[1] Wihi 'da'ddaboot 'doo'd Kiriistokaaw, Waakh nah isoowaha, 'dee wor Kamureen dowwa a taa'ho, inti us eleelo tuumman ka a liinkaanyito i'di maanti goorat us atin sooeleele u.
[2] Toro la Waakh nah isoowaha, Waakh a nah gargaaro, 'doo'di weyti sussuuje a nah karibo. A mehe 'doo'di buure mee Yeesso kakhuufo.
[3] I'daasenyi Kamureen a lakakhuufa. Us rubeyohiin a miigoocha, toro la Seytaanki uskeel leh atin kahossa.
[4] Kamur a kakhuufna, atin amuri nah atin ibihinne mujjum a raahtaane, toro la orey a isohattaan one raahtaan.
[5] Kamur ba uurassiin woya, 'dooninti Waakh atin 'doono geeddiche ichoow garrahsihi Kiriisto lakeelo tuum abattaan.
[6] 'Doo'd Kiriistokaaw, anto Yeesso Kiriistohi Kamure ka amurane atin ibihinna, taba eti tuummane Kiriisto rummeeste ollomenye, jiroti wihi nah atin abinne miinsan ijirin kaseeha.
[7] A mehe atin rubeytiin saggi kootte atin dabateenyo isooraahtaan a garattaan. Maanti nah atin leejirre, nah ollomme ma eheynan.
[8] Ommos et i'daanu nah goolliche mele, maalim ichoow ibeen ba hile haaggine, hol downe, saggoo 'dee nah etiinkoo kalday laka huleesoo addan ikorin yeelle.
[9] Waha jeenteti icho munnaanteenyo ieheynan mee iyeeliwwaayne. I'daasenyi i'doo 'dee atin laka dabateenyo isooraahtaane yeella.
[10] A mehe maanti goorat nah atin leejirre laka, amurane atin siinne, “Eti hil ihaaggin agoollinna.”
[11] Mehe daagna ya goytiin ka 'doo'di ollommeenye jira. Icho hilicho ma haaggichaane, toro hili 'doo'di addane kaaddihaan.
[12] Magah Yeesso Kiriistohi Kamure ka, 'doo'di jiroti i'dee jiro amuri nah ibihinno ichoow wihi nah daahno a waha, taba nebey kafiddiya, hil haaggicha, 'dee gololiin 'hela.
[13] I'daasenyi 'doo'd Kiriistokaaw, atin la taba haaggi atin yeessaan akakurmina.
[14] Chi' etoo wihi nah khadaaba ka atin abinne iraahin, etaas isicheeka kaseeha, 'dee lakhaanyo a khaatatti.
[15] I'daasenyi chiiy iekkaanna, i'di walaal u tootoocha.
[16] Maantaka Kamuri nebey leh rubeytiis ba walahbaaw atin isoobaho ka, kol dakkhan nebey atin kahida. Kamur ba atin tuumman atin leejira.
[17] Eti bariitota dahantiis kasoochiiro a ani Baawulo. Wahaas a saggi an ichiiro, a sumatti an khadaabbeteey tuumman gesso, khadaabbeti 'doo'di addan kayeerarroosso.
[18] Yeesso Kiriistohi Kamureene ba atin tuumman atin imaala.