یانیندا قالدیق.
[8] اِرتیسی گون بیز یُلا دوشوپ، بیرنَچه گوندِن قیصریه گِلدیک و مُبَشِر فیلیپُسینگ اُیونده قالدیق، اُل سایلانان یِدیلِرینگ بیریدی.
[9] فیلیپُسینگ دورموشا چیقمادیق دُرت قیزی باردی و اُلار نبوّتلیق اِدیَردیلِر.
[10] بیز اُل یِرده اِنچِمه گون بُلانیمیزدان سُنگ، یهودیه‌دِن آگابوس آدلی نِبی گِلدی.
[11] اُل بیزینگ یانیمیزا گِلیپ، پولسینگ قوشاغینی آلدی-دا، اُز اِل-آیاغینی باغلاپ: «مُقادِّس روح شِیله دییَّر: ”اورشلیمدَکی یَهودیلِر شو قوشاغینگ اِیه‌سینی شِیله باغلاپ، باشغا میلِّتلِرینگ اِلینه بِرِرلِر“» دییدی.
[12] مونی اِشیدِنیمیزده، بیز-ده، اُل یِرده یاشایانلار-دا اورشلیمه گیتمِزلیگی اوچین پولسه یالباردیق.
[13] پولس: «نَمه اوچین آغلاشیپ، مِنینگ یورِگیمی آغیردیارسینگیز؟ مِن اورشلیمده دینگه اِل-آیاغیمینگ باغلانماغینا دَل، اُندا، تانگریمیز عیسانینگ آدی اوچین اُلمَگه-ده تاییار» دییّپ جُغاپ بِردی.
[14] اُنی راضیلاپ بیلمَنیمیزدِن سُنگ بیز: «قُی، خودایینگ ایسلِگی بُلسون!» دییّپ دیمدیق.
[15] شُل گونلِردِن سُنگ زاتلاریمیزی دوووپ، اورشلیمه یُلا دوشدوک.
[16] قیصریه‌دِن شَگیرتلِرینگ بیرنَچه‌سی هِم بیزینگ بیلِن بیله قایتدیلار. اُلار بیزی مِناسون دییِن آدامینگ اُیونه گِتیردیلِر، بیز اُنگا میهمان بُلمالیدیق. مِناسون قِپرِسلی بُلوپ، اَوَّلکی شَگیرتلِرینگ بیریدی.
[17] اورشلیمه گِلِنیمیزده، دُغانلار بیزی شاتلیق بیلِن قارشیلادیلار.
[18] اِرتیسی پولس بیزینگ بیلِن بیرلیکده یعقوبی گُرمَگه باردی، یاشولیلارینگ-دا هِمّه‌سی شُل یِردِدیلِر.
[19] پولس اُلار بیلِن سالاملاشاندان سُنگ، اُز خیدماتینینگ اوستو بیلِن خودایینگ باشغا میلِّتلِرینگ آراسیندا اِدِن ایشلِرینی یِکه-یِکِدِن گورّونگ بِردی.
[20] اُلار مونی اِشیدیپ، خودایی اُودیلِر. سُنگرا پولسه شِیله دییدیلِر: «گُریَنگمی، دُغان، یَهودیلِرینگ آراسیندا مونگلِرچه ایمانلی بار. اُلارینگ هِمّه‌سی-ده شِریغاتا قایراتلیدیرلار.
[21] اُلارینگ اِشیدیشینه گُرَه، سِن باشغا میلِّتلِرینگ آراسیندا یاشایان یَهودیلِرینگ هِمّه‌سینه موسانینگ شِریغاتیندان دُنمِکلیگی، اُغول‍لارینی سونِّتلِمِزلیگی و سونِّتلِره اینانمازلیغی اُورِدیَرمیشدینگ.
[22] ایندی نَمه اِتمِلی؟ سِنینگ گِلِنینگی اُلار حُکمان اِشیدِرلِر.
[23] شُنونگ اوچین بیزینگ آیتجاق زاتلاریمیزی یِرینه یِتیر. آرامیزدا خودایا قاسام ایچیپ، واعدا بِرِن دُرت آدام بار.
[24] شُل آداملاری یانینگا آل-دا، اُلار بیلِن بیله پَکلِنمه سونِّتینه قُشول و اُلارینگ خارجلارینی سِن بِر. اُندان سُنگ اُلار ساچلارینی سیردیرمالی. شِیلِلیکده، هِمّه‌لِر سِن حاقدا آیدیلان زاتلارینگ یالاندیغینی، سِنینگ-ده موسانینگ شِریغاتینا اینانیپ یاشایاندیغینگی بیلِرلِر.
