[1] ኣቱም ውሉድ ግቡእ እዩ እሞ ንወለድኹም ብጐይታ ተኣዘዝዎም።
[2] -
[3] ምእንቲ ኽቐንዐካ ኣብ ምድሪ ኸዓ ነዊኅ ዕድመ ምእንቲ ኽህልወካ ዝብል ተስፋ ዝኃዘ ቐዳማይ ትእዛዝ ኣቦኻን እኖኻን ኣኽብር ዝብል እዩሞ።
[4] ኣቱም ወለዲውን ብናይ ጐይታ ሥነ ሥርዓትን ምኽርን ደኣ ኣዕብይዎም እምበር ንደቅኹም ኣይተቖጥዕዎም።
[5] ኣቱም ኣገልገልቲ ነቶም ብሥጋ ጐይቶትኩም ብፍርኃትን ብራዓድን ብቕኑዕ ልብን ከም ንክርስቶስ ጌርኩም ተኣዘዝዎም።
[6] ከም ኣገልገልቲ ክርስቶስ ንፍቓድ እግዚኣብሔር ብልቢ እናፈጸምኩም እምበር ንሰብ ክተሐጕሱ ኢልኩም ንይምሰል ኣይትግበርዎ።
[7] ንሰብ ዘይኮነስ ከም ንጐይታ እተገልግሉ ካብ ልቢ ኣገልግሉ።
[8] ኣገልጋሊ ኾነ እቲ ተገልጋሊ ነፍሲ ወከፍ ሠናይ ዝገበረ ካብ እግዚኣብሔር ዓስቡ ኸም ዝቕበል ፍለጡ።
[9] ንስኻትኩምውን ኣቱም ጐይቶት ልክዕ ከምኡ ግበሩሎም። ኣብ ሰማይ ዘሎ ናታቶምን ናታትኩምን ጐይታ ገጽ ሰብ ሪኡ ዘየዳሉ ምዃኑ ፈሊጥኩም ኣይተፈራርኅዎም።
[10] ብዝተረፈ ኣኅዋተይ! ብጐይታን ብጽንዓት ኃይሉን ጠንክሩ።
[11] ንተንኰል ሰይጣን ምክልኻል ምእንቲ ኽትክእሉ ኣጽዋር እግዚኣብሔር ብምሉኡ ልበሱ።
[12] ውግእና ምስሕሉቕን ሥልጣናትን ምስቶም ነዝ ዘመን ጸልማት ዘመኃድሩ ገዛእቲ ዓለምን ምስቶም ኣብ ሰማይ ዘለዉ ኽፉኣት መናፍስትን እዩ እምበር ምስ ሰባት ኣይኮነን።
[13] እምበኣር በታ ኽፍእቲ መዓልቲ ምክልኻል ምእንቲ ኽትክእሉ ኲሉ ሥዒርኩም ድማ ደው ክትብሉስ ምሉእ ኣፅዋር እግዚኣብሔር ልበሱ።
[14] ደጊም ሕቖኹም ብሓቂ ተዓጢቕኩም ድርዒ ጽድቂውን ተኸዲንኩም ቁሙ።
[15] ነቲ ሰላም ዝህብ ወንጌል ኣብ ኣእጋርኩም ከም ኣሣእን ብምእታው ተዳሊኹም ደው በሉ።
[16] ኣብ ርእሲ እዝ ዂሉ ኸዓ ነቲ ናይቲ ኽፉእ ሃልሃል ዝብል ፍላጻታት ኲሉ ኽተጥፍኡሉ እትኽእሉ ዋልታ እምነት ኣልዕሉ።
[17] ናይ ምድኃን ቆብዕ ሓፂን ድፍኡ፤ ናይ መንፈስ ቅዱስ ሰይፊውን ማለት ቃል እግዚኣብሔር ኃዙ።
[18] ብኹሉ ጸሎትን ብልመናን ኲልሻዕ ብመንፈስ ጸልዩ። ስለዙይ ከዓ ተስፋ እንተይቈረጽኩም ስለ ዂሎም ኣመንቲ ብጸሎት ትግሁ።
[19] ምእንታይውን ክዛረብ እንተለኹ ነቲ ምሥጢር ወንጌል ብትብዓት ምእንቲ ኽነግር ቃል ክወሃበኒ ጸልዩለይ።
[20] ምእንቲ ወንጌል እሱር ዝኾንኩ ልኡኽ እየ እሞ ከምቲ ዝግብአኒ ብትብዓት ምእንቲ ኽዛረብ ጸልዩለይ።
[21] ሕዚ ኸዓ ኸመይ ከም ዘለኹን እንታይ ከምዝገብርን ምእንቲ ኽትፈልጡ እቲ ፍቑር ኃወይን ብጐይታ ኸዓ እሙን ኣገልጋልን ዝኾነ ቲኪቆስ ኲሉ ኽነግረኩም እዩ።
[22] ናባኻትኩም ዝሰደድክዎውን ብዛዕባና ዂሉ ፈሊጥኩም ልብኹም ምእንቲ ኽጸናናዕ ኢለ እየ።
[23] ሰላምን ፍቕርን ምስ እምነት ካብ እግዚኣብሔር ኣቦናን ካብ ጐይታና ኢየሱስ ክርስቶስን ነቶም ኣኅዋትና ይኹን።
[24] ነቶም ንጐይታና ኢየሱስ ክርስቶስ ብዘየቋርጽ ፍቕሪ ዘፍቅሩዎ ዂሎም ጸጋ ይኹነሎም።