[1] Inkoo gu'h tomon ichoow affare kutte, Barnaba khabaayi, ilkerengeetti weene Yeerusaleem toro inokhde. Tiito laka a khaadde.
[2] An jeenteti wihi Waakh isoobabbakkaahiche iirde. Reeri 'doo'd Kiriisto woyo magah khabo kalday on Wori Haaggane an yaafohi Ya'huud ieheynan icheeko, woriis icheeke. An mehe karoore ya, hili an orey haaggiche ichoow ki toolla an haaggicho, usuhi ki ilmarhaatteet yateeh ma 'doono.
[3] Tiitohi wahalheeye, chu'us Giriig eheet laka, khandihi Ya'huud khandiiti ma liiholin.
[4] Aytaas khandi miinsan jeenteti 'doo'doo 'doo'd Kiriisto iskaayyeelo dagsi ka goyteen isoogeluu a soobahte. 'Doo'da la furnaanki Yeesso Kiriisto inno soofure, iche 'degey kayimiyye, 'dee bow'dayyohi hugummeti Ya'huud inno kayeelaan.
[5] Nah la yeedicho nabah ma isudin i'daaru laka. A mehe runti Wori Haaggane atin ikaaynaa.
[6] 'Doo'da urur 'doo'di wewween ikhaato laka Wori Haaggane an enenyet abche walah icho kakhayeen mele. Wihi 'doo'da eheet, ani ka a walahba. A mehe Waakh enenyet fool mee yeyo.
[7] Mehe argeen ya, saggaas Waakh Beetero hili us Wori Haaggan 'doo'di Ya'huud icheeko ikorche, iche Waakh ani laka hili an Wori Haaggan yaafohi Ya'huud ieheynan icheeko ikorche.
[8] A mehe Waakkhi hili Waakh liihilo ka Beetero ergaanoti 'doo'di Ya'huud kayeele, ani laka hili Waakh liihilo ka ergaanoti yaafohi Ya'huud ieheynan a ikayeele.
[9] Yaakoobo ichoow Beetero ichoow Yoohana, iche tirrinki urur Kiriisto liiekkaacha. Icho la saggi an haaggi Waakhe buure ka hila liisiiche a abteen. Toro ani ichoow Barnaba kulanki urur Kiriisto ka nah khaatteen. Wihi nah iskadaagne a mehe ya, icho yaafohi Ya'huude iirtaane, nah la yaafohi Ya'huud ieheynane iiranna.
[10] Wihi kaldache icho nah daaheen a mehe ya, 'doo'dichoki miskiinee a lakasoo'helo. Anna wahaas a wihi an uureey kakhabo on.
[11] Maanti Beetero ilkerengeetti Antiyookhiya yimiy, wihi us kijire a khufé, anna fool kakhabde, tirrime.
[12] I'di eheneet, 'doo'doo Ya'huude Yaakoobo kayimiy a jire. Geeddi 'doo'da iimaatan, Beetero 'doo'di yaafohi Ya'huud ieheynan a leegolossata. I'daasenyi inkoo 'doo'daas Ya'huud yimiy, Beetero yombo inokhte, 'doo'di us leegolossati kagowe. Waha a jeenteti us 'doo'da Ya'huude, yaafohi addane lakhandiyo 'doono ikarooro.
[13] 'Doo'di addane Ya'huud laka usuhaas iskaayyeelo ikhaye, iskaayyeelnaankaas ka, Barnaba laka labaabiiche.
[14] I'daasenyi wihi an arge, fiddihicho ichoow runti Wori Haaggan ma israahaan. Maantaka Beetero 'doo'd tuumman ortiis ka mehe iidah ya, “At a Ya'huude, eheetteey laka, jiroti Ya'huud menye jiroti yaafohi Ya'huud ieheynane jirta. Saggoh yaafoha Ya'huud ieheynan hugummeti Ya'huud ikaholissa?
[15] “Nah delmaat ka a Ya'huud. Nah yaafohi Ya'huud ieheynane innohi Ya'huud uskeele kaassohtaan elanni mee.
[16] I'daasenyi wihi nah garanni, eti Waakh ortiis ka eti fissan iekkaacho ki amurre Muusa raaho menye, a ki Yeesso Kiriisto kakhuufo on. 'Deerka nah laka Yeesso Kiriisto kakhuufna, 'dee amurre Muusati nah raahno ka menye, kakhuufnaanki nah Kiriisto kakhuufno ka, Waakh nah laka 'doo'di ortiis ka fiffissan nah iekkaacha. A mehe etoo kaldaye amurre Muusati us raaho ka, Waakh eti ortiis ka fissan iekkaacho mele.
[17] “Toollaka nahi Ya'huud Kiriisto a kakhuufne 'dee Waakh 'doo'di ortiis ka fiffissan nah iekkaacha. 'Doo'doo Ya'huud ka la, 'doo'di uskeel lehe nah liiekkaacha. Kiriisto uskeelaas nah kalug'de? Waakh meesseen bujiiy!
[18] Cha'an jiti amurre Muusati laraaho an 'hor jire an 'dii'de toro toolla kanoolahe, i'daas ka saggi rumanka an uskeel iyeele tusa.
[19] A mehe amurre Muusati an raahe ka, woynaanki amurretaas iwoyte a massate, 'dee Waakh ijira.
[20] Saggi Kiriisto iyumuy u, a i'doo ani laka umuyye, kola jiroti an jiro teey menye, i'daasenyi Kiriisto jiroteey dakhta. Kola sarteey ka jiroti an jiro, kakhuufnaanki an Weeli Waakh kakhuufo iche kajira. Ulla a i'doona, toro la ani a iyumuy.
[21] An haaggi Waakhe buurenye an ribnaan ka'hele sag an 'dol iassil mele. I'di tahe chirri amurre Muusati laraaho ka Waakh 'doo'di ortiis ka fiffissan nah iekkaacho, Kiriisto walah us iyumuy mele gon!”