[1] Khadaaba eti atin isoochiiro a ani Baawulo. Timooti laka a iskhabna. Nah la a falfa Yeesso Kiriisto. 'Doo'di an khadaaba isoochiiro a 'doo'di Waakhe ilkerengeetti Fiiliffi yaalle icho ichoow Yeesso Kiriisto ba wohoo kalday yahiin, ichoow 'doo'di urur Kiriisto yaakhicho ichoow 'doo'di urur Kiriisto gargaaro.
[2] Waakkhi Aabbaheene ichoow Yeesso Kiriistohi Kamureene ba atin imaalaane nebey atin kakaalaan.
[3] Kol tuumman chirri an atin kasoo'helo, Waakkheey kala'de ilaaba.
[4] Kol tuumman chirri an atin tuumman Waakh atin isoowaho, hamaade kaweesda.
[5] A mehe atin uus maanti kolooraate atin Wora Haaggane Kiriisto miinsan daagteen ichoow uliba a iwalhisseene woraas ileecheekteen.
[6] Wihi an tissibo a waha, Waakkhi hila haaggan goytiin ka sooumhe, orey on iwoya ichoowka ibeenki Yeesso Kiriisto soonokhti ka hila haaggan massicha.
[7] Ani uure atin kakhaba gone, a mujjum chirri an i'daasu atin tuumman atin kamaldi. A mehe cha'an hidanahe ommos kootiin ka saggi Wori Haaggan rum iyahe 'doo'd icheeko, atin tuumman hila haaggi Waakhe buure a ileegisantaan.
[8] Waakh saggi an 'dooninti Yeesso Kiriisto enenyet 'doono ka uureey ka atin ikamoono garteey a laaba.
[9] An Waakhe atin isoowaha, 'dee 'dooninti atin is'doontaan ichoow 'dooninti atin Waakh 'doontaan buuraatta. Geedda iche buuraatti, mujjume Waakh abattaane, toro la haag ichoow suujoon seley bihin tabuu'diin.
[10] Waakhe atin isoowaha, 'dee wihi weyti haaggan soobahsan tabuu'diine, toro la uus toolla kakhabatti ichoowka maanti Kiriisto soonokhti, Kiriisto atinhi eloo rucchul laka laaye toro la enenyet wohoo atin ikacheekan atin 'hela.
[11] I'da ka Yeesso Kiriisto ka gurnaanki fiffissane jirotiin goya buuhicha. Waha la Waakh weynaan ichoow koolo ikeenaan.
[12] 'Doo'd Kiriistokaaw, wihi an atinhi abattaan 'doono, wihi ani liiyeele ka, rumanka Wori Haaggan a taa'he.
[13] Jeentetuu iskarti minki buurenye karnat toorribto tuumman ichoow 'doo'di addan saggi an jeenteti an Kiriisto iraaho on u liihide, a garta.
[14] Toro la jeenteti an jeela ikajiruu, 'doo'di Kiriisto rummeeste buurtiis Kamur ka uur a lamiigooche, 'dee roorro laan Yeedi Waakh cheekaan.
[15] Rumanka gaasichokoo jeenteti kal'darri ichoow jaakhe wor Kiriisto enenyet icheekaane, i'daasenyi gaasoo jeenteti uuri haaggane wor Kiriisto icheekaan.
[16] Kan uur haaggan, 'doonine woraas kacheeka. A mehe saggi Waakh ani hila dahan igesse 'dee us saggi Wori Haaggan rum iyahe 'doo'd ituso, iche gartaan.
[17] 'Doo'di oraat, wor Kiriisto uuri fissan ka ma cheeko wihi awtichooda on yowtaane, 'dee geedda an jeela kijiro sina ibuuraachaan.
[18] I'daasenyi wahaas walah icho ileeyahiin mele! Wihi khumman, jitat tuumman ka, uuri suuje ommos uuri haaggan eheetteey ka ba, a wor Kiriistoki lacheeko. Anna jeentetaase weyti ihamaada. Rumanka la toro oreye isohda weyti hamaada.
[19] I'di tahe wihi an gardi, weysihiin ichoow gargaari Rubey Yeesso Kiriisto isiisso ka, a liisoofura.
[20] Wihi an weyti sugo toro la an khajjeelo intoo rucchul ka laka lakhaanyo ma isikeeno, i'daasenyi toolla ichoow kol tuumman roorro laane sarteey ka Kiriisto weynaacha, jiroteey ommos omootteey eheetteey ka ba.
[21] A mehe ani ka, wihi an ijiro, a Kiriisto. Omootteey la indigirti buurenye ani ikhabta.
[22] Toolla cha'an harrata ka jiro an hili gurnaan delo haaggicha. I'daasenyi mehe goocho? An ma gardi.
[23] Sag lamma liijiita. Anihi irdi Kiriisto leejiro imoona. I'di tahe taase weyti deefta.
[24] I'daasenyi iroonotiin u, weyti khummantahe cha'an jiro.
[25] An wahaase tissiba gone, wihi an gardi, an ma amuute, atin tuumman a atin leefiddiya 'dee hamaadiin ichoow kakhuufnaanki atin Waakh kakhuuftaan kakhayma.
[26] I'da ka fiddihi an atin leefiddiyo ka, jeenteteey u wihi atin Yeesso Kiriisto ka keeylajjaan weyti kakhaymaan.
[27] Walahbaaw soobaho ka, jiroti 'doo'di Wori Haaggane Kiriisto imale jira, 'dee chirra an amiite an atin argo, ommos an iimaatane woriin kalday daago, saggi atin uuroo kalday ka mujjum itolossaan a abdi. Toro la saggi atin maloo kalday ikhabtaane, atin tuumman kakhuufnaanki atin Waakh kakhuuftaane Wori Haaggan keeno hol ikadowtaan a abdi.
[28] Wahaas tuumman ka 'doo'di atin tirrimo ma karoortaan. Waha a sumatti saggi Waakh icho ibaabiicho, i'daasenyi atin iribo tusso. Ki waha tuumman yeelo a Waakh.
[29] Ulla jeente Kiriistuu, rummeysanaanki atin usu rummeysattaan kalday menye, sinati atin taham laka a atin siiche.
[30] A mehe holi goorat an kijire atin agarteen, a ki atin laka kijirtaan. Toro la saggi an toolla laka holaas ikijiro a daagteen.