[1] لَاكِنْ أَنِحْنَ الْقَوِيِّينْ فِي الْإِيمَانْ وَاجِبْ نَحْمَلَوْا أَخْوَانَّا الْمَا قَوِيِّينْ فِي الْإِيمَانْ. وَاجِبْ مَا نِسَوُّوا الشَّيْء الْيَعَجِبْنَا أَنِحْنَ بَسْ.
[2] خَلِّي أَيِّ نَادُمْ مِنِّنَا يِسَوِّي الشَّيْء الْيَعَجِبْ أَخُوهْ لِفَايْدِتَهْ أَشَانْ يِقَوِّيهْ.
[3] أَشَانْ الْمَسِيحْ ذَاتَهْ مَا شَالْ الدَّرِبْ الْيَعَجِبْ نَفْسَهْ لَاكِنْ مَكْتُوبْ فِي الْكِتَابْ <الْمُعْيَارْ الْقَاعِدِينْ يِعَيُّرُوكْ بَيَّهْ، جَاءْ فَوْقِي أَنَا كُلَ>.
[4] كُلَّ شَيْء الْكَتَبَوْه فِي الزَّمَنْ الْفَاتْ أَنْكَتَبْ لِيِعَلِّمْنَا أَشَانْ بِالصَّبُرْ وَ الشَّجَاعَةْ الْعَلَّمْنَاهُمْ مِنْ الْكُتُبْ، نَمْشُوا قِدَّامْ عَشْمَانِينْ فَوْق رَبِّنَا.
[5] خَلِّي اللّٰهْ رَبّ الصَّبُرْ وَ الشَّجَاعَةْ يَنْطِيكُو فِكِرْ وَاحِدْ أَمْبَيْنَاتْكُو فِي دَرِبْ الْمَسِيحْ عِيسَى
[6] لَحَدِّي كُلُّكُو تِمَجُّدُوا اللّٰهْ أَبُو رَبِّنَا عِيسَى الْمَسِيحْ بِنِيَّةْ وَاحِدَةْ وَ بِحِسّ وَاحِدْ.
[7] أَقْبَلَوْا كُلَ مُؤْمِنْ بِالْمَسِيحْ مِثِلْ الْمَسِيحْ قِبْلَاكُو. وَ بِمِثِلْ دَا، تِمَجُّدُوا اللّٰهْ.
[8] نِأَوْرِيكُو كَدَرْ الْمَسِيحْ جَاءْ وَ بِقِي خَدَّامْ لِلْيَهُودْ أَشَانْ يِوَصِّفْ كَدَرْ اللّٰهْ صَادِقْ وَ أَشَانْ يِتِمّ الشَّيْء الْاللّٰهْ وَاعَدْ بَيَّهْ جُدُودْهُمْ.
[9] وَ جَاءْ أَشَانْ النَّاسْ الْمَا يَهُودْ كُلَ يَشْكُرُوا اللّٰهْ فِي شَانْ رَحْمَتَهْ. مَكْتُوبْ فِي الْكِتَابْ <أَشَانْ دَا، نَشْكُرَكْ فِي أُسْط الْأُمَمْ وَ نِمَجِّدْ أُسْمَكْ بِتَسْبِيحْ>.
[10] وَ كُلَ بُقُولْ <يَا الْأُمَمْ، أَفْرَحَوْا مَعَ شَعَبْ اللّٰهْ>.
[11] وَ كُلَ بُقُولْ <يَا جَمِيعْ الْأُمَمْ، أَشْكُرُوا اللّٰهْ. خَلِّي كُلَّ نَاسْ الْأَرْض يَشْكُرُوهْ>.
[12] وَ النَّبِي إِشَعْيَاءْ بُقُولْ <مِنْ ذُرِّيَّةْ يَسَّى نَادُمْ وَاحِدْ يَجِي وَ يَبْقَى مَلِكْ فَوْق كُلَّ الْأُمَمْ. وَ الشُّعُوبْ يُخُطُّوا عَشَمْهُمْ فَوْقَهْ>.
[13] وَ اللّٰهْ الْخَطَّيْتُوا عَشَمْكُو فَوْقَهْ يَنْطِيكُو بِزِيَادَةْ الْفَرْحَةْ وَ السَّلَامَةْ فِي الْإِيمَانْ لَحَدِّي عَشَمْكُو فَوْقَهْ يِزِيدْ بِزِيَادَةْ بِقُدْرَةْ الرُّوحْ الْقُدُّوسْ.
[14] يَا أَخْوَانِي، أَنَا فِي نَفْسِي مُأَكِّدْ كَدَرْ إِنْتُو مَلَانِينْ بِالْخَيْر وَ بِالْعِلِمْ وَ قَادْرِينْ تِشَّاجَعَوْا أَمْبَيْنَاتْكُو.
[15] لَاكِنْ فِي أَشْيَاءْ وَاحِدِينْ كَتَبْت لَيْكُو بِكَلَامْ قَوِي شِيَّةْ أَشَانْ دَوَّرْت نِذَكِّرْكُو بَيَّهْ. وَ قِدِرْت كَتَبْت مِثِلْ دَا بِسَبَبْ النِّعْمَةْ الْاللّٰهْ أَنْطَاهَا لَيِّ
[16] لِنَبْقَى خَدَّامْ لِلْمَسِيحْ عِيسَى. وَ خِدِمْتِي هِي بَلِّغِينْ بِشَارَةْ اللّٰهْ لِلْأُمَمْ. رَاجِلْ الدِّيْن بِقَدِّمْ لِلّٰهْ الضَّحِيَّةْ الْاللّٰهْ رَضْيَانْ بَيْهَا وَ أَنَا كُلَ فِي خِدِمْتِي نِقَدِّمْ لِلّٰهْ النَّاسْ الْبِقَوْا خَاصِّينْ لِلّٰهْ بِالرُّوحْ الْقُدُّوسْ.
[17] وَ أَشَانْ دَا، نِلْفَشَّرْ بِكُلَّ الْخِدْمَةْ السَّوَّيْتهَا لِلّٰهْ فِي الْمَسِيحْ عِيسَى.
[18] وَ أَبَداً مَا نِدَوْر نِحَجِّي بِأَيِّ خِدْمَةْ إِلَّا الْخِدْمَةْ الْعِيسَى الْمَسِيحْ سَّوَّاهَا بَيِّ أَشَانْ الْأُمَمْ يِتَابُعُوا كَلَامْ اللّٰهْ. هُو خَدَمْ بِكَلَامْ وَ بِفِعِلْ
[19] وَ بِقُدْرَةْ الْعَجَايِبْ فِي أُسْط النَّاسْ وَ بِقُدْرَةْ الرُّوحْ الْقُدُّوسْ. وَ مِثِلْ دَا، أَنَا بَلَّغْت بِشَارَةْ الْمَسِيحْ لِلنَّاسْ فِي كُلَّ بَكَانْ مِنْ مَدِينَةْ الْقُدُسْ لَحَدِّي بَلَدْ اللِّرِكُونْ.
[20] وَ عِنْدِي نِيَّةْ أَشَانْ نِبَلِّغْ الْبِشَارَةْ فِي أَيِّ بَكَانْ الْأُسُمْ هَنَا الْمَسِيحْ لِسَّاعْ مَا وِصِلْ فَوْقَهْ. مَا نِدَوْر نِبَشِّرْ فِي أَيِّ بَكَانْ النَّادُمْ آخَرْ بَشَّرْ فَوْقَهْ.
[21] نِدَوْر نِتَابِعْ الْكَلَامْ الْمَكْتُوبْ الْبُقُولْ <النَّاسْ الْمَا أَوْرَوْهُمْ بَيَّهْ يِشِيفُوهْ. وَ الْمَا سِمْعَوْا خَبَرَهْ يَفْهَمَوْه>.
[22] وَ عِدَّةْ مَرَّاتْ، حَاوَلْت نَجِيكُو وَ مَا قِدِرْت أَشَانْ خِدِمْتِي دِي دَحَرَتْنِي.
[23] لَاكِنْ هَسَّعْ مَا فَضَّلْ لَيِّ بَكَانْ نِبَشِّرْ فَوْقَهْ فِي الْبُلْدَانْ دَوْل. وَ مِنْ سِنِينْ كَتِيرِينْ نِدَوْر نَجِيكُو.
[24] وَ خَلَاصْ، نَقْدَرْ نَخْشَاكُو وَكِتْ نَمْشِي إِسْبَانِيَةْ. إِنْ شَاءْ اللّٰهْ، نَجِيكُو وَ نَقْعُدْ مَعَاكُو أَيَّامْ وَ دَا يَبْقَى لَيِّ حَلُو. وَ بَعَدْ دَا، تِسَاعُدُونِي أَشَانْ نِسَافِرْ قِدَّامْ.
[25] لَاكِنْ هَسَّعْ دَا، أَنَا مَاشِي مَدِينَةْ الْقُدُسْ أَشَانْ نَخْدِمْ لِلصَّالِحِينْ.
[26] أَخْوَانَّا الْفِي مَقِدُونِيَةْ وَ الْيُونَانْ شَالَوْا نِيَّةْ أَمْبَيْنَاتْهُمْ أَشَانْ يِرَسُّلُوا مُسَاعَدَةْ لِلْمَسَاكِينْ الْبَيْن الصَّالِحِينْ فِي مَدِينَةْ الْقُدُسْ.
[27] وَ شَالَوْا النِّيَّةْ دِي بِفَرَحْ. وَ دَا وَاجِبْ لَيْهُمْ كُلَ أَشَانْ أَوَّلْ الْيَهُودْ قَسَّمَوْا بَرَكَاتْهُمْ اللِّقَوْهُمْ مِنْ اللّٰهْ مَعَ الْمَا يَهُودْ. وَ هَسَّعْ الْمَا يَهُودْ وَاجِبْ لَيْهُمْ يِسَاعُدُوا الْيَهُودْ مِنْ الْبَرَكَاتْ اللِّقَوْهُمْ فِي الدُّنْيَا.
[28] وَ وَكِتْ الْخِدْمَةْ دِي تِكَمِّلْ وَ أَنَا أَنْطَيتْهُمْ كُلَّ شَيْء اللَّمَّوْه لَيْهُمْ، نِشِيلْ دَرِبْ هَنَا إِسْبَانِيَةْ وَ نَخْشَاكُو فِي رَوْمَا.
[29] وَ نَعَرِفْ كَدَرْ وَكِتْ نَلْحَقْ بَكَانْكُو دَا، نَجِيكُو مَلَانْ بِبَرَكَةْ الْمَسِيحْ.
[30] وَ هَسَّعْ يَا أَخْوَانِي، نَطْلُبْ مِنْكُو بِأُسُمْ رَبِّنَا عِيسَى الْمَسِيحْ وَ بِمَحَبَّةْ الرُّوحْ الْقُدُّوسْ أَشَانْ إِنْتُو تَسْأَلَوْا اللّٰهْ مَعَايِ بِشِدَّةْ.
[31] أَسْأَلَوْا لَيِّ اللّٰهْ أَشَانْ يِنَجِّينِي مِنْ النَّاسْ الْمَا مُؤْمِنِينْ الْفِي دَارْ الْيَهُودِيَّةْ وَ أَشَانْ الصَّالِحِينْ الْفِي مَدِينَةْ الْقُدُسْ يَرْضَوْا بِالْمُسَاعَدَةْ النِّجِيبْهَا لَيْهُمْ.
[32] وَ مِثِلْ دَا، إِنْ شَاءْ اللّٰهْ نَجِيكُو بِفَرَحْ وَ نَنْجَمَّ مَعَاكُو شِيَّةْ.
[33] اللّٰهْ رَبّ السَّلَامْ يُكُونْ مَعَاكُو كُلُّكُو. آمِينْ.