[1] Chaykunahawan, ñoqa Pabloqa, qankuna, mana-judío runakunarayku Cristo Jesuspi preso kashani.
[2] Cheqapaqpunin, qankunaq allinniykichispaq Diosqa allinpaq qokuyninta qhawaspa llank'anaypaq qowasqantaqa uyarirqankichisña.
[3] Imaynan ñawpaq pisillapi qelqamurqani, chayman hinan, kay pakasqa yachayta rikuchiypi Diosqa sut'inchawarqan.
[4] Chay hinaqa, chayta ñawinchaspaykichisñan, Cristomanta pakasqa yachayta imaynatachus entiendisqayta reparayta atinkichis.
[5] Ñawpa runa-miray tiempokunapin runakunaq churinkunaman kay pakasqa yachayqa mana reqsichisqachu karqan. Kunan tiempopitaqmi ichaqa, t'aqasqa apostolkunaman, hinallataq Diospa rantinpi rimaqkunamanpas Espírituq chawpinta rikuchisqaña kapun.
[6] Pakasqa yachayqa kaymi: Allin willakuypa chawpintan, manajudío runakunaqa, judío runakunaq erensiata chaskiqmasin kapunku. Hinallataq Cristoq kikin kuerponpipuni miembromasin kapunku. Hinallataqmi Cristopi promesata chaskiqmasin kapunku.
[7] Chayllamantataqmi ñoqapas allin willakuypa llank'aqnin kapuni. Chaytan Diosqa, allinpaq qokuynin qosqa kawasqanman hina qoykuwarqan. Chayqa atiyninpa ruwasqanman hinan ñoqaman qosqa kawarqan.
[8] Ñoqaqa llapan t'aqasqakunamantapas aswan huch'uyllan kani. Ichaqa Cristoq mana yupay atiy qhapaq kayninmanta, mana-judío runakunaman willanaypaqmi kay allinpaq qokuyqa qosqa kawarqan.
[9] Pakasqa yachaypa llank'aspa qhawayninta llapaman sut'inchanaypaqmi, kay allinpaq qokuyninta Diosqa qowarqan. Chay pakasqa yachayqa, tukuy imaymanakunatapas kamaq Diospin wiñay-wiñaymantaraq pakasqa karqan.
[10] Chay hinapin, Diospa imaymananiraq yachayninta, iñiq t'aqaq chawpinta, hanaq pacha cheqaskunapi umalliqkunapas, kamachikuqkunapas kunan reqsinqaku.
[11] Chaykunataqa Diosmi, Señorninchis Cristo Jesuspi wiñaymantapacharaq yuyaykusqanman hina ruwarqan.
[12] Cristo Jesuspi iñisqanchispa chawpintan, mana manchapakuspa, hinallataq mana iskayrayaspa Diosman asuykuyninchisqa kapuwanchis.
[13] Chay hinaqa, qankunaraykun ñak'arishani. Chay ñak'ariyniykunahawa ama pisipanaykichispaqmi balikuykichis. Chayqa, qankunaq allinpaq qhawarisqa kanaykichispaqmi kanku.
[14] Chay hinaqa, chaykunaraykun, Señorninchis Jesucristoq Yayanpa ñawpaqenpi qonqoriykukuni.
[15] Paymantan llapa familiakuna, hanaq pachapi kaqkunapas, hallp'a pachapi kaqkunapas, sutitaqa chaskinku.
[16] Chay hinapin, Diospa k'anchariyninpa qhapaq kayninman hina, paypa atiyninwan, Espiritunpa chawpinta espirituykichispi kallpachakuyta qosunkichis.
[17] Hinan iñiyniykichispa chawpinta Cristoqa sonqoykichispi tiyakunqa. Chay hinapin, munakuypi saphichasqa, hinallataq teqsichasqa kankichis.
[18] Chay hinapin qankunaqa, llapan t'aqasqakunawan kuska, Cristoq munakuyninta yuyayniykichispi hunt'asqapipuni entiendinkichis. Munakuyninqa kinrayninmanpas, wask'anmanpas, sayayninmanpas, hinallataq ukhunmanpas ancha hatunpunin.
[19] Hinallataqmi llapan yachaykunata atipaq Cristoq munakuyninta reqsinkichis. Chay hinapin, Diospa lliw Dios kayninwan hunt'aykusqapuni kankichis.
[20] Mañakusqanchismantapas, otaq yuyaykusqanchismantapas llapan imaymanakunata aswan askhapiraq qowananchispaq Diosqa atiyniyoqpunin. Ñoqanchispi atiyninpa ruwasqanman hinan chaytaqa ruwan.
[21] Iñiq t'aqapipas, Cristo Jesuspipas, llapan runa-miraykunapipas, wiñay-wiñaypaq Diosllamanpuni yupaychayqa kachun. Ahinapuni kachun.