[1] Makhaabali kaaween aleejaakhine, i'daasenyi i'di aabbahaah u uur miigooy. Mejeli nunnugul i'di walaalinyetaah iwoywoy.
[2] Deyyehoti kaawewween i'di abartaah iwoywoye, deyyehoti nunnugul la i'di albehi kileeddesse iwoywoy. Waha la mali haaggane eloo rucchul laka ikhabin kayeel.
[3] Muunkhoyyohi walah ikhabin mujjum inkaanyite wihi icho laayahin sii.
[4] I'daasenyi chi' muunkhotoo nyaakhut khabto ommos hamalo khabto, nyaakhutaas ommos hamalohichekaas koloo goobicho a woywoyeene saggi icho mujjum Waakh iraahaan a abteen. 'Deerka jeenteti icho isooweynaacheen u a guteen. A mehe waha weyti Waakh kahamaadichaan.
[5] Muunkhoti rumanka walah ikhabine, eti yeyo laa, eti iche khajjeel kakhabto a Waakh kaldach on. Iche la ibeen ichoow maalim ba Waakhe wahatta gargaar daahta.
[6] I'daasenyi muunkhoti wihi kahamaadicho on yeesso, chi'iche noossahe laka, a i'doo iche tumuy on.
[7] 'Doo'd amurreta ibihi uus 'dee etoo kalday laka eloo rucchul lakacheekanne.
[8] Eti tuummane goobicho iwoywoyine kach ka la minkicho iwoywoyin, wihi inno kakhuufno a 'dii'de. Eta eti Kiriisto irummeysan laka tabar a dowe.
[9] Muunkhoti magahiche 'doo'di lagargaaro goya lakachiiro a ti gu'h tomon lih 'dirihiche khabto, goorat makhaabaloo kalday on khabte,
[10] toro la a ti jeenteti iche haag iyeessuu enenyet tuumman inkaanyito. Haaggiche a 'dow on. A ti nyaakhuutiche jiti haaggan kasooweynaasse, a ti goobiche ka 'doo'd martiisatte, a ti 'doo'di Waakh i'di ilbooy u luhlo dikhte, a ti 'doo'di sina khabe gargaarte. A ti hili haaggan tuumman isisoobihisse.
[11] I'daasenyi muunkhoyyohi nunnugul achiirin. A mehe 'dee yomboka kolossoo ildeerroti sarticho a geeddi iche anatti icho hil Kiriistoki goorat icho isisoobahcheen 'diichaane, mindischo gelin 'doonaan.
[12] I'da ka la jeenteti icho ayyinti icho 'hor Waakh iayyicheen ijebcheen u sina isigoochaan.
[13] Toro la a ollommowaane, kolba minkoo gelaan. Ollom kalday la menye, enenyet hantaane, yeedassi wihicho ieheynan kaaddihaane, wohoo kootte ikamalin essaan.
[14] Maantaka wihi an 'doono muunkhoyyohi nunnugul toro a ladiso nyaakhut a deleene, goobassicho a woywoyeen. I'da ka chiiytankeen jit us inno kahanti mele.
[15] A mehe gaasichokoo orey on jit bujeene, Seytaan raaheen.
[16] I'daasenyi chirri makhaabassoo Yeesso rummeysatte jirto iche la minkiche ka muunkhoyyohoo khabto, iche muunkhoyyohaas woywoyta uus 'dee urur Kiriisto huleesa lakorinne. I'da ka urur Kiriisto muunkhoyyohi eti gargaaro laa kalday on woywoya.
[17] Ewweenki urur Kiriisto woyo urur mujjum dakhti a imasse chi' liinkaanyito kala'd laguto, kach ka la ewweenki Yeedi Waakh cheeko enenyet walah abcho wahaas a liiyeelo.
[18] A mehe Chiirnaanneti Waakh mehe tadeeh ya, “Heer geeddi us gurnaan yabti 'dargaayye ichoow chaafo ba seley saaho af a hidine, usuhi 'dargaayye yaham atiran.” A mehe Chiirnaanneti Waakh mehe tadeeh ya “Eti hil haaggicho wihiis a laguto.”
[19] Wihi etoo ewweenki urur Kiriisto woyo lakacheekti nabah iisudin sammata et lamma ommos et seyyahe gartaas ilaabin.
[20] Weynaanti uskeel yeesso urur Kiriisto ortiis ka a laleejaakho, 'dee 'doo'di addan uskeeli us yeelo a karooro.
[21] Waakh ichoow Yeesso Kiriisto ichoow herti Waakhe lasoobahsate orche ka amurane kibahcha, tabe waansiha khucchiche, enenyet ekka kawaaniche, wihi at yeesso ka la enenyet asassaahin.
[22] Etoo dowwa on dahan akorinne weynaanti urur Kiriisto woyto akayeelin. I'daas ka uskeelicho ma leegisanto. Ati rubeytaah la mi'dab iskayeel.
[23] I'daasenyi jeenteti uur kibolkho toro at geeddi buure ichocchoorsattuu, bicche kalday uubhaabane, farsotoor sabiib abhuub.
[24] Uskeeli 'doo'd gaasoo yeelo i'daanu laarga, enenyet tuumman la saggi icho liihukkumo a garta. Uskeeli 'doo'd gaasoo la 'dubichooda on sooraaha.
[25] Saggaas u la haaggi enenyet yeelo i'daanu laarga. I'daasenyi chirri haaggi icho yeelaan liiargin laka, ma dagti.