[25] ایمان گِتیرِن باشغا میلِّتلِر حاقدا آیدانیمیزدا بُلسا، بیز بِلّی بیر قارارا گِلیپ، اُلارا بیراِییَم: ”بُتلارا هُدورلِنِن قربانلیق اِتینی اییمِکدِن، زینادان، داماغی چالینمادیق حایوانینگ اِتیندِن و قانیندان داش دورونگ“ دییّپ یازیلان نامه‌نی یُلّاپدیق.»
[26] اِرتیسی گون پولس یانگقی آداملاری یانینا آلیپ، اُلار بیلِن بیله پَکلِنمه سونِّتی یِرینه یِتیردی. اُنسُنگ اُل عیباداتخانا گیریپ، پَکلِنیش گونلِرینینگ هاچان قوتارجاقدیغینی و اُلارینگ هِر بیری اوچین هاچان صاداقا بِرجِکدیگینی اِعلان اِتدی.
[27] بِلِّنیلِن یِدی گون پَکلِنمه دُلوپ باریاردی. آسیا وِلایاتیندان گِلِن یَهودیلِر پولسی عیباداتخانادا گُردولِر. اُلار هِمّه خالقی کوشگوریپ، اُنی توتدولار.
[28] اُلار: «اِی اسرائیل خالقی! کُمِک اِدینگ! بو آدام هِمّه یِرده بیزینگ خالقیمیزا، موسانینگ بیزه بِرِن شِریغاتینا، عیباداتخانامیزا قارشی هِمّه‌لِره تِرس تَعلیم بِریَر. موندان باشغادا، یونانیلاری عیباداتخانا گِتیریپ، بو مُقادِّس یِری حارام اِتدی» دییّپ قیغیردیلار.
[29] بِیله دییمِکلِرینینگ سِبَبی، مونونگ اُنگ یانی اِفِسُسلی تروفیموسی شَهرده پولس بیلِن بیله گُروپدیلِر و پولس اُنی-دا عیباداتخانا گِتیرِندیر دییّپ گومَنلَپ فیکر اِدیَردیلِر.
[30] تامام شَهر آیاغا قالدی، هِمّه طارافدان یوریشیپ گِلِن خالق بیرلِشدی-ده، پولسی توتوپ، عیباداتخانادان داشاری سویرِدیلِر. شو واقتدا هِم عیباداتخانانینگ قاپیلاری یاپیلدی.
[31] پولسی اُلدورجِک بُلوپ دورقالار، روم قُشونینینگ سِردارینا تامام اورشلیمینگ آیاغا قالاندیغی باراداقی خابار گِلیپ قاووشدی.
[32] سِردار دِرِّو اَفسَرلِرینی و سِربازلارینی آلیپ، خالقینگ اوستونه ایندی. اُلار سِردار بیلِن سِربازلاری گُرِنلِرینده، پولسینگ یِنچمِگینی بِس اِتدیلِر.
[33] شُل واقت سِردار قُلای گِلیپ، پولسی زیندان اِتدی و قُشا زینجیرلار بیلِن باغلاماغی تابشیردی. سُنگرا اُل: «بو آدام کیم؟ اُل نَمه اِتدی؟» دییّپ سُرادی.
[34] جِماغاتینگ ایچینده قالماغال توردی، هِر کیم بیر زات دییّپ قیغیردی. قالماغالدان یانگا سِردار نَمه بُلانینی دوشونیپ بیلمِدی. شُنونگ اوچین اُل پولسی قلعا اَکیتمِگی تابشیردی.
[35] پولس باسّانچاغا قُلای گِلِنده، جِماغات اُنی قیسیپ-قاوروپ باریاردی. شُنونگ اوچین سِربازلار اُنی گُتِریپ اَکیتمِلی بُلدولار.
[36] جِماغات اُنونگ ایزینا دوشوپ: «اُلدورینگ اُنی!» دییّپ قیغیریشیاردی.
[37] سِربازلار پولسی هِنیز قلعه‌نینگ ایچینه آلیپ گِتیرمَکَلِر، اُل سِردارا: «سِندِن بیر زات سُراپ بیلِرینمی؟» دییدی. سِردار حایران قالیپ: «سِن یونانیچا بیلیَنگمی؟
[38] موندان بیرنَچه واقت اُنگ قالماغال تورزوپ، دُرت مونگ قاتل آدامی بیابانا آلیپ چیقان مصرلی سِن دَلمی؟» دییدی.
[39] پولس: «مِن یَهودی، کیلیکیه‌نینگ تارسوس شَهریندِن، شُل مَشهور شَهرینگ ایلاتینداندیرین. مانگا خالقا سُز آیتماغا ایختییار بِرمِگینگی خاییش اِدیَرین» دییدی.
[40] سِردار پولسه اِجازا بِرِنده، اُل باسّانچاغینگ اوستونده دوروپ، خالقا یوواش بُلماغی اِلی بیلِن ایشارات اِتدی. آداملار سِسّیز بُلانسُنگ، پولس اُلارا عِبرانی دیلینده یوزلِنیپ، شِیله آیتدی: