[1] Atin 'hor anki Waakh ka 'doo'di tuume eheet, a mehe atin wahanyeyyohi Waakh a daagiwwaayteene, toro uskeele yeesseen.
[2] Maantaas la wahanyeyyohi harratane sussuuje ichoow karnati ginnayyohi saraat anti iche raahteen. Ulla a ki 'doo'di Waakh daagiwwaayo woyo.
[3] Inno tuumman laka 'hor i'dichooda eheete, wihi uurasseen goya kijiro uskeel imoono on iamuunne, uskeeli uurasseen ichoow malasseen 'dooneen on maanjeeranne. Inno i'di 'doo'di addan u wihi inno imale a holi Waakh.
[4] I'daasenyi Waakh weyti uurnugulyahe. Jeenteti 'dooninti buurenye Waakh inno 'doonuu,
[5] inno ichoow Kiriisto wohoo kaldaye inno kayeele, jiro inno siiche. A mehe jeenteti inno Waakh idaagiwwaaynuu anki Waakh ka a tuunne, i'daasenyi haaggiiski buurenye inno imunneynan ka us a inno ribe.
[6] Toro la wohoo kaldaye Waakh inno ichoow Yeesso Kiriisto inno kayeele ka, Kiriisto omoot a inno kaleesookahche, goobi Waakh ka komborti antoot inno kaleeorrommiche.
[7] Waakh i'dane yeele 'dee Yeesso Kiriisto ka haaggiiski buurenye inno imunneynane wohoo weyti buure laka liikookkaanne uuriiski 'dabakhenye us inno ikhabo lakaargo, inno tusa.
[8] A mehe Waakh haaggiiski buurenye atin ikamalin ka a atin ribe. Ribnaanka la kakhuufnaanki atin usu kakhuuftaane kayamiit. Waha la wihi atin kayimiy menye, a siinti Waakh one,
[9] toro la jeenteti atin wohoo iyeesseen mee, uus 'dee etoo kalday laka eylajine.
[10] A mehe Waakhe wihi toolla inno nahe inno kayeele. Wohoo kaldaye inno ichoow Yeesso Kiriisto nahe ka a inno soouume 'dee hilassi hahhaaggane Waakh goorat inno itannabiche kaassahanna.
[11] Maantaka, atinhi yaafohi Ya'huud ieheynan kadelatteen, bal wihi goorat atin 'hor eheet kasoo'hela. Yaafohi Ya'huud mehe atin yadeehiin ya, “'Doo'di ikhandiineynan.” Icho la mehe isyadeehiin ya, “'Doo'di khandiyan.” I'daasenyi, khandihaas a wihi enenyet on sar lagoggoocho, dahanti weeli enenyet on yeesso.
[12] Saggi goorat maantaas atin ichoow Kiriisto yeerar ieheneet kasoo'hela. Atin yaafohi Issiraayele Waakh soobahsate goya ma kajirin. Ayyinti goorat Waakh yaaftaas igooche atin goya ma kajirin. Harrata uskeel kijiro ka la khajjeeloo rucchul laka ma khabine, Waakh laka ma khabin.
[13] I'daasenyi atinhi goorat Waakh foga ileejirteene toolla atin ichoow Yeesso Kiriisto ba wohoo kalday titaaheen, diig Kiriisto ka, Waakh a atin liisoodowwaache.
[14] A mehe Kiriisto rubeytiissa nahi yaafohi Ya'huude ichoow atinhi yaafohi Ya'huud ieheynan ba inno isineybiche yaaftoo kalday inno kayeele. Usú moosi goorat seley inno bahcho inno isichiiyoocho jejjebché.
[15] Us Kiriisto ka i'dane yeele, amurre Muusati alohi ittaawe khabto omoottiis ka miig tire, 'dee yaafoha lammacho usu ka yaaftoo kaldaye husub kayeela. I'da ka lammacho isineybicha.
[16] Toro la omootti us massalaaba kayumuy ka, Kiriisto chiiyoonki yaafoha dahcho kijire a bahche isikeene, lammacho sartoo kaldache icho yahiin ka anki Waakh keene.
[17] Kiriisto a yimiyye yaafohi Ya'huude Waakh idow ichoow atinhi addane Waakh foga ileejirteen wori nebeyeet icheeke.
[18] A mehe Kiriisto ka, innohi Ya'huude ichoow yaafohi addan ba, Rubeyta Munyee ka, Waakkhi Aabbaheenenye inno leeyyeeno a mu'dannahe.
[19] Jeenteti waha u atinhi yaafohi Ya'huud ieheynan kola 'doo'di liigaran ichoow marti mee, i'daasenyi atin 'doo'di Waakh goya kijirtaane, toro la a 'doo'di minki Waakh.
[20] Atin a i'di daddaabohi ilaate minki ergaano ichoow 'doo'di Waákh íyeyyeedo kadisanyahiin. Tirrinki dagaheete minka la, a Yeesso Kiriisto rubeytiissa.
[21] Kiriisto ka min tuumman a iskhuccha, toro la buuraacha, ichoowka minki Waakhe buurenye lagane Kamur yateeh.
[22] Atinhi Ya'huud ieheynan ichoow Kiriisto a wohoo kalday gone, Kiriisto atin ichoow Ya'huud ba a atin isikeena, 'dee minka Waakh Rubeytiis ka igelo atin tuumman tateehiin.