[1] Nyaakhut, jeenteti Kamur u, taba wihi 'doo'di atin dele atin idowo raaha. A mehe i'daas a i'di mujjume.
[2] Amuri Waakh mehe yadeeh ya, “Aabbahaah ichoow abartaah inkaanyit.” Amuraas a ki oraate Waakh wohoo kaayyiche.
[3] Wihi us ayyiche la a mehe ya, “'Dee wihi tuummane atin isoobaho a wihi haaggane, toro harrata ka warwaara.”
[4] Ooyenye taba, atin laka nyaakhutiin akaahholloonna, nyaakhutiin saggi Kamur i'doono isooweynaacha, waanicha fatali incheenka kootte icho jiraan abcha.
[5] Bow'dayyo, taba kamurretiinti harrata walah tuumman ka yeedicho raaha. Inkaanyit ka ichoow roorro ka wihi icho 'doonaan tuumman yeela, uuri haaggan ka la yeela. Saggi atin Kiriisto ikihissaan on icho laka ihila.
[6] Yeedicho raaha. Waha la geeddi icho atin argaane atin icho kahamaadissaan kalday on mee, i'daasenyi taba i'di bow'dayyo Kiriistuu yeedicho raaha, wihi Waakh 'doono tuum uurassiin ka yeela.
[7] Hili atin haaggissaan la, hamaad ka haaggicha, saggoo atin weeli enenyet ihissaan menye, saggoo atin Kamur ikahissaan iyeela.
[8] A mehe wihi atin garattaan, eti bow'dee ommos ki bow'da ieheynan eheetteey ka ba, Kamur enenyet tuumman wihi haaggane us yeelo ka kala'd a guta.
[9] Toro la Kamurre taba atin laka saggaas on u bow'dayyohiin haag on iyeela. Iitiftoonna, a mehe saggi atin igarattaan u atin tuumman Kamuroo kaldaye goobi Waakh ka khabtaane, ulla gar badah ma gatti.
[10] Ayti 'da'ddaboot talla. Atin ichoow Kamur a wohoo kalday gone, taba miigtiisti weyti buure ka miigowa.
[11] Gaaddi diho Waakh atin siiche tuumman gessada, 'dee ekkeysihi Seytaan ka mujjum tolola.
[19] Ani laka Waakh isoowaha, 'dee cha'an yeyyeedo, Waakh wihi an adeeh a isiicho, 'dee roorro laan enenyet wihi dagsane Wori Haaggan miinsan a icheeko.
[20] Jeenteti Wora Haaggan u, anihi meel Kiriisto kijiro jeela kijira. Waakh wahda, 'dee wora roorro laan saggi imale a icheeko.
[21] Tuuchikohi koo Kiriisteenye an weyti 'doono, toro hili Kamur ka falfeenye lakakhuufo, woreey tuumman a atin isoocheeka, 'dee saggi an ijiro ichoow wihi an yeelo abattaan.
[22] Jeentetaase usu atin ikasooerga, 'dee saggi nah ijirro abattaane toro la uur atin miigoocha.
[23] Waakkhi Aabbaheene ichoow Yeesso Kiriistohi Kamure ba 'doo'di Kiriisto rummeeste nebey kakaalaan. Toro icho ba 'dooninti atin is'doontaan ichoow kakhuufnaanki atin Waakh kakhuuftaan atin siichaan.
[24] Waakh ba 'doo'di tuummane Yeesso Kiriistohi Kamureene 'dooninti imassan ka 'doono imaala.