[1] حَنانیا دییِن آدام آیالی سَفیره بیلِن بیر بُلِک مولکونی ساتدی.
[2] اُل آیالی بیلِن دیلِّشیپ، مولکونگ پولوندان بیر پای اُزونه آلیپ قالدی. حَنانیا پولونگ قالانینی گِتیریپ، رِسول‍لارا بِردی.
[3] پِطرُس اُنگا شِیله دییدی: «حَنانیا، نَمه اوچین سِن شِیطانا قالبینگدان جای بِردینگ؟ سِن مُقادِّس روحا یالان آیدیپ، پولونگ بیر بُلِگینی اُزونگه آلیپ قالدینگ.
[4] اُل ساتیلاندا-ساتیلماندا هِم اُز مال-مولکینگدی آخیری. اُنی ساتانینگدان سُنگرا هِم پولونی اُز ایسلِیشینگ یالی پِیدالانیپ بیلِردینگ. نَدیپ بِیله زادی اِدیپ بیلدینگ؟ سِن اینسانلارا دَل-ده، خودایا یالان آیتدینگ.»
[5] حَنانیا بو سُزلِری اِشیدِن واقتیندا، یِره ییقیلیپ جان بِردی. بو واقانی اِشیدِنلِرینگ بارینی قاتی قُرقی داش-تُوِرِکلِرینی آلدی.
[6] اُنسُنگ ییگیتلِر گِلیپ، اُنی کِفِنه دُلادیلار-دا، اَکیدیپ جایلادیلار.
[7] اوچ ساغادا قُلای واقت گِچِندِن سُنگ، حَنانیانینگ آیالی گِلدی. اُنونگ بو بُلان واقادان خاباری یُقدی.
[8] پِطرُس اُندان: «مانگا آیت، آدامینگ و ایکینگیز یِرینگیزی شو باها ساتدینگیزمی؟» دییّپ سُرادی. آیال هِم: «هاووا، شو باها ساتدیق» دییّپ جُغاپ بِردی.
[9] پِطرُس اُنگا: «نَمه اوچین سیز خودایینگ روحونی ایمتِحانا سالماق اوچین دیلِّشدینگیز؟ اینه، گُر، سِنینگ آدامینگی جایلانلار قاپا قُلایلاپ گِلیَرلِر، اُلار سِنی هِم اَکیدِرلِر» دییدی.
[10] اِدیل شُل واقتدا اُل آیال پِطرُسینگ آیاغینا ییقیلیپ، جان بِردی. ییگیتلِر ایچِری گیرِنلِرینده، اُنونگ اُلِندیگینی گُردولِر. اُنی اَکیتدیلِر-ده، اَرینینگ یانیندا جایلادیلار.
[11] تامام کِلیسانی و بو حاقدا اِشیدِنلِرینگ بارینی اولی قُرقی تُوِرِکلِرینی آلدی.
[12] رِسول‍لار خالق آراسیندا اِنچِمه عالاماتلار و مُعجِزه‌لِر گُرکِزیَردیلِر. هِمّه ایماندارلار بیر بُلوپ عیباداتخاناداقی سلیمانینگ اِیوانیندا اویشِردیلِر.
[13] خالق اُلارا اولی حُرمات قُیسا-دا اِمّا هیچ کیم اُلارا قُشولماغا یورِک بِریپ بیلمِدی.
[14] مونگا باقمازدان خودایا ایمان گِتیرِنلِره قُشولان اِرکِک و آیال‍لارینگ سانی باردیغچا آرتیپ باریاردی.
[15] پِطرُس گِچیپ گیدِنده، هیچ بُلماندا، اُنونگ کُلِگه‌سی مِریضلِرینگ اوستونه دوشسون دییّپ، اُلاری کُچه‌لِره چیقاریپ، تاختلاردا و دوشِکلِرده یاتیریاردیلار.
[16] اورشلیمینگ تُوِرِگیندَکی اُبالاردان گِلِن جِماغات-دا مِریضلِری و آرخو-جینلاردان عاذاپ چِکیَنلِری گِتیریَردی و مِریضلِرینگ هِمّه‌سی شِفا تاپیاردی.
[17] شِیلِلیکده، باش کاهین و اُنونگ یانینداقی صادّوقی‌لارینگ هِمّه‌سی باخیلچیلیقدان یانگا آیاغا قالدیلار.
[18] اُلار رِسول‍لاری توتوپ، شَهرینگ زیندانینا سالدیلار.
[19] اِمّا گیجه خودایینگ بیر پِریشده‌سی زیندانینگ قاپیلارینی آچدی-دا، اُلاری داشاری چیقاریپ:
[20] «بارینگ، عیباداتخانا گیدیپ، خالقا بو تَزه یاشاییش باراداقی خاباری واغیظ اِدینگ» دییدی.
[21] رِسول‍لار مونی اِشیدِنلِرینده، گون دُغان واقتیندا عیباداتخانا گِلیپ، خالقا تَعلیم بِریپ باشلادیلار. بو آرالیقدا باش کاهین بیلِن اُنونگ یانینداقیلار گِلیپ، باش مِجلِسی و اسرائیل خالقینینگ هِمّه یاشولیلارینی بیر یِره چاغیردیلار. اُنسُنگ زینداندان رِسول‍لاری گِتیرمَگه آدام یُلّادیلار.
[22] اِمّا قولّوقچیلار اُلاری زینداندان تاپمادیلار. اُلار ایزینا گِلیپ:
[23] «زیندان قاییم قولپلی میشدیق، قاراوول‍لار هِم قاپیلارینگ آغزیندا دوران میشدیغلار، اِمّا قاپینی آچانیمیزدا، ایچِردِن هیچ کیمی تاپمادیق» دییّپ خابار بِردیلِر.
[24] عیباداتخانانی ساقلایانچیلارینینگ باشلیغی، یُلباشچی کاهینلار بو سُزلِری اِشیدِنلِرینده: «بو نَمه بُلدیغیقا؟» دییشیپ، باشاغایلیغا دوشدولِر.
[25] شُل واقت بیری گِلیپ، اُلارا: «اینه، زیندانا سالان آداملارینگیز عیباداتخانادا خالقا واغیظ اِدیپ دورلار» دییّپ خابار بِردی.
[26] شِیلِلیکده، باشلیق بیلِن قولّوقچیلار گیدیپ، اُلاری گویچ قولّانمازدان گِتیردیلِر، سِبَبی اُلار خالقینگ داشلاماغیندان قُرقیاردیلار.
[27] اُلاری گِتیریپ، باش مِجلِسینگ اُوونده قُیدیلار. باش کاهین اُلاری سُراق اِدیپ:
[28] «بیز سیزه شو آد بیلِن واغیظ اِتمَنگ دییّپ، قاتی تابشیریق بِرمَنمیدیک؟ سیز بُلسا اُز تَعلیماتینگیز بیلِن تامام اورشلیمی دُلدوردینگیز. بو آدامینگ قانینی هِم بیزینگ اوستومیزه یوکلِجِک بُلیارسینگیز» دییدی.
[29] پِطرُس بیلِن رِسول‍لار اُلارا شِیله جُغاپ بِردیلِر: «اینسانا دَل-ده، خودایا موطیع بُلماق خاص مُهِمدیر.
[30] آتا-بابالاریمیزینگ خودایی سیزینگ صلیبه چویلَن عیسانگیزی دیرِلتدی.
[31] خودای اسرائیل خالقینا توبا اِتدیریپ، گونَه‌لِرینی باغیشلاماق اوچین، بو آدامی باشلیق هِم نِجات بِریَنچی اِدیپ، اُنی بِیگِلتدی و اُز ساغیندا اُتورتدی.
[32] بیز بو زاتلارا شاهاتدیریس، مُقادِّس روح هِم شاهاتدیر. خودای مُقادِّس روحی اُزونه موطیع بُلانلارا بِردی.»
[33] مونی اِشیدِنلِر قاهار-غاضابا مینیپ، اُلاری اُلدورمِگینگ فیکرنه دوشدولِر.
[34] اِمّا غامالائیل آدلی بیر فَریسی یِریندِن توروپ، رِسول‍لاری آز واقت داشاری چیقارماغی بویوردی. اُل باش مِجلِسده هِمّه‌لِر طارافیندان سیلانیان دین عالیمیدی.
[35] سُنگرا غامالائیل شِیله دییدی: «اِی اسرائیل خالقی! بو آداملار باباتدا اِتجِک بُلیان ایشینگیزده خاباردار بُلونگ.
[36] یانگی-یاقیندا اُزونی بِییک آدام ساییان تِیوداس قالماغال توروزدی و دُرت یوز آدام اُنونگ ایزینا دوشدی. اِمّا اُل اُلدوریلِندِن سُنگ، اُنونگ ایزینا دوشِنلِرینگ هِمّه‌سی دارغاپ گیتدی.
[37] موندان سُنگ ایلات ساناماغی گونلِرینده جلیل‌لی یهودا اُرتا چیقدی و بیرنَچه آدامی اُز ایزینا دوشوردی. اِمّا اُل هِم اُلدوریلِندِن سُنگ، ایزینا دوشِنلِرینگ هِمّه‌سی دارغادی.
[38] ایندی بو آداملاردان اِل چِکینگ، اُلاری بُشادیپ گُیبِرینگ، سِبَبی بو ایش اینساندان بُلسا، اُندا اُز-اُزوندِن یُق بُلوپ گیدِر.
[39] اِمّا خودایدان بُلسا، اُندا سیز بو ایشینگ اُوونی توتوپ بیلمِرسینگیز. بیردِن خودایا قارشی اوروشیانلار بُلوپ چیقایمانگ.»
[40] شِیلِلیکده، اُلار غامالائیلینگ ماصلاحاتینی قابول اِتدیلِر. اُلار رِسول‍لاری چاغیریپ یِنچدیردیلِر و عیسانینگ آدی بیلِن کِپلِمِزلیگی تابشیریپ، اُلاری بُشاتدیلار.
[41] رِسول‍لار عیسانینگ آدی اوغروندا ماسغارا بُلماغا میناسیپ گُرلِندیکلِری اوچین مِجلِسدِن شات بُلوپ چیقیپ گیتدیلِر.
[42] اُلار هِر گون عیباداتخانادا و آداملارینگ اُیلِرینده خالقا تَعلیم بِردیلِر و عیسانینگ مسیحدیگی باراداقی خوش خاباری هِمیشه واغیظ اِتدیلِر.