[1] Khadaaba eti atin isoochiiro a ani, Baawulohi saggi Waakh igoochuu, ergaano Yeesso Kiriistee. 'Doo'di an isoochiiro a 'doo'di Waakhe ilkerengeetti Efeesso yaal. Atin ichoow Kiriisto a wohoo kaldaye, toro la a 'doo'di lakakhuufo.
[2] Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.
[3] Waakkheenki Aabba Yeesso Kiriistohi Kamureene koolinno. Waakh Kiriisto ka, goobi Waakh goyaka buuhi Rubeyti Munyee kayamiit tuumman a inno imaale.
[4] I'da ka geeddi Waakh harra isoouumin, Waakh Kiriisto ka a inno soobahsate, 'dee ortiis ka 'doo'di munyeenye wohoo rucchul laka liikacheekan nateeh. Waakh, jeenteti 'dooninti us inno 'doono on u,
[5] orey on gooste, Yeesso Kiriisto ka, tuum nyaakhutiis inno kayeessa. Waha la a wihi us hamaadiis ichoow 'doonintiis ka us gooche.
[6] Maantaka Waakh koolinno jeenteti haaggiiski buurenye us inno siiche u. Weeliiski us weyti 'doono ka haagga i'daanu a inno siiche.
[7] Inno ichoow Kiriisto a wohoo kaldaye, diiggiis ka a inno gatte inno soofure, toro la Waakh uskeeleen a inno ikakute. Wahaas ichoow haaggaas Waakhe buurenye inno imunneynane us inno tuste a israahaan.
[8] Haagga Waakh wohoo rucchul laka ma inno karimmanne, toro la khara ichoow abannaanki inno walah abanni a inno siiche.
[9] Waakh la maliiski goorat dagsane inno isoobabbakkaahiche. Waha a wihi hamaadiis ka, us Kiriisto ka gooche.
[10] Mala la a ki maanti ibeenneti labuuhicho titah layeelo, 'dee wihi lasoouume tuummane serey kijiro ichoow harra kijiro us matakkoo kalday iliche gesso, matakkaas la a Kiriisto.
[11] Waakh Kiriisto ka a inno soobahsate. Waha la a wihi us maliis ka goorat gooste on. Toro la walah tuumman saggi icho isooyateehiine igoocha,
[12] 'dee weynaanti Waakh nahi Ya'huudenye kolooraat Kiriisto kakhuufne koolo nah ka'hessa.
[13] Atinhi Ya'huud ieheynan laka yeedi rummaat a daagteen, a Wori Haaggane atin ribo. Maanti atin Kiriisto rummeysatteen, sumatti Rubeyti Munyeenye atin liiayyiche iche 'hesseen.
[14] Rubeyta Munyee la a ayyinti Waakhe wihi inno mu'dannahe tusso. Waha la a maanti Waakh innohi 'doo'diisenye toro hoolahiise ribnaanki 'da'ddaboot inno ribo. Waakh koolinno jeenteti weynaantiis u.
[15] Jeentetaas u, ani uus an saggi atin Yeessohi Kamureene ikakhuufteen ichoow saggi atin 'doo'di Waakh tuumman i'doontaan daage,
[16] weysiheey ka a atin kasoo'hela, toro la kol tuumman Waakh kala'de ilaaba jeentetiin u.
[17] An a inonnokhda Aabbaheenki weynaan tuumman tiis tahe, Yeesso Kiriistohi Kamureene Waakkhiise daaha, 'dee Rubeyti Munyeenye atin kharaasso, eti Waakh yahe atin isoobabbakkaahisso a atin siicho, 'dee Waakh mujjum abattaan.
[18] Wihi addane an Waakh daaho, a malassiinki lafuro 'dee walah seyyah abattaan. Khajjeeli us atin iwahe abattaane, buurti kamurroonka noole atinhi 'doo'di Waakhe atin mu'dan abattaane,
[19] toro la miigtiisti wohoo liikeekkaanne innohi usu rummeysanne inno gargaarto, wihiche abattaan. Miigta ichoow ti
[20] goorat Waakh Kiriisto omoot ka sookahche, toro us goobi Waakh ka anki dahantiisti miigeet koorromiche a too kalday.
[21] Intaas ka Kiriisto herti Waakh ichoow ginnayyo tuumman ichoow wihi anto khabo tuumman ichoow kamurre tuumman dakhta. Us magahenyeti enenyet liibahcho tuumman laka a kussayyahe, ti wey'da jirto ichoow ti jirtuu tuumman soojirto.
[22] Waakh la Kiriisto antohi walah tuumman siiche, toro Kiriisto i'di matakki walah tuumman u, urur Kiriisto siiche.
[23] Urura la a i'di sar Kiriisto. Usú sagag tuumman ka imaala, toro la sagag tuumman ka walah tuumman ka ibuuhicha.