[1] Chay hinaqa, Diospa munakusqan wawankuna hinapuni payta qatichikuychis.
[2] Cristopas munakuwaspanchismi, pay kikinta ñoqanchisrayku Diospaq ofrenda, hinallataq sumaq q'apashaq sakrifisio hina hap'iykuchikurqan. Chay hinallatataq qankunapas munakuypi puriychis.
[3] Qankunaqa t'aqasqakunan kankichis. Chayrayku, qhellipi puriypas, tukuy aycha kuerpo mana watakuypas, hinallataq qolqe sonqo kaypas qankunapurapiqa amapuni rimarikullachunpaschu.
[4] Amataq mana allin ruwaykunatapas ruwaychisñachu. Nitaq millay simi rimaykunatapas, nillataq asichikuq qhelli rimaykunatapas rimaychisñachu. Tukuy chaykunaqa manan allinchu. Aswanpas grasias qoy simikunallataña rimaychis.
[5] Manan mayqen qhellipi puriqpas, aycha kuerpo mana watakuqpas, nitaq idolota yupaychaywan ninakuq qolqe sonqopas, Cristoq hinallataq Diospa qhapaq suyunpi erensiata chaskinqakuchu. Chaykunatan qankunaqa allintapuni yachankichis.
[6] Amapuni piwanpas yanqa simikunawanqa q'otuchikuychischu. Chaykunahawan, mana kasukuqkunaman Diospa k'arak phiñakuyninqa chayamun.
[7] Chayrayku, ama paykunaq ruwaysikuqmasinkuqa kaychischu.
[8] Ñawpa tiempopiqa laqha-tutayaqmi karqankichis. Kunantaq ichaqa, Señorpi k'anchayña kapunkichis. ¡Chayrayku, k'anchaypi kashaq runakuna hinapuni puriychis!
[9] Espírituq ruruyninqa llapan qoykukuq kaypi, chanin kaypi, hinallataq cheqaq kaypin kashan.
[10] Imachus Señorta kusichiq kasqantaqa allintapuni t'aqwiychis.
[11] Laqha-tutayaqpi kashaq runakunaq yanqa ruwasqankutaqa amapuni ruwaysikuychischu. Aswanpas sut'iman horqoychis.
[12] Paykunaq pakallapi ruwasqankuqa rimarinapaqwanpas p'enqakuyraqmi.
[13] K'anchaytaqmi llapantapas sut'iman horqoqqa. Chayrayku tukuy imaymanakunapas k'anchaypa sut'iman horqosqanñan kapun.
[14] Chaymi Qelqaqa nin: ‘¡Qan puñushaq rikch'ariy. Wañusqakunapuramanta sayariy. Hinan Cristo k'anchaykusunki!’ nispa. (Isa. 60:1)
[15] Ama mana yuyayniyoqkuna hinaqa puriychischu. Aswanpas yuyaysapakuna hina, imaynatachus purishasqaykichista makillapuni qhawakuychis.
[16] Kay p'unchaykunaqa mana allin kasqanrayku, tiempotaqa amapuni usuchiychischu.
[17] Chayrayku ama mana yuyayniyoqqa kaychischu. Aswanpas imachus Señorpa munaynin kasqanta entiendiychis.
[18] Amataq binowanqa machaychischu. Chaypiqa imaymana mana allin ruwaykunan kan. Aswanpas ñawpaqtaraqqa, Santo Espirituwan hunt'aykusqa kaychis.
[19] Hinallataq qankunapurapi salmokunawan, yupaychana takikunawan, espiritual kaq takikunawan rimapayanakuychis. Sonqoykichispipas Señorman takiychis, hinallataq yupaychaychis.
[20] Señorninchis Jesucristoq sutinpi, Dios Yayaman llapanmanta grasiastaqa qoshallaychispuni.
[21] Diosta manchakuspa, hukkunahukkunawan kasunakuychis.
[22] Kasarasqa warmikunaqa, Señorman hinapuni, kikinkuq qosankuman kasukuchunku.
[23] Imaynan Cristoqa iñiq t'aqaq uman, pay kikillantaq chay kuerponta qespichiqpas, chay hinallataqmi qosaqa warmiq uman.
[24] Imaynan iñiq t'aqapas Cristoman kasukuspa kashan, chay hinallatataq kasarasqa warmikunapas tukuypi qosankuman kasukuchunku.
[25] Imaynan Cristopas iñiq t'aqata munakurqan, hinallataq iñiq t'aqarayku pay kikinta hap'iykuchikurqan, chay hinatapuni qosakunapas kikinkuq esposankuta munakuchunku.
[26] Chay hinapin iñiq t'aqaqa, Diospa simin unuwan llimphuy-llimphuy mayllisqa ch'uyapuni kanqa.
[27] Chay hinapin k'ancharishaq iñiq t'aqata mana qhelliyoqta, mana ch'awisqata, nitaq chay hinaman rikch'akuqta, pay kikillanmantaq qayllaykuchinqa. Hinan iñiq t'aqaqa ch'uya, hinallataq mana qhelliyoq kanqa.
[28] Chay hinallataq qosakunapas esposankuta, paykunaq kikin kuerponkuta hinapuni munakuchunku. Pipas esposanta munakuqqa, pay kikintan munakun.
[29] Imaynan Cristopas iñiq t'aqata mikhuchin, hinallataq kuidan, chay hinallataqmi, mana hayk'aqpas kikinpa aycha kuerpontaqa mayqenpas cheqnikunchu. Aswanmi mikhuchin, hinallataq kuidan.
[30] Cristoq kuerponmanta, aychanmanta, hinallataq tullunmanta miembronkunan kanchis.
[31] Qelqapas ninmi: ‘Chayraykun runaqa taytantapas, mamantapas saqepunqa. Hinan esposanman hukllachaykakapunqa. Iskayninkutaqmi ch'ulla aychallaña kapunqaku,’ nispa. (Gen. 2:24)
[32] Chay pakasqa yachayqa may hatunmi. Ñoqataqmi ichaqa, chayta nispayqa, Cristomanta, hinallataq iñiq t'aqamanta nini.
[33] Chay hinallataq qankunapas qosakuna, sapanka hukniykichis esposaykichistaqa, kikiykichista hinapuni munakuychis. Hinallataq esposakunapas qosankuta respetachunku.