[1] Maantaka a atin hawwaasdee kolooraat enenyet tuumman Waakh ihawwaasda, Waakh iwaha, meessicho ka Waakh leeyeyyeeda, Waakh kala'd ilaaba.
[2] Karnato ichoow weynaanti addan tuumman i'dane yeelaane 'dee inno tuumman nebey ichoow roorro laan fiddiina. Toro la 'dee Waakh a karoorro jiroti munyee a jirro.
[3] Waha a haagganyahiine toro la Waakkhi 'Doorribeheene a kahamaadichaan.
[4] A mehe Waakh weeli enenyet tuumman usuhi laribo toro la rum abti 'doona.
[5] I'di tahe Waakkhoo kalday on jira, dahgelehi Waakh ichoow weeli enenyet isineybicho la a koo kalday one, ulla a Yeesso Kiriistohi weeli enenyet eheet.
[6] Yeessoha la i'daanu rubeytiis diibe, ribnaanki weeli enenyet tuumman gute. Omoot Yeesso Kiriisto ka, ibeenki mujjume ka Waakh saggi us weeli enenyet iribo a tuse.
[7] Jeentetane Waakh ani eti Yeedi Waakh cheeko ichoow ergaano ikayeele. Toolla la wihi an cheeko been menye, a yeedi rummaat on. Toro la ani eti wori rummaate Kiriisto miinsan yaafohi Ya'huud ieheynan abcho ikayeele.
[8] Wihi an 'doono, inti atin kakulantaane Waakh kawahattaan tuumman ka, mejel jiroti munyeenye us jiro ka Waakh dahano a ioogo a weesti. Chi'icho weestaan la, iicho uuricho ka hol khabine ommos iriir khabin.
[9] Deyyehoti Waakh ichehi gaaddi mujjumenye inkaanyit tusso gessatti 'doona. Uus iche saggi iche tintiche ihaaggisse ka ommos 'dahab ka ommos irtiyyohi gato miige ka ommos gaaddi gato miige ka 'doo'd istuttusin.
[10] I'daasenyi deyyehoti 'doo'di Waakh istadeeh, wihi lakasooraaho a haaggi iche yeesso.
[11] Deyyeho chirri walah laabcho a gammadisso toro iiche weynaan afiche kutin.
[12] Urur Kiriisto goyaka an deyyeho anto ma siicho, mejel walah ma abisso ommos mejel ma anatti. Deyyeho a gammadisso.
[13] I'di tahe Waakh kolooraat Aadame soouume, saahka Haawwo soouume.
[14] Toro la Aadam menye, arame leekkeeste uskeel yeesse.
[15] I'daasenyi Waakh deyyeho delnaan ka a riba, chi'iche orey isohatti Waakh kakhuufto iche enenyet 'doonto, jiti munyee kafiddiito toro la isjeyisso.