[1] Jeenteti wahaas tuumman u, ani Baawulo iroonoti atinhi yaafohi Ya'huud ieheynane an Yeesso Kiriisto ikahilo iche jeela ikijira.
[2] Saggi dakhi haaggi Waakhe buurenye atin iroon ani liisiiche a daagteen gon.
[3] Wihi Waakh yeele a waha, maliiski dagsaneete us 'doo'd ikhabe ani isoobabbakkaahiche. Gaabi ka 'hor woraas a atin isoochiire.
[4] Wahaas atin soonteen ka, saggi an mali dagsane Kiriisto miinsan igardi aban a tabuu'diin.
[5] Waakh kholoyyohi oraat waha dagsan ma tusine, toolla la Rubeyti Munyee ka ergaanotiisti munyee ichoow 'doo'di Waákh íyeyyeedo munyee waha a isoobabbakkaahiche.
[6] Waha dagsaneet la a mehe ya, Wori Haaggan ka yaafohi Ya'huud ieheynan wihi yaafohi Ya'huud mu'dan a lee'helaan. Icho kola a sartoo kaldaye toro la wihi Waakh Yeesso Kiriisto ka ayyiche a leegismaan.
[7] Ani siinti haaggi Waakhe buurenye miigtiis ka liisiiche, falfati Wora Haaggan itah.
[8] 'Doo'di Waakh soobahsate 'da'ddaran tuumman goyaka ani weyti 'daran. Eheetteey laka, Waakh haaggiiski buure ka, ani wori buuh Kiriistoki wohoo liikookkaan yaafohi Ya'huud ieheynan liicheeko a siiche.
[9] Toro la Waakh dakhi wihi tuummane dagsaneete us enenyet ikhabo miinsan 'doo'd latuso a igesse. Waakkhi walah tuumman soouume la, wahanyeyyohaas injire enenyet ma isoobabbakkaahin.
[10] Ulla wihi us kamasse, toolla urur Kiriisto ka kharati Waakhe ittaawe karnatohi ginnayyohi anto lehe meessi saraat kijiro a abcha.
[11] Waakh wahaas i'dane yeele, maliiski geeddi us harra isoouumin gooche toro la Yeesso Kiriistohi Kamureene ka, wahaas buuhiche.
[12] Inno ichoow Kiriisto a wohoo kalday gone, toro la usu a kakhuufna gone, a geeddi inno roorro laan Waakh idowwaanni.
[13] Maantaka a atin hawwaasdee, taba chirri jeentetiin u sina itaham laka, rubey iiche atin jebin. Wahaas inkaanyite atin ikeenaan.
[14] Ani la jeenteti waha tuumman u, Waakkhi Aabbaheene ortiis ka jilbo il kagu'dda, Waakkhi Aabbaheene atin iwaha.
[15] A mehe 'doo'diiski goobi Waakhe saraat ichoow ki harrata usu magah ka'helaan.
[16] Wihi an Waakh daaho, Waakh ba kamurroonkiiski ween ka, Rubeytiis ka uurassiin miigoocha,
[17] 'dee Kiriisto kakhuufnaanki atin usu kakhuuftaan ka uurassiin goyaka fur yeessa. Toro la Waakhe daaha, 'dooninti atin Waakh ichoow enenyet 'doontaan ka miigowtaane toro mujjum tolossattaane,
[18] atin ichoow 'doo'di Waakh 'dooninti Kiriisto inno 'doono ballaaddihiche ichoow segdeerruhiche ichoow deerantiche ichoow hogtiche tuum abattaan.
[19] Toro la Waakhe daaha 'dee 'doonin Kiriisto abattaan, chirri atin 'dooninta wihiche tuum aban iubaa'dan laka. I'daas ka buuhi Waakh tuum goytiinna buuhicha.
[20] Waakh a lakoolicho gi'de! I'di tahe Waakh miigtiisti goyteen ka hil haaggin tabuu'd ka, wihi inno daahne ichoow wihi inno rerreegno tuumman 'dirihichooda inno iyeela.
[21] Urur Kiriisto ichoow Yeesso Kiriisto ka, Waakh ba kholoyyo tuumman ichoow jirtuu tuummamba lakoolicha! Aamiin.