[1] Rubeyti Munyee saggi ibeenneta 'da'ddaboot ka 'doo'd gaasoo Kiriistohi us kakhuufo ikatabo a cheekta. Toro 'doo'di rubeyohoo woyaane enenyet ekkeesti iche yeedicho raahaane toro la wihi ginnayyo enenyet abchaan laka raahaan.
[2] Worassi i'dee inti icho kayamiitiin a 'doo'di iskaayyeelo beeno leh. Rubeyohichoki haag ichoow suujoon seley saaho a i'doo ga'daari kuleele ka lakobdaaddinooche.
[3] 'Doo'da mindischo enenyet tirta. Toro la gololleti Waakh on sooumhe 'doo'di Kiriisto rummeeste rum abte kootte Waakh kala'd ilaabo isleeyaham enenyet uumhana idowa.
[4] I'daasenyi wihi Waakh sooumhe tuumman a haagganyahiine, walah tuumman la chirri Waakh on kala'd liilaabe walah la'dii'do mele.
[5] A mehe Yeedi Waakh ichoow weysi ba wahaas a munyaachaan.
[6] Chirri at 'doo'di Kiriisto rummeeste waha kawaanisso, at ilbooy Yeesso Kiriistoki haaggane tateeh. Toro la kol dakkhan wori rummaate Kiriisto miinsan ichoow haaggi lakaasooweynaache at raahto rubeytaah ka miige kisiichaan.
[7] Hawweesseti Yeedi Waakh buusan ichoow ti 'dalam ba kaseeh. Isjeyiche 'dee jiroti Waakh kahamaado jir.
[8] A mehe sarti lajeycho indigirtoo rucchul on khabta. I'daasenyi jiroti Waakh kahamaado lajiro, walah tuumman indigire ikhabta. Jiroti toolla ichoow ti soosohatti ka, jiroti Waakh kiayyiche jirta.
[9] Mammahtaas an idah a ti lakakhuufo kootte incheenka tuum lakhaatti.
[10] Jeentetuu la weyti hol downa, tirriinsanna, jeenteti inno Waakkhi jiro khajjeel ikakhabnuu. Waakkha la a 'Doorribehi enenyet tuummane, kach ka la 'doo'di usu rummeeste.
[11] Wahanyeyyoha la 'doo'd abiche toro amurre a raaheen.
[12] Uus etoo kalday laka jeenteti at inugussahuu ki'darraawin. I'daasenyi yeedi afaah kasoobaho ka ichoow jiroti at jirto ka ichoow 'dooninti at enenyet 'doonto ka ichoow kakhuufnaanki at Kiriisto kakhuufto ka ichoow jiroti el ikhabine at jirto ka, 'doo'di Kiriisto rummeeste iyookko iateeh.
[13] Ichoowka an amiit, geeddi at tabuu'd hol dowe, Chiirnaanneti Waakh 'doo'd Kiriisto isoome, uur miigooche toro la wori Waakh abi.
[14] Siintaahti maanti ewweenki urur Kiriisto woyo dahano kikorche wori Waakhe lakaayyeedo at ka'hesse akadabin.
[15] Geeddi at tabuu'd wahanyeyyoha an kiidah raahe, tuum isisoobihiche, 'dee 'doo'd tuumman saggi at orey ikasohatti a argo.
[16] Kol dakkhan jirotaah ichoow wihi at 'doo'd abisso yaakhiche, weyti la goya yey. Cha'at waha yeesso, a isribta 'doo'di kidagansati laka ribta.