[1] Ani hili Kamure an haaggicho, iche toolla jeela ikajira. Maantaka a atin hawwaasdee, taba jiroti 'doo'di Waakh wahe imasse jira.
[2] Taba kol tuumman isnuglaacha toro la 'doo'di samacchaare ateeha. Garrahsada, toro la jeenteti atin isi'doontaan u 'doo'di addan akaahhollowina.
[3] 'Deerka hol dowa, nebeyti atin iskaleefiddiitaan ka wohoo kaldaye Rubeyti Waakh atin kayeesse khuccha.
[4] Rubeyti Waakh a too kalday one, toro la inno a sartoo kalday. Saggaas on u, maanti Waakh inno wahe khajjeeloo kaldaye inno iwahe.
[5] Kamur a koo kalday one, jiti inno Waakh kakhuufno la a koo kalday one, baattissiyoti inno labaattissiye la a too kalday on.
[6] Toro la Waakh a koo kalday one, a Aabbahi walah tuummane, walah tuumman dakhti, walah tuumman hil kahaagsati, walah tuumman goycho furti.
[7] I'daasenyi Kiriisto eteemba haaggi Waakhe buure a siiche, ulla saggi liigiso a gooche.
[8] Jeentetaase Yeedi Waakh i'da iyadeeh, “Maanti us serey ka inti saraat ikore, chiiytiis a booliye woye, toro la siimohi hahhaaggane 'doo'diis siiche.”
[9] Waha kamalda bal, yeeda maanta, “Sereye ikore,” essi mehe kaabanna? Waha mehe inno abchaan ya, us harra goyaka laka inti weyti ilaate isookhubte.
[10] Usuhi sookhubte, usuhaas on serey ikore, serey ka intaas weyti kutto ikore, serey tuumman ichoow harra tuumman buuhiche.
[11] Usu 'doo'd gaasoo ergaano kayeele, gaasoo laka 'doo'di Waákh íyeyyeedo kayeele, gaasoo laka 'doo'di Wori Haaggan taa'hicho kayeele, gaasoo la 'doo'di urur Kiriisto yaakhicho toro la Yeedi Waakh abcho kayeele.
[12] Waakh i'dane yeele, 'doo'di Waakh hili icho Waakh ihilaan itannabicha, 'dee urur Kiriistoki sartiise miigowa.
[13] Waha la orey on isohtaane ichoowka inno tuumman kakhuufnaanki inno Waakh kakhuufno ka ichoow Weeli Waakhe inno abanni ka wohoo kalday nateehe, 'doo'di ii'dowe nateehe ichoowka geeddi Kiriisto ii'dowe ii'downa.
[14] 'Deerka inno i'di nyaakhuti dowwa leekkeesti menye, i'di koobanhoo rucchule chirri hafar urgiyo kolba ankoo liikhaato mee. Toro la inno 'doo'di worassi beenaate icho enenyet abchaan ka enenyet ekkeesti mee.
[15] Inno kol dakkhan 'doonin ka ayti rummaat on isicheekna 'dee jitat tuumman ka weynaanna, i'di Kiriistohi matakki 'doo'diise nateeh.
[16] Inno a i'di miilassi addane sareet. Saggi miilassi sareet tuumman isliikadagche maanjeerre ikhucchissuu, Kiriisto laka usu 'doo'diis wohoo kalday kayeela. Saggaas on u miilassi sareet kooba hiliis mujjume haaggicha, sartaas 'doonin ka weynaatta miigowta.
[17] Maantaka, antohi Kamur isiiche ka an weyti waha katirriinsada, taba uus jiroti atin jirtaan i'di ti 'doo'di Waakh igaranne mali ilmarhaatteet kamassi eheynan.
[18] Malassicho mug'di buuha, jiroti Waakh laka'helo a lakagooche. Jeenteti matahenyeticho miig itahuu, wahanyeyyohi Waakh ma gartaan.
[19] Icho chi'icho suujoon yeelaan laka kola leelakhaanyo mee. Wihi sarticho 'doonto i'daanu yeelaan. 'Damaam ka bi'diri noole kol dakkhan iamuumaan.
[20] I'daasenyi saggi wor Kiriisto atin liiabche saggaas mee.
[21] Wihi an tissibo, maanti atin woriis daagteen, wihi atin laabche ichoow yeedi rummaate Yeesso miinsan a israahaan.
[22] Wihi atin laabche, jiroti atin 'hor jirteene, fiddihiinki uskeel liimoono atin ekkeeste toro atin kheerooche 'diicha.
[23] Toro la a atin laabche, rubeyohiin ichoow malassiin husubnaassaan.
[24] Wihi 'da'ddaboot, Waakh a atin soouume, 'dee 'doo'doo huhhusube i'diisenye rumanka fiffissane toro munyee tateehiin.
[25] Maantaka ebba been a 'diicho, eti addane Kiriisto rummeeste rum on a kaleeyyeedo, a mehe inno tuumman a miilassi sartoo kalday.
[26] “Holi atin khabtaan ka uskeel agelina.” Hol khabtaani orrah iiche dihin.
[27] Toro la Seytaan jitoo us uskeel atin kalug'do iiyeelina.
[28] Eti goorat hatto kaassohti, hatto a 'diicho, hil a haaggicho, wohoo khumman a yeelo 'dee eti intiis gaabantahe wihi us leegismo a khabo.
[29] Yeedi 'doo'di addan gaameero uus afiin leeimaatane, yeedassi 'doo'di gargaar 'doono gargaaro toro la uur miigoocho on kaayyeeda. I'da ka la 'doo'di atin daago buuhi Waakhe 'hela.
[30] Rubeyti Munyeenye Waakh la akabolkhinna. I'di tahe Rubeyta Waakh a sumatti saggi atin 'doo'di Waakh itahiine ichoowka ibeenki Waakh ribnaanki 'da'ddaboot atin ribo tusso.
[31] Taba iisibobbolkhina ommos iisinyannyaamina ommos iisihohhollowina ommos iiskaarriirina ommos iishamanna ommos suujoonkoo rucchul laka iisikhabina.
[32] Haag on enenyet iyeela, toro la enenyet uur inugleesda. Saggi Waakh laka jeenteti atin ichoow Kiriisto wohoo kalday itahiin u uskeeliin atin ikakutuu, atin laka eti uskeeloo atin iyeele, uskeel ikakuta.