[1] Wawakuna, tayta-mamaykichista Señorpi kasukuychis. Chay kasukuyniykichisqa chaninpunin.
[2] Promesayoq ñawpaq kaq kamachikuyqa kay hinatan nin: ‘Tayta-mamaykita allinpaq qhawariy,’ nispa. (Deut. 5:16)
[3] Nillantaqmi: ‘Chay hinapin allillan kasunki. Hinallataq hallp'a pachapipas unayta kawsakunki,’ nispa. (Exo. 20:12; Deut. 5:16)
[4] Qankunapas taytakuna, amapuni wawaykichistaqa k'arakta phiñachiychischu. Aswanpas Señorpi chanin kaqta yachachispa, hinallataq Señormanta yachachispa, paykunata uywaychis.
[5] Qankunapas kamachikuna, kay pachapi patronniykichiskunata manchakuywan, khatatataywan, hinallataq cheqaq sonqo kaywan, Cristota hinapuni kasukuychis.
[6] Wakin runakunaqa, patronninkuta kusichinallankupaqmi ruwanku. Qankunaqa ama patronniykichispa rikusqallanchu ruwaychis. Aswanpas, Cristoq kamachinkuna hina, tukuy sonqomanta, Diospa munayninta ruwaychis.
[7] Ama runakunatapas serbishawaqchis hinachu, aswanpas Señortapas serbishawaqchis hina, sonqomantapuni serbiychis.
[8] Sapanka runa, kamachi kaspapas, otaq mana kamachi kaspapas, allin kaqta ruwasqanman hina, Señormanta chaskikapunantaqa yachankichismi.
[9] Qankunapas patronkuna, chay hinallatataq ruwaychis. Amaña kamachiykichiskunata manchapachispachu kashaychis. Hanaq pachapi kashaq Señorniykichisqa, paykunaqpas Señornillankutaq kasqantaqa yachankichismi. Paypa ñawpaqenpiqa, wakinta allinpaq, wakintataq pisipaq qhawariyqa manan kanchu.
[10] Chaymantapas wawqe-panallaykuna, Señorpi, hinallataq kallpanpa atiyninpi kallpachakuychis.
[11] Saqra yuyaysapa kayninwan q'otukuq toqllata churaqtin, qaqata sayayta atinaykichispaq, Diospa llapallan armankunawan p'achallikuychis.
[12] Manan yawarniyoqpa, nitaq aychayoqpa kontranpichu maqanakuyninchisqa kashan. Aswanpas umalliqkunaq, atiyniyoqkunaq, hinallataq kunan tiempo tutayaq pachapi kamachikuqkunaq kontranpin maqanakushanchis. Hinallataq, hanaq pacha cheqaskunapi mana allin kaq askha espiritukunaq kontranpin maqanakuyninchisqa kashan.
[13] Chayrayku, Diospa llapallan armankunata hap'iychis. Hinan mana allin p'unchaykunapi qaqata sayayta atinkichis. Hinaspataq llapanwan p'achallikuspaykichis, qaqata sayashaspallapuni kashaychis.
[14] Sinturaykichistapas, cheqaq kay chumpiwan chumpikuspa, hinallataq chanin kay korasawan p'achakuspa, qaqata sayashaspallapuni kashaychis.
[15] Hinallataq, chakiykichispas thak kay allin willakuyta willanaykichispaq, husut'asqallapuni kashachun.
[16] Llapanmantapas aswantaraqqa iñiypa eskudonta hap'iychis. Chaywanmi, mana allin kaqpa llapan yawrashaq ninayoq flechankunatapas thasnuytaqa atinkichis.
[17] Qespikuy kaskutapas hap'iychis. Hinallataq Espírituq espadanta hap'illaychistaq. Chay espadaqa, Diospa siminmi.
[18] Tukuy tiempopipas, Espiritupi Diosman tukuy parlaywan, hinallataq mañakuywan, Diosman parlaspallapuni kashaychis. Chaypaqtaq tukuypipas rikch'ashaspalla, ama sayk'uywan llapan t'aqasqakunapaq mañakuspallapuni kashaychis.
[19] Ñoqa, simiyta kichariqtiy, imachus rimanaypaq qosqa kawananpaq mañapuwaychis. Hinaspataq, pakasqa yachay allin willakuyta mana manchakuspay reqsichisaq.
[20] Chayraykun kadenawan kadenasqa, Cristoq rantinpi kamachisqa kani. Chaymi mana manchakuspay, imaynatachus ñoqaqa paymanta rimarinay, chay hinatapuni rimarinaypaq mañapuwaychis.
[21] Ichaqa qankunapas, ñoqamanta yachanaykichispaqqa, imaynachus llank'asqay kashasqantapas, imatachus ruwashasqaytapas Tikikoñan llapanta willasunkichis. Payqa munasqa wawqeymi, hinallataq Señorpa llank'ananpi hunt'aqpunin.
[22] Paytan ñoqaykumanta yachanaykichispaq, hinallataq sonqoykichista sonqochaykunanpaq qankunaman kachamurqaykichis.
[23] Wawqe-panakunapaq thak kay kachun. Dios Yayaq, hinallataq Señor Jesucristoq partinmanta, iñiyniyoq munakuypas paykunapaq kachun.
[24] Mana tukukuq munakuywan, Señorninchis Jesucristota llapallan munakuqkunawan allinpaq qokuy kachun. Ahinapuni kachun.