[1] Chi' etoo weyti urur Kiriisto yaakhin 'doono, eta hili khummane 'doona. Yeeda i'da yadeeh a lakakhuufa.
[2] Wihi Waakh gooche, eti urur Kiriisto yaakhicho a eti eloo rucchul laka liikacheekanne, makhaabassoo kalday on khabo, wihi us yeelo tuumman ka isjeycho, inkaanyit khabo, goobiis ka 'doo'd martiisti, 'doo'd Kiriisto walah abin yabuu'd.
[3] Toro la eti meleefee mee, eti enenyet jaho menye, i'daasenyi a eti samacchaare. Eti jaakh leh mee, eti chilim 'doono mee.
[4] Toro la a eti goobiis mujjum dakhti, nyaakhutiis inkaanyit ka yeediis daago.
[5] I'di tahe eti goobiis dakh igaran, saggoh urur Kiriisto idakhta?
[6] Toro la eti inkoo dow Yeesso rummeeste mee. Jeenteti dowwa on liisoobahchuu a geeddi us weyti serey isgeecho, i'di Seytaan u lahukkumo.
[7] Toro la a eti 'doo'di kharaate Yeesso irummeysan ka laka magahi haaggan khabo. Uus 'dee lakhaanyo keenine, angeyi Seytaan geline.
[8] I'daas on u toro wihi Waakh gooche, 'doo'di urur Kiriisto gargaaro laka a 'doo'di liinkaanyito, ki iskaayyeelo mee, ki farsoti sabiib khaatto mee, ki anki chilim ka 'damaame mee.
[9] Rubeyti suujoon inno ikacheekan ka, a 'doo'di wori dagsane rummaate Kiriisto miinsane Waakh enenyet isoobabbakkaahiche kakhuufo.
[10] Toro la koloo jiroti icho Kiriisto goyaka jiraan a lafiiricho. Chirri wohoo rucchul laka liikacheekan 'deerka hili 'doo'd lagargaaro a geleen.
[11] Saggaas on u deyyehoticho laka a deyyehoti liinkaanyito, enenyet ime'de'ddeeline, i'daasenyi walah tuumman ka isjeyisso, walah tuumman ka lakakhuufo.
[12] Toro la eti urur Kiriisto gargaaro a eti arantoo kalday on khabo, nyaakhutiis ichoow goobiis ba saggi mujjume idakhti.
[13] I'di tahe 'doo'di hili urur Kiriisto lagargaaro mujjum kajiro kala'ddi laguto a inkaanyite, toro la wori Yeesso Kiriisto lakakhuufo miinsan roorro laan cheekin a yabuu'diin.
[14] Cha'an dowwanoha ka kisoo'daarin khajjeelo laka, wahanyeyyohane kisoochiira.
[15] I'daasenyi chi' wohoo imalmalicheen laka, khadaaba a kisoochiira, 'dee jiroti innohi ururi Waakhe incheenka jirro abatta. Urura Waakh a ki Waakkhi jirtuu tuumman jiro, a tirrim ichoow daddaabohi ilaate runti Waakh tiiro.
[16] Rumanka runti dagsaneete Waakh miinsane Waakh inno isoobabbakkaahiche a weentahe. Kiriisto harrata saggi weeli enenyete iyimiyye, Rubeyti Munyee la saggi us ifissanyahe enenyet tusse. Herti Waakh usu a agarte. Woriis yaafohi Ya'huud ieheynan goyaka lacheeke, 'doo'di ittaawenye harra usu rummeeste, goobi Waakh liikorche.