[1] 'Doo'd Kiriistokaaw, chi' etoo uskeel yeele, atinhi Rubeyti Munyee atin woyto samacchaar jiti haaggan isoolaaba. I'daasenyi ebba a isyaakhicho uus kajmeti uskeel kalugu'ddo khaatine.
[2] Huleesi jiro eti addan fuulo isleeokkhicha. I'daas ka amur Kiriisto a buuhissaan.
[3] A mehe chi' etoo wohoo iskoogyahe, 'deerka us etoo addan igargaarin, i'daas ka a isekkeesta, jeenteti us wohoo ieheynan u.
[4] Ebba wihi us yeelo a fiiricho, a iskeeylajo, uus etoo addan iskeekkaanne.
[5] A mehe ebba keley on huleesiis si'da.
[6] Eti wor Kiriisto laabcho la, eti woraas abcho wahanyeyyohi haaggane us khabo a leegismo.
[7] Iisekkeysanna, et Waakh ekkeesti mele. Ebba ilinti us gosiis goya kachibe on gurnaankiche gurta.
[8] Eti wihi uuriis goya kijiro uskeel imoono kahamaadicho on yeelo, i'di ilinti gos lagessuu gurnaanki us uskeelaas ka'helo, a baabakki usu labaabiicho. I'daasenyi eti wihi us yeelo, wihi Rubeyti Munyee kahamaadicho yahiin, i'di ilinti gos lagessuu, gurnaanki jiroti imassanne Rubeyti Munyee ka'hela.
[9] Uus inno haaggi inno yeello ka'harin gi'de. A mehe chi'inno ajjibaat ikhaatin, maane a tamiit, ti inno gurnaan 'hello.
[10] Maantaka, maambaaw inno jitoo 'helle, enenyet tuumman haag iyeello. Kach ka la, 'doo'dassi Kiriisto rummeeste haag iyeello.
[11] Chiirnaanka burbuurenye an dahanteey ka atin isoochiire bal yeya!
[12] 'Doo'di khandi atin ihosso, a 'doo'di enenyet ortiis ka ishahhaaggin 'doono. I'dane yeelaan uus 'dee jeenteti wori massalaaba Kiriisto miinsane enenyet ribo ka sina loomhin.
[13] 'Doo'di Ya'huude khandiiti laka, amurre Muusa tuum ma raaho. I'daasenyi icho atinhi atin lakhandiyo 'doonaane, 'dee khandihiin ka eylajaan.
[14] Ani ka la, omootti Yeesso Kiriistohi Kamureene massalaaba kayumuy on menye, wohoo addane an keeylajo ma jiraan. Massalaaba Kiriisto ka, wahanyeyyohi harrata a kamassade toro la wahanyeyyohi harrata ma idakhtaan.
[15] A mehe khandi ommos khandiwaayyo mee khumman. Wihi khumman, a atihi kola uumacchotoo husub titah.
[16] Waakh ba 'doo'di yeeda raaho tuumman nebey kakaala, toro uur isoonugleesta. 'Doo'daas la rumanka a 'doo'di Waakh gon.
[17] Wahane kamassicha. Uus etoo kalday laka sina ikawaarin. A mehe gumaarreti an khabo, saggi an bow'da Yeesso iahe tussa.
[18] 'Doo'd Kiriistokaaw, Yeesso Kiriistohi Kamureene ba rubeyohiin imaala. Aamiin.