[1] Eti khadaaba kisoochiiro a ani Baawulohi mali Waakh ka ergaano Yeesso Kiriistee. Waakh la i'dane yeele 'dee jiroti jirtuu imassanne us 'doo'di icho ichoow Yeesso Kiriisto ba wohoo kalday yahiin iayyiche enenyet icheeka.
[2] Eti an isoochiiro la a ati Timooti. At la a i'di weeleeyki an weyti 'doono. Waakkhi Aabbaheene ichoow Yeesso Kiriistohi Kamureene ba kimaalaane, uur kisoonugleestaane, toro la nebey kaakaalaan.
[3] An Waakkhi an i'di aacchinyeteey u rubeyti suujoon ikacheekan ka an ifalo kala'd a ilaaba. Maalim ichoow ibeen ba la weysiheey ka ma kaadabo.
[4] Cha'an saggi maanti inno seley bahne at iooyte kasoo'helo, anihi kaargo 'dee hamaadi buure ibuuhicho 'doona.
[5] An saggi at kakhuufnaanki rummaate Kiriisto lakakhuufo ikhabto a kasoo'hela, i'di goorat inkookotaahti Looyis layadeeh ichoow abartaahti Yuunis layadeeh ijireen u. Anna a tissiba at laka a i'dichooda.
[6] Jeentetaas u wihi an kaasoo'helcho kallaayo, tabe siinti Waakhe goytaah kijirto maanti an dahano kikorche at 'hesse weyti ababi.
[7] A mehe Waakh rubeyti bur'dee ma inno siin, i'daasenyi rubeyti miig ichoow 'doonin ichoow isjeyin lehe inno siiche.
[8] Maantaka wihi atin garattaane Kamureen miinsan cheekin akuuryaawina. Ommos wihi anihi jeentetiis u jeela kajiro imiinsan cheekin akuuryaawina. I'daasenyi miigti Waakh ka sinati jeenteti inno Wori Haaggan icheeknuu inno taham ileegisma.
[9] A mehe Waakh rubeytiissa inno ribe toro inno wahe, 'doo'diiski munyee inno kayeele. Waha la jeenteti inno haaggoo iyeelle menye, a wihi goorat usu on gooche, toro la a jeenteti haaggiiski buurenye inno imunneynan on. Haagga Waakh la geeddi harra liisoouumin on innohi inno ichoow Yeesso Kiriisto ba wohoo kalday nahe inno lasiiche.
[10] I'daasenyi Yeesso Kiriistohi 'Doorribeheene a yimiyye, haagga isoobabbakkaahiche. Ulla miigti omooteet a jejjebche, Wori Haaggane us cheeke ka la jiroti jirtuu imassan wihiche a inno abche.
[11] Waakh la Wora Haaggan ka hili Yeedi Waakh lacheeko ichoow ki ergaano ichoow ki enenyet Yeedi Waakh laabcho a ikorche.
[12] Jeentetase toolla ani sina ikawaarta. I'daasenyi ma kalakhaanyeysadi. A mehe eti an rummeesde a garda. Anna waha a tissiba, miigti us wihi an dahantiis gesse us kayaakhicho ichoowka ibeenki 'da'ddaboot yateeh a khaba.
[13] Kakhuufnaanki at Kiriisto kakhuufto ichoow 'dooninti at 'doo'di addan 'doonto ka, wor Yeesso ki rummaate at ikadaagte mujjum jurkhi, a mehe ati ichoow Yeesso Kiriisto ba a wohoo kalday.
[14] Miigti Rubeyti Munyeenye goyteen fiddiito kisiisso ka, wihi haaggane dahantaah lasoogesse mujjum yaakhi.
[15] Saggi at igarattuu, 'doo'di boroofenhi Aassiya kacchiis, Fiigela ichoow Hermagoon khabaani, adah a ikakhabte.
[16] Kamur ba goob Oneesiferas uur isoonugleesta. A mehe us geeddi buure a ikahamaadiche. Maanti an jeela kijire laka, us uur a imiigooche toro ma ikalakhaanyeysan.
[17] Rumanka maanti us ilkerengeetti Rooma soogele, meel tuummane iyeye ichoowka i'hele.
[18] Kamur ba usu gargaara, ibeenki 'da'ddaboot Kamur usu uur isoonugleesta. Geeddi us ilkerengeetti Efeesso ka igargaare rumanka a garatta.