[1] وَ دِي هِي الْبَرَكَةْ النَّبِي اللّٰهْ مُوسَى بَارَكْ بَيْهَا بَنِي إِسْرَائِيلْ قَبُلْ مَوْتَهْ.
[2] هُو قَالْ: اللّٰهْ جَاءْ لَيْهُمْ مِنْ سِينَاء وَ مِثِلْ الْحَرَّايْ، طَلَعْ مِنْ سَعِيرْ وَ مِنْ جَبَلْ فَارَانْ، نَوَّرْ. وَ جَاءْ بِآلَافْ مِنْ الْمَلَائِكَةْ مَعَايَهْ وَ مِنْ إِيدَهْ الزَّيْنَةْ تَمْرُقْ نَارْ.
[3] أَكِيدْ هُو يِحِبّ الشَّعَبْ وَ كُلَّ صَالِحِينَهْ فِي إِيدَيْنَهْ. وَ هُمَّنْ قَاعِدِينْ تِحْتَهْ وَ يَسْمَعَوْا تَعْلِيمَهْ.
[4] وَ مُوسَى أَمَرَانَا بِالْوَصَايَا وَ هُمَّنْ وَرَثَةْ قَبِيلَةْ يَعْقُوبْ.
[5] وَ الرَّبّ بِقِي مَلِكْ فِي إِسْرَائِيلْ وَكِتْ لَمَّوْا كُبَارَاتْ الشَّعَبْ وَ قَبَايِلْ بَنِي إِسْرَائِيلْ.
[6] خَلِّي قَبِيلَةْ رَأُوبِينْ يَحْيَوْا مَا يُمُوتُوا وَ رُجَالْهَا يَبْقَوْا كَتِيرِينْ.
[7] وَ فِي قَبِيلَةْ يَهُوذَا، هُو قَالْ: يَا اللّٰهْ أَسْمَعْ حِسّ يَهُوذَا وَ قَبِّلَهْ لِشَعَبَهْ وَ قَوِّي دُرَاعَهْ وَ سَاعِدَهْ ضِدّ عُدْوَانَهْ.
[8] وَ فِي قَبِيلَةْ لَاوِي، هُو قَالْ: يَا اللّٰهْ، الْأُرِيمْ وَ التُّمِّيمْ الْبَيْهُمْ يَسْأَلَوْك أَنْطَوْهُمْ لِلنَّاسْ الْأَمِينِينْ مَعَاكْ الْإِنْتَ جَرَّبْتُهُمْ فِي مَسَّةْ وَ هَارَجْتُهُمْ فِي أَلْمِي مَرِيبَةْ.
[9] وَ هُمَّنْ قَالَوْا لِوَالْدَيْنهُمْ: «أَنِحْنَ مَا شِفْنَاكُو.» وَ قَالَوْا لِأَخْوَانْهُمْ: «أَنِحْنَ مَا نَعَرْفُوكُو.» وَ قَالَوْا لِعِيَالْهُمْ: «أَنِحْنَ مَا نَعَرْفُوا إِنْتُو يَاتُمَّنْ.» وَ هُمَّنْ حَفَضَوْا كَلَامَكْ، يَا اللّٰهْ، وَ أَحْتَرَمَوْا مُعَاهَدَتَكْ.
[10] وَ هُمَّنْ قَاعِدِينْ يِقَرُّوا شُرُوطَكْ لِعِيَالْ يَعْقُوبْ وَ وَصِيَّاتَكْ لِبَنِي إِسْرَائِيلْ. وَ فِي الْمُخْبَرْ، يِقَدُّمُوا لَيْك الْبَخُورْ وَ فِي الْمَدْبَحْ، يِقَدُّمُوا ضَحِيَّةْ كَامِلَةْ.
[11] يَا اللّٰهْ، بَارِكْ خِدْمِتْهُمْ وَ أَرْضَى بِعَمَلْهُمْ // الْيِسَوُّوهْ بِإِيدَيْهُمْ. أَكْسِرْ صَلَبَى النَّاسْ الْيُقُمُّوا ضِدُّهُمْ وَ كَنْ لِلْيَكْرَهَوْهُمْ، مَا تِخَلِّيهُمْ بَتَّانْ يُقُمُّوا.
[12] وَ فِي قَبِيلَةْ بَنْيَامِينْ، هُو قَالْ: اللّٰهْ يِحِبّ عِيَالْ بَنْيَامِينْ وَ يَسْكُنُوا بِأَمَانْ جَنْب الْيَحْمِيهُمْ دَايْماً وَ يَسْكُنُوا فِي جِبَالَهْ.
[13] وَ فِي ذُرِّيَّةْ يُوسُفْ، هُو قَالْ: اللّٰهْ يِبَارِكْ بَلَدْهُمْ وَ يَلْقَوْا الرَّحْمَةْ بِالْمَطَرَةْ التَّنْزِلْ مِنْ السَّمَاءْ وَ الْكَرَنْج وَ عُيُونْ أَلْمِي الْيَطْلَعَوْا مِنْ الْأَرْض.
[14] وَ يَرْحَمْهُمْ بِالنَّبَاتَاتْ التِّقَوِّمْهُمْ الْحَرَّايْ وَ عِيَالْهُمْ يَنْجَضَوْا فِي أَيِّ شَهَرْ.
[15] وَ يَرْحَمْهُمْ بِأَوَّلْ إِنْتَاجْ الْجِبَالْ الْقَدِيمِينْ وَ أَحْسَنْ إِنْتَاجْ الْحُجَارْ إِلَى الْأَبَدْ.
[16] وَ يَرْحَمْهُمْ بِأَحْسَنْ إِنْتَاجْ الْمَلَانْ فِي الْأَرْض. اللّٰهْ الْبَانْ فِي الشِّدَيْرَةْ الْقَمَّتْ فَوْقهَا نَارْ، خَلِّي نِعْمَتَهْ تَبْقَى مِثِلْ تَاجْ فِي رَاسْ يُوسُفْ وَ فِي جَبْهَةْ الْخَصَّصَوْه // وَ دَرَّجَوْه فِي أَخْوَانَهْ.
[17] هُو عِنْدَهْ شَرَفْ مِثِلْ تَوْر وَلْد الْبِكِرْ وَ قُرُونَهْ مِثِلْ قُرُونْ الْجَامُوسْ. بِضَرْبَةْ وَاحِدَةْ، هُو يَضْرُبْ بَيْهُمْ كُلَّ الشَّعَبْ لَحَدِّي آخِرْ الْأَرْض. وَ هُمَّنْ عَشَرَاتْ الْآلَافْ // مِنْ عِيَالْ أَفْرَايِمْ وَ آلَافْ مِنْ عِيَالْ مَنَسَّى.
[18] وَ فِي قَبِيلَةْ زَبُلُونْ، هُو قَالْ: يَا عِيَالْ زَبُلُونْ، أَفْرَحَوْا وَكِتْ تَمُرْقُوا. يَا عِيَالْ يَسَّاكَرْ، أَفْرَحَوْا وَكِتْ قَاعِدِينْ فِي خِيَمْكُو.
[19] هُمَّنْ يَعَزُمُوا الشَّعَبْ فِي الْجِبَالْ، فِي الْبَكَانْ الْيِقَدُّمُوا فَوْقَهْ // الضَّحَايَا الْمُوَافْقِينْ أَشَانْ هُمَّنْ يَلْقَوْا غُنَاهُمْ مِنْ خَزَايِنْ الرَّمْلَةْ // هَنَا خَشُمْ الْبَحَرْ.
[20] وَ فِي قَبِيلَةْ قَادْ، هُو قَالْ: مُبَارَكْ الْأَنْطَى قَبِيلَةْ قَادْ بَكَانْ وَسِيعْ. هُمَّنْ رَقَدَوْا مِثِلْ الدُّودْ الْيَقْطَعْ قَايْمَةْ أَوْ رَاسْ رِمِّتَهْ.
[21] وَ هُو خَطَّ عَيْنَهْ فِي الْأَرْض الْأَحْسَنْ وَ فِي بَكَانْ الْفَوْقَهْ قِسِمْ الْمَلِكْ. وَ هُو قَدَّمْ لِلشَّعَبْ وَ طَبَّقْ عَدَالَةْ اللّٰهْ وَ شُرُوطَهْ فِي بَنِي إِسْرَائِيلْ.
[22] وَ فِي قَبِيلَةْ دَانْ، هُو قَالْ: عِيَالْ دَانْ هُمَّنْ // مِثِلْ وِلَيْد الدُّودْ الْمَرَقْ مِنْ بَاشَانْ.
[23] وَ فِي قَبِيلَةْ نَفْتَالِي، هُو قَالْ: عِيَالْ نَفْتَالِي، هُمَّنْ شَبْعَانِينْ بِالنِّعْمَةْ وَ بَرَكَةْ اللّٰهْ وَ يِشِيلُوا الْغَرِبْ وَ الْجُنُوبْ.
[24] وَ فِي قَبِيلَةْ أَشِيرْ، هُو قَالْ: اللّٰهْ يِبَارِكْ أَشِيرْ مِنْ عِيَالْ يَعْقُوبْ وَ أَخْوَانَهْ يَرْضَوْا بَيَّهْ وَ يِدِسّ رِجْلَهْ فِي الدِّهِنْ.
[25] خَلِّي قَفَلَةْ مَدِينْتَهْ يَبْقَوْا هَنَا حَدِيدْ وَ نَحَاسْ وَ خَلِّي يَنْطِيهْ الْقُدْرَةْ فِي كُلَّ مُدَّةْ حَيَاتَهْ.
[26] وَ مَا فِي شَبِيهْ لِلرَّبّ، هُو الْيَجِي يَفْزَعْكُو يَا إِسْرَائِيلْ. هُو رَاكِبْ فِي السَّمَاوَاتْ وَ بِعَظَمَتَهْ، فِي السَّحَابْ.
[27] وَ الرَّبّ مِنْ زَمَانْ هُو الْمَلْجَأْ وَ قُدُرْتَهْ هِي السَّوَّتْ كُلَّ شَيّءْ فِي الْأَرْض. هُو طَرَدْ عُدْوَانَكْ قِدَّامَكْ وَ قَالْ: «دَمِّرْهُمْ!»
[28] بَنِي إِسْرَائِيلْ يَسْكُنُوا بِأَمَانْ وَ ذُرِّيَّةْ يَعْقُوبْ // يَقْعُدُوا وِحَيْدهُمْ فِي بَلَدْ الْقَمَحْ وَ الْخَمَرْ الْجَدِيدْ وَ السَّمَاءْ يِنَزِّلْ الْكَرَنْج.
[29] أَفْرَحَوْا، يَا بَنِي إِسْرَائِيلْ! يَاتُو الْمِثِلْكُو؟ إِنْتُو شَعَبْ النَّجَّاكُو اللّٰهْ. هُو الدَّرَقَةْ التَّحْمِيكُو وَ السَّيْف الْيِوَصِّفْ قُدْرِتْكُو. وَ عُدْوَانْكُو يِلْمَسْكَنَوْا وَ إِنْتُو تِفَجُّقُوا // بَكَانَاتْهُمْ الْعَالِيِينْ.