[1] Ñoqa Pablon, Diospa munayninman hina, Jesucristoq apostolnin kani. Hinan Éfeso llaqtapi t'aqasqa kaqkunaman, hinallataq Cristo Jesuspi iñiqkunamanpas napaykamuykichis.
[2] Dios Yayanchispa, hinallataq Señor Jesucristoq allinpaq qokuyninpas, thak kayninpas qankunawanpuni kachun.
[3] Señorninchis Jesucristoq Yayