[1] Atin a nyaakhuti Waakhe us weyti 'doono gone, taba gi'de, fataliis jira.
[2] Wihi atin haaggissaan tuumman ka, 'dooninti atin enenyet 'doontaan a laargo, saggi Kiriisto inno i'doone ichoowka us iroonoteen u jirotiis isoobahchuu. Ulla sadakha ichoow soorriyoti uyuugenye Waakh liibahche yitah.
[3] Atin a 'doo'di Waakhe munyee gone, uus goytiin ka wahanyeyyohi i'dee jirin, 'doo'di isidisanne isleeur'do ommos bi'diri nool ommos suujoonki uurassiin goya kasoobaho ommos 'damaam.
[4] Toro la ma haaggan chirri atin wihi lakhaanyee kaayyeeddaane, ommos atin yeedi indigir ikhabin kaayyeeddaane, ommos chuunki suuje ischuuntaan. Wahanyeyyohaas ma atin imalin. Atinhi wihi Waakh atin iyeele usu kala'd ikalaabtaane haaggan.
[5] Waha tissiba gi'de, eti soho'ddarri kaassohti ommos eti bi'dire ommos eti 'damaame, eti i'dee wihi us 'damaam iyahe waakkhakh kayeessa gone, koo kaldaye dakh Kiriisto ichoow dakhi Waakh mu'dan mele.
[6] Uus etoo kalday laka yeedi ilmarhaatteet ka atin ekkeysan. I'di tahe jeenteti wahanyeyyohi i'dee u, holi Waakh 'doo'di usú iraahin a isoobaha.
[7] Maantaka 'doo'di uskeelaas yeelo awalhinna.
[8] A mehe atin rubeytiin goorat 'hor mug'di eheete, i'daasenyi atin ichoow Kamur wohoo kalday a tahiin gone, banaye titaaheen. Maantaka fatali 'doo'di banaye jira gi'de.
[9] A mehe banayha gurnaanki us delo a haag tuumman ichoow wihi fissan tuumman ichoow wihi rummaat tuumman.
[10] Toro la wihi Kamur kahamaadicho 'don'doona.
[11] Taba wahanyeyyohi 'doo'di mug'di goya kijiro gurnaan idelin i'daaru laka araahina, wihi icho yeelaan 'dow isoobahcha.
[12] I'di tahe a lakhaanyo laka chirri inno wihi icho dagsi ka yeelaan kaayyeeno.
[13] I'daasenyi chirri banay wohoo katoollaan, wahaas wihi icho rumanka yahiin a laarga.
[14] I'di tahe banay walah tuumman wihi icho yahiin a tusaan. Jeentetaase mehe liiessa ya, “Atiha u'durto, sookahe, omoot kasookahe, Kiriisto la banayhiis a atin kiifchaa.”
[15] 'Deerka saggi atin ijirtaan weyti yuubsada. Saggi 'doo'di 'dalammee iijirina, i'daasenyi saggi 'doo'di kharayyee ijira.
[16] Jeenteti waha ibeenneti enenyet uskeel yeelo iyahiin u, ibeenki Waakh atin siicho dakkhan mujjum khaadda, saggi rumanka Kiriisto liiraaho tusa.
[17] Maantaka saggi 'doo'di 'dalammee iijirina, i'daasenyi wihi Kamur atinhi yeessaan 'doono abda.
[18] Taba, farsoti sabiib ka meleefu iitaahana, a mehe jiroti uskeeli buurenye i'daanu layeelo keenaan. I'daasenyi Rubeyti Munyee a atin buuhisso.
[19] I'da ka Sabuuri Yeedi Waakh goya kayimiy ichoow geeyohi Waakh lakasaa'do ichoow geeyohi Rubeyti Munyee atin siisso a iskaleeyyeeddaan. Uurassiin ka Kamur geeyo idowa.
[20] Toro la magah Yeesso Kiriistohi Kamureene ka, kol dakkhan Waakkhi Aabbaheene walah tuumman ka kala'd ilaaba.
[21] Wihi 'da'ddaboot, jeenteti atin Kiriisto iinkaanyittaan u, taba gi'de, af iiskutina.
[22] Deyyeho, taba makhaaballetiin aficho akutina, saggaas atin Kamur afiis ikutin u.
[23] A mehe makhaabal usu matakki makhaabassiise, saggi Kiriisto matakki ururiis iyahuu. Kiriisto la usu ururiiski i'di sartiise 'Doorribehichee.
[24] Toolla saggi urur Kiriisto Kiriisto afiis ikutin u, arame laka walah tuumman ka iiche makhaabaliche afiis kutin.
[25] Makhaaballe taba, saggi Kiriisto ururiis i'doone us jirotiis icho ikasoobahchuu, atin laka oboorrihiin 'doona.
[26] Kiriisto la i'dane yeele, 'dee dikhnaanki us bicche ichoow Yeediis ka dikhe ka ururiis munyaacha.
[27] Toro la i'dane yeele, 'dee berri ururiis tuumman ankiis keena. Urura la a ki ababo, el ikhabine ommos ichamammowine ommos wohoo suuje fool ka ikhabin, i'daasenyi a ki munyeenye toro la wohoo rucchul laka liikacheekan.
[28] Saggaas on u, makhaaballe laka saggaas maanta iche sartiche i'doonto oboorrihiche a i'doonto. Eti makhaabassiis 'doono a is'doona.
[29] A mehe a 'dowe et koloo kalday laka sartiis 'dii'do mele, i'daasenyi ebba sartiis a goollicha toro la lagta. Kiriisto laka ururiis i'da on yeela.
[30] I'di tahe inno a i'di miilassi sartiissa.
[31] Saggi Chiirnaanneti Waakh ka liichiiruu, “Jeentetuu mejel aabbahiis ichoow abartiis a kataba, usu ichoow makhaabassiis la wohoo kalday yateehiine lammacho ba sartoo kalday yateehiin.”
[32] Chiirnaankaas aytoo weyti weene dagsane kaayyeda. I'daasenyi yeedaas ka ani Kiriisto ichoow ururiissa kaayyeeda.
[33] I'daasenyi taba etiin ba saggi us isi'doono makhaabassiis a i'doono, makhaabál la makhaabaliche a inkaanyitto.