[1] Eti khadaaba kisoochiiro a ani Baawulohi ergaano Yeesso Kiriistee. Ani la Waakkheenki 'Doorribeheene ichoow Yeesso Kiriistohi inno khajjeello iche amuricho ka ergaano ikayeele.
[2] Eti an isoochiiro la, a ati Timooti. Ati jiroti inno Kiriisto kakhuufno ka a weelaaya. Waakkhi Aabbaheene ichoow Yeesso Kiriistohi Kamureene ba kimaalaane, uur kisoonugleestaane toro la nebey kaakaalaan.
[3] Maanti an boroofenhi Makedooniya isohdi a kihawwaasde, ilkerengeetti Efeesso fiddiye kiidah. Efeesso fiddiita 'dee 'doo'di worassi beenaate Waakh miinsan 'doo'd abcho amur ibihissa wahaas a toollicheen.
[4] Toro la 'doo'di hawweesseti beenaat ichoow magahenyeti ittaawenye hiiyyassichooda icho immarah wawwahaan 'diicha itadeeh. Waha la jaakh on keenaane, toro la gargaar icho hili Waakh ikhabaan mele. Wihi hili Waakh indigir ikhabo, a chirri Waakh lakakhuufo.
[5] Jeenteti an waha yeel ikaadeeh la, a i'doo 'dee 'doo'd Kiriisto 'doonin isikhabo. 'Dooninta la inti iche katamiit a uuri eloo rucchul laka ikhabin ichoow rubeyti suujoon inno ikacheekan ichoow kakhuufnaanki rummaate Kiriisto lakakhuufo.
[6] 'Doo'daas wori beenaat enenyet abcho waha dakkhan a buje, hawweesi indigir laa inokhteen.
[7] Icho ichohi tagaammeti amurre Muusa yateehiine 'dee liinkaanyito 'doonaane, i'daasenyi wihi icho kaayyeedaan ma gartaane ommos waha icho roorro laan 'doo'd abchaan wihichekoo rucchul laka ma gartaan.
[8] Inno tuumman a garanna, amurre Muusa a haaggantahe chirri kootte mujjum laraaho.
[9] Inno saggi amurretaas 'doo'di liiyeele ki fiffissan ieheynan laka a garanna. I'daasenyi amurre a ti 'doo'di amurreti Waakh iraahin ichoow ki weynaan iinkaanyitin ichoow ki Waakh igaran ichoow ki uskeel yeelo ichoow ki Waakh ikahamaadin ichoow ki Waakh iinkaanyitin ichoow ki 'doo'di dele bakkicho ichoow ki diig gelo.
[10] Toro la amurre a ti 'doo'di isidisanne isleeur'do ichoow mejeli isleeur'do ichoow 'doo'di enenyet ororsati ichoow 'doo'di been leh ichoow ki garti beenaat cheeko ichoow wihi tuummane wori mujjumenye Waakh buusan.
[11] Woraas mujjume ichoow Wori Haaggane weynaanti Waakkhi lasaa'do tusso us ikorche a israahaan.
[12] An Yeesso Kiriistohi Kamureene weyti kala'd ilaaba. Us a imiigooche toro eti lakakhuufo iekkaache, hiliis ikorche.
[13] An goorat 'hor usu a igafe, 'doo'diis sina omhiche, 'doo'diis leeabaarrame. Eheetteey laka Waakh uliba uur a isoonugleeste. Ulla jeenteti an Kiriisto ikakhuufine, wihi an yeele igaran, iche i'da iyeele.
[14] Kamureen la haaggiiski buurenye an imunneynan weyti ituste. Toro la Yeesso Kiriisto ka, kakhuufnaanki an Waakh kakhuufo ichoow 'dooninti an 'doo'd 'doono a isiiche.
[15] Yeesso Kiriisto harratane yimiyye 'dee 'doo'di uskeel leh riba. Waha a ayti rummaate kootte incheenka tuum lakakhuufo. Ani rubeytey la 'doo'di uskeel leh goyaka, eti kuto eheet.
[16] I'daasenyi jeentetane Waakh ani uur isoonugleeste, 'dee anihi uskeel ka enenyet tuumman kuto, Yeesso Kiriisto walahbaaw an yeele ka samacchaari imassan ituse. Ulla ani a isamacchaare 'doo'di addane usu soorummeesti jiroti jirtuu imassan 'helo iyookko ikayeele.
[17] Toollaka Karnati jirtuu tuumman jiro, jirtuu iumaatane, indo ka liiargine, Waakkhi keleye, jirtuu tuumman a liinkaanyito toro la a lasaa'do. Aamiin.
[18] Timooti, weelaaw, amura an kisiicho ichoow wori kimiinsane goorat 'doo'di Waákh íyeyyeedo cheeke kisoobaho, a israahaan. Amurane kisiicha 'dee woraas at raahto ka, dihoti haaggan gessa,
[19] orey isohatta, Kiriisto kakhuufta, kol dakkhan la rubeyti suujoon ikaacheekan jurkhissa. A mehe 'doo'd gaasoo wahanyeyyohaas a 'dii'de. Jeentetaas u la kakhuufnaanki icho Waakh kakhuufaan a suujaacheen.
[20] Goycho la a Hamenaaya ichoow Alekisaanda. An icho dahanohi Seytaane gesse, 'dee Waakkhi liikagafin laabcha.