[1] Wihi an eldi, geeddi eti dahal leh weel yahe, usu ichoow bow'da ba yeerar mee. Eheetteey laka, walah tuumman a wihiissa on.
[2] Geeddi ibeenki aabbahiis igooche sooyateeh, weel 'doo'di aabbahiis dahanohicho gesse ichoow ki wihiis yaakhicho iche ilicho kijira.
[3] Inno laka a i'daas on. Ichoowka maanti Kiriisto yimiy saggi nyaakhuti rurrucchule ijirre. I'di bow'dayyoot u miigti suujenye harratane iche inno anatte.
[4] I'daasenyi maanti ibeenki Waakh gooche yitah ka, Waakh Weeliis sooerge. I'di weeli enenyet u arantoo desse, dakhi amurre Muusa goya kadesse,
[5] 'dee 'doo'di amurre anatti soogatta toro soofura, 'dee Waakh tuum inno khaatta nyaakhutiis nateeh.
[6] Jeenteti atin nyaakhuti Waakh itahiin u la, Waakh Rubeyti Weeliissa rirriirto, “Aabba, Aabbahaaw,” elatti sooerge, rubeyoheen goya gesse.
[7] Kola geeddi atin bow'da keeheet a massatte, atin a nyaakhuti Waakh. Jeenteti atin nyaakhuti Waakh itahiin u la, wihi Waakh nyaakhutiis ikhabo tuumman atin laka a mu'dantahiin.
[8] Orey goorat atin Waakh ma garattaane, wahanyeyyohoo rumanka Waakh ieheynane bow'daticho eheet.
[9] I'daasenyi toolla atin Waakh abatteene, ommos Waakh atin garti la, a i'doh toro miigti suujenye 'da'ddarane mammarahe harrata dakhatti ikanokhattaan? Bow'datichooda toro itaahan 'doontaan?
[10] Atin daawohi Ya'huude seerassoo ichoow hayohoo ichoow gu'hassoo ka liinonnokhti lakhumummaacho raahtaan.
[11] An a atin ulooda, kolossoo hili goorat an atin ihile a ki ilmarhaatteet on.
[12] 'Doo'd Kiriistokaaw a atin hawwaasdee, taba i'deey u amurre Muusa iskafura. A mehe ani i'di atinhi Ya'huud ieheynan a itah. Atin walah khufenye atin iyeesseen mele.
[13] Saggi atin igarattaan u, jeenteti an i'darsade iche kolooraat Wori Haaggan atin icheeke.
[14] Sarteeyti 'daran kajmeti buurenye atin ititah. Eheetteey laka, atin ma i'darraawin ommos ma i'dii'din. Saggi atin imartiisatteen, atte an a herti Waakh ommos a Yeesso Kiriisto rubeytiissa.
[15] Hamaadi goorat maantaas atin khabteen toolla meeke? Garti an laabo, chi' kootte iche tateeh, indohiin laka a soobukkhissaane isiissaan!
[16] Toollaka runti an atin isoocheeko on ka chiiytankiin itah?
[17] 'Doo'daas amurreti Ya'huud atin ihosso weyti ichohi ankicho atin ilaabo 'doonaane, i'daasenyi wihi icho yeelin 'doonaan ma haaggan. Wihi icho 'doonaan tuumman a seleyhi icho inno bahchaane, 'dee atin laka icho weyti raahin 'doontaan.
[18] Weyti haaggantahe chirri wohoo la'doono, chi' wihi at 'doonto on haagganyahiin. Toro la kol dakkhan waha a rum cha'an atin leejiro kalday on menye.
[19] Nyaakhuteeyki an weyti 'doono, bolokkhi i'di ki aranti chiisenye toro atin ikhaba, ma ikabaho la ichoowka Kiriisto ka ii'dowtaan.
[20] Kootte incheenka toolla a atin leejira, 'dee hol ka ma atin leeyyeedo. A mehe an a atin kamalala.
[21] Atinhi amurre Muusati atin anatti 'doontaan, bal isoocheeka, wihi amurre Muusa elatti ma dagansattaan a?
[22] A mehe wihi chiiran, Aburaaham inam lamma khabe, koo a ki aranti bow'dee desse, koo la a ki aranti furan desse.
[23] Inankiiski aranti bow'dee desse, jiti weeli enenyete kadesse. I'daasenyi ki addan ayyinti Waakh usu igooche kadesse.
[24] Wahanyeyyoha i'di iyookko liikhaata. Oboorriha a iyookkoti ayyinti lammeenye Waakh rubeytiis on weeli enenyet igooche. Haagar ayyinti Waakh Hali Sinnaay ka gooche itolossa. Nyaakhuti ayyintaas raaho iche desse la a i'di bow'da.
[25] Haagar Hali Sinnaaye ili Araabo kijiro iche itolossa, toro la ilkerengeetti weene Yeerusaleeme wey'dane itolossa. A mehe nyaakhutiche khabtaayi iche a bow'da.
[26] I'daasenyi ilkerengeetti weene Yeerusaleeme saraate Waakh a i'di makhaabassi furane, iche la a abarteenna.
[27] A mehe wihi chiiran, “Makhaabassa mahanenye nyaakhut idelin hamaad! Riire, hamaad ka ooy, atihi bolokkhi chiis igaran! A mehe makhaabassi lakaguure, dessi ittaawenye 'hessa, wihi makhaabassi makhaabaliche leetaal kussane 'hessa.”
[28] 'Doo'd Kiriistokaaw, atin toollaka a i'di Isakhi ínam Saaree. A mehe atin a nyaakhuti ayyinti Waakh gooche.
[29] Maantaas inanki jiti weeli enenyet kadesse, inanki miigti Rubeyti Waakh kadesse sina omhiche. Uliba laka a i'daas on.
[30] I'daasenyi Chiirnaanneti Waakh mehe tadeeh? “Nyaam aranta bow'dee ichoow inankiche ba rih! A mehe inanki aranti furan ayyinti Waakh a mu'danyahe, inanki aranti bow'dee ayyintaas jirtuu ma kakhabo.”
[31] Maantaka, 'doo'd Kiriistokaaw, inno nyaakhuti aranti bow'dee menye, a nyaakhuti aranti furan.