[1] Eti tuummane huleesi bow'da si'do Yeesso rummeeste, kamuriis rumanka a inkaanyito, uus 'dee Waakh ichoow woriiski enenyet laabcho liigafine.
[2] Bow'dayyohi kamurreticho Kiriisto rummeysatti, iiche kamurreticho 'darraawin jeenteti icho dakkhan Kiriisto irummeesteen u. Orey a raaheene a ihileen, a mehe 'doo'di hilicho ka indigir 'helo, a ki Kiriisto rummeeste toro la icho 'doonaan. Wahanyeyyoha enenyet abiche, enenyet faajjiye a raaho.
[3] Chirri 'doo'doo wihi us enenyet abcho wihi beenaat yahiine, toro wor Yeesso Kiriistohi Kamureene buusanyahiine, toro la saggi kootte 'doo'd Kiriisto Waakh ikajiro tirrimo,
[4] weyti serey isgeechaane, walah icho gartaan la mele. Malassi suujenye khabaane, wihi ilmarhaatteet on wowworsataane, walah rumenye icho laabaan la mele. Icho la yeedassi jaakh keeno on kahawwoochaan. Waha la kal'darri ichoow hol ichoow me'de'ddeel ichoow imurchoti suuje
[5] ichoow iriirti kol dakkhan islaleeiriiro keenaan. Malassicho a lakheerooche, rum tuumman a lasare. Icho jiroti Waakh liijiro jitoo lakakamurrowo koogyahiin.
[6] I'daasenyi jiroti Waakh liijiro a indigirti buure chirri at wihi at khabto kadaragto.
[7] A mehe walah inno harrata keenne mele, toro la walah inno harrata ka khaatin nabuu'd mele.
[8] I'daasenyi chi'inno golol ichoow gaad khabno geeddaas a kadaragna.
[9] 'Doo'di kamurrowin 'doono, kajmeti uskeel kalugu'ddo ichoow angey ichoow wahanyeyyohi 'dalame liimoono ichoow suujoone kadihaan. Waha la icho a jiitaane ichoowka suujaachaane bar tiraan.
[10] A mehe 'dooninti chilim weyti la'doono iche suujoon tuumman dessa. 'Doo'd gaasoo chilim rirrihaayi ichoowka wori Kiriisto miinsane goorat icho kakhuufaan kabaabeene toro la oytinti buure laka isikeeneen.
[11] I'daasenyi at a eti hili Waakh haaggicho. Maantaka uskeelaas tuumman kafirid. Hol dowe jiroti fissan yowo, jiroti Waakh kahamaado jire, Waakh kakhuufe, 'doo'di addan 'doone, garrahso toro samacchaar ateeh.
[12] Jiroti inno Kiriisto kakhuufne ka dihoti haaggan gel. Jiroti jirtuu imassanne maanti lakiwahe at wihi haaggan 'doo'di ittaawe ortiis ka cheekatte icho la gartiche laabaan jurkhi.
[13] Waakkhi walah dakkhan jiro siicho ortiis ka ichoow Yeesso Kiriistohi goorat Boontiyo Bilaato ortiis ka runtiis cheeke, orcho ka amurane kibahcha.
[14] Raahnaanki at wihi Wori Haaggan kaa'doono at raahto ka, eloo rucchul laka akhabine, ichoowka Yeesso Kiriistohi Kamureene a soonokhti.
[15] Waakh ibeenki goorat us gooche Kiriisto enenyet a tusa. Waha a Waakkhi weeli enenyet tuumman saa'do, enenyet tuumman dakhti, a Karnati karnato kussan, a Kamuri kamurre kussan.
[16] Usu kalday on iumaatane banayhi weyti ababo liikadowwaan goya fiddiya. Et injire arge mele et sooargo la mele. Jirtuu tuumman la inkaanyit ichoow miigti jirtuu imassan a wihiissa. Aamiin.
[17] 'Doo'di wey'dane kamurree amurreta ibihi. Rannyaat akhabina ommos hoolahi harratane dowwa on kuto khajjeel akakhabina, i'daasenyi Waakkhi wihi inno 'doonno tuumman inno siicho 'dee inno jiroti hamaad khabto jirro kakhuufa.
[18] Haag on a yeeleene, haaggaas icho yeelaan ka la kamurre a yitaaheen. 'Doo'di uurnugleel ka walah diibo a yitaaheene, wihi icho khabaan la 'doo'd a leegismeen.
[19] I'da ka jiroti soosohatti ka, i'di tirrinki mujjum min tiiruu, hoolahi rummaat yahay a isigessaane, 'dee jiroti rummaate jirtuu imassan khabaan.
[20] Timooti, wihi Waakh dahantaah soogesse mujjum yaakhi. 'Doo'di yeedi 'dalame inkaanyitoo rucchul laka Waakh ikakhabin ichoow iriirti ilmarhaatteete icho been ka a garanti rummaat essaan nabah iisudin.
[21] 'Doo'd gaasoo garantaase cheeka, jeentetaas u wori Kiriisto miinsane icho kakhuufaan a kabaabeen. Waakh ba kimaala!