[1] Kiriisto a inno soofure, maantaka uus inno bow'da itaahan. Mujjum tolola gi'de, toro la huleesi bow'da uus atin lakorin.
[2] Waha abda! Anihi Baawulee wihi an atin isoocheeko, cha'atin lakhandiyo 'dee nane Waakh 'doo'di fiffissan atin iekkaacho, Kiriisto gargaar us atin ikhabo mele gon.
[3] Toro a katirriinsada adeehe, etiinki jeentetaas liikhandiyo, wihi laka'doono a usuhi wihi amurre Muusa 'doonto tuumman raaho.
[4] Atinhi amurre raahin 'doontaane 'dee Waakh 'doo'di fiffissan atin iekkaacho, Kiriisto a atin lakagooche, toro la haaggi Waakhe buure a rogteen.
[5] I'daasenyi kakhuufnaanki inno Kiriisto kakhuufno ichoow Rubeyti Munyee ka, wihi inno khajjeello a Waakkhi 'doo'di fiffissan inno iekkaacho.
[6] A mehe jeenteti wihi Yeesso Kiriisto inno iyeeluu, khandi ommos khandiwaayyo indigir icho khabaan mele. Wohoo kaldaye khummane jira, a kakhuufnaanki inno Kiriisto kakhuufno, 'dooninti inno Waakh ichoow 'doo'di addan 'doonno lakaargo.
[7] Atin orey saggi mujjumenye Kiriisto iraahteen. Ayyo runti Waakhe atin raahtaan atin kajeyche?
[8] Ekkeysihi i'daase, Waakkhi atin wahe ma kiimaatan.
[9] Mammahe mehe tadeeh ya, “Booddati makaate fuurisso, wohoo weyti rucchul on makaateti buure tuumman fuuricha.”
[10] Kamuri ani ichoow usu ba wohoo kalday nahe ka a tissiba, atin maleey on menye maloo addan ma raahtaan. Eta mal atin tiro la, ebbaaw u' yahe ka, Waakh sina a igoocha
[11] 'Doo'd Kiriistokaaw, cha'an uliba wori khandi miinsan cheeko, a i'doh uliba 'doo'di Ya'huud ani sina iomhicha? Cha'an wahaas cheeko, wori massalaaba Kiriisto miinsane enenyet tarraantarricho a labaabiiche gon.
[12] 'Doo'daas mal atin tiro la kootte incheenka yeedichokaas orey a iwoyaane ichoowka issiibaan.
[13] 'Doo'd Kiriistokaaw, Waakh furnaanki us atin soofuro iche atin iwahe gone, atin bow'dayyohi amurre mee. I'daasenyi furnaankaas akagir'daamina, wihi uurassiin goya kijiro uskeel imoono araahina, taba 'dooninti atin isikhabtaan ka isifala.
[14] Amurre Muusa tuumman yeeda kalday on kakulanta, “Ollokkaah geeddi at is'doonto 'doon.”
[15] I'daasenyi cha'atin kol dakkhan i'di binaat u istamhiin, yuubsada a ismassissaanee.
[16] Wihi an eldi kallaayo, taba jiroti Rubeyti Munyee woyto jira, i'da ka la wihi uurassiin goya kijiro uskeel imoono ma raahtaan.
[17] A mehe wihi uuraas goya kijiro uskeel imoono, Rubeyti Munyee a tirrimaane, wihi Rubeyti Munyee 'doonto la, wihi uuraas goya kijiro uskeel imoono a tirrimaan. Icho a istirrimaane, 'deerka wihi haaggane atin yeelin 'doontaan ma yeessaan.
[18] I'daasenyi chi' Rubeyti Munyee atin woyto, amurre Muusa ma atin anatti gon.
[19] Wahanyeyyohi wihi uurasseen goya kijiro uskeel imoono yeelaan a 'dow on. Waha a i'di maanta 'doo'di isidisanne isleeur'do, wihi bi'dire, soho'ddarri,
[20] iyookkoyyohi waakkhakh lakayeessi, moroyyohi liirti, is'dii'ddo, isjihit, inaaf, dowwa hollowin, walah keley isiyowan, seley goggoonaan, rabitohi lakaaggowo,
[21] kal'darri, meleefu ichoow daawohi bi'dire ichoow wihi i'daase tuumman. Orey a atin tootooche, toro maanta a atin tootoocha, 'doo'di jiroti i'dee jiro, dakhi Waakh ma gelo.
[22] I'daasenyi Rubeyti Munyee jiroteen goyaka gurnaanki iche desso a wahanyeyyoha, 'doonin, hamaad, nebey, garrahsi, uuri 'dabakhe, haag, kakhuufnaanki enenyet lakakhuufo,
[23] samacchaar ichoow isjeyin. Amur wahanyeyyoha 'dii'ddan mele.
[24] 'Doo'di koo Yeesso Kiriistee wihi uurassicho goya kijiro uskeel imoono ichoow uskeeli lamaanjeerti ba massalaaba a kasoorriyyoocheen.
[25] Jiroti inno jirro toolla Rubeyti Munyeenye kajirra gone, jiroteen ichoow Rubeyti Munyee a israaheen gi'de.
[26] Uus inno eylaji beenaate ilmarhaatteet khabine ommos iskaahholloonne ommos isinaafin.