[1] 'Dalammeti Galaatiya, ayyo atin katibte? Rumanka Yeesso Kiriistohi massalaaba lakakaahe a atin liisoonyiikhe!
[2] Wohoo kaldaye atin kaaban 'doona. Rubeyti Munyee jeenteti atin amurre Muusa ikhucchisseene i'hesseen, bal jeenteti atin Wori Haaggan idaagteene, irummeysatteen?
[3] Saggane 'dalam itahiin? Inkoo atin jiroti husub Rubeyti Munyee leesookhabatteen, toro miigti weeli enenyete kamassin 'doontaan?
[4] Sinati atin tuhum, a ti ilmarhaatteet on a? Rumanka ti ilmarhaatteet mee!
[5] Waakh Rubeyti Munyee a atin siicha, wihi ittaawenye weeli enenyet yeelin iubaa'dan goytiin ka yeela. Waha a jeenteti atin amurre Muusa iraahteen a? Mele! A jeenteti atin Wori Haaggan idaagteene irummeysatteen gon.
[6] I'daas ka Aburaaham, “Wihi Waakh yidahye rummeeste, Waakh usu eti fissan iekkaache.”
[7] Waha abda, nyaakhut Aburaaham a 'doo'di Waakh kakhuufo on.
[8] Chiirnaanneti Waakh saggi Waakh berri yaafohi Ya'huud ieheynan kakhuufnaanki icho usu kakhuufaan ka 'doo'di fiffissan iekkaacho a cheekte. Waakh 'hor on Wori Haaggan Aburaaham icheeke, wihi us iyidah, “Ati ka yaafohi harra tuumman a liimaala.”
[9] 'Deerka 'doo'di Kiriisto kakhuufo tuumman, i'di Aburaahamhi Waakh kakhuufuu, Waakh icho ichoow usu ba a imaala.
[10] 'Doo'di tuummane raahnaanki us amurre Muusa raaho kanool a falanyahe. A mehe wihi chiiran, “Eti orey ikasohanne wihi Buuggi amurre Muusa kachiiran tuumman iraahin a falanyahe.”
[11] Wihi nyiikhsan, et amurre Muusati us raaho ka Waakh eti fissan iekkaacho mele. A mehe, “Eti fissan kakhuufnaanki us Waakh kakhuufo ka a jira.”
[12] Amurre la kakhuufnaanki Waakh lakakhuufo ma kanoole, i'daasenyi, “Eti wihi amurre 'doonto tuumman raaho, amurre jirotiis dakhatta.”
[13] Kiriisto falohi amurre Muusa a inno kasoogatte inno soofure, iroonoteen u lafale. A mehe wihi chiiran, “Eti tuummane geey lakaloo'diche a falanyahe.”
[14] Us a inno gatte 'dee imaalnaanki goorat Waakh Aburaaham imaale, yaafohi Ya'huud ieheynan laka Yeesso Kiriisto ka imaala, 'dee kakhuufnaanki inno Kiriisto kakhuufno ka, ayyinti Rubeyti Munyeenye goorat Waakh gooche 'hella.
[15] 'Doo'd Kiriistokaaw, iyookkoti wohoo orran dakkhan inno garanni atin tusa. Chirri et lamma ayyintoo iskadaagte, et ayyintaas 'dol ilaabo ommos wohoo addan kakhayo mele.
[16] Toolla la ayyinti goorat Waakh Aburaahám igooche, Aburaaham ichoow weel nyaakhut nyaakhutiissa miinsantahe. Chiirnaanneti Waakh, “Ichoow nyaakhut nyaakhutiissa,” mee tadeeh, i'daas ka kootte a 'doo'di ittaawe gone. I'daasenyi mehe tadeeh ya, “Weel nyaakhut nyaakhutaahha.” I'daas ka la a etoo kaldaye, a Kiriisto la.
[17] Wihi an eldi kallaayo, Waakh Aburaaham ayyintoo igooche. Amurre Muusati inkoo gu'h kud affar ichoow gu'h tomon seyyah kutte timiy la, ayyintaas Waakh ma jebinne, ayyinti Waakh gooche ma suujaan.
[18] A mehe chirri wihi enenyet mu'dan amurre Muusati laraaho kanoolyahiin, kola ayyinti goorat us gooche ma kanool gon. I'daasenyi Waakh haaggiiski buure ka, ayyintaas ka Aburaaham wihi usu mu'dan a siiche.
[19] Amurre Muusa 'deerka mehe liisoobahcheey? Jeenteti Waakh liidaagiwwaaye iche lakasookhaye ichoowka weel nyaakhut nyaakhut Aburaaham ki goorat Waakh ayyintaas ka yeele yimiy. Waakh herti Waakh ka amurretaas a chuukhe. Muusa la Waakh ichoow 'doo'di Ya'huud dahcho gele, 'doo'daas amurre ikeene.
[20] Chi' koobbin lamma ayyintoo isleegoosso, dahgele la'doona. I'daasenyi Waakh rubeytiissa on keley ayyintaas Aburaaham igooche.
[21] 'Deerka amurre Muusa ichoow ayyinti goorat Waakh gooche a isbuusanyahiine elannaay? Waakh meesseen bujiiy! A mehe chi' amuroo jiro keeno jiro, i'daas ka 'deerka amurreti laraaho ka Waakh enenyet 'doo'di ortiis ka fiffissane iekkaacha.
[22] I'daasenyi Chiirnaanneti Waakh mehe cheekta ya, uskeel weeli enenyete harra tuumman a hide, 'dee 'doo'd Kiriisto ayyinti Waakh gooche, kakhuufnaanki Yeesso Kiriisto lakakhuufo ka 'hela.
[23] Geeddi goorat wori Yeesso lakakhuufo iimaatan la, amurre Muusa a inno hidde, toro inno toorribte, ichoowka wori Kiriistohi lakakhuufo lasoobabbakkaahiche.
[24] Maantaka amurre maantaas ersinkeen eheete, ichoowka Kiriisto yimiyye, 'dee 'doo'di Waakh ortiis ka fiffissan inno liiekkaacha jeenteti inno usu ikakhuufnuu.
[25] Toolla jiti Kiriisto lakakhuufo yimiy la, amurre Muusa ma inno yaakhisso.
[26] Kakhuufnaankaas atin Yeesso Kiriisto kakhuufteen ka, atin tuumman a nyaakhuti Waakh.
[27] A mehe atinhi baattissiyo ka atin ichoow Kiriisto ba wohoo kalday tahiin, a i'doo atin jiro Kiriisto i'di gaadeet u gessatteen.
[28] Kola enenyet seley ma gaan. I'di maanta Ya'huud ichoow yaafohi Ya'huud ieheynan, ommos bow'da ichoow 'doo'di bow'da ieheynan, ommos mejel ichoow deyyeho seley ma gaan, a mehe atin tuumman Yeesso Kiriisto ka a wohoo kalday.
[29] Atin koo Kiriisto a titaaheen gone, atin laka 'deerka a nyaakhut Aburaahame, toro la ayyinti goorat Waakh Aburaaham igooche, atin laka a mu'dantahiin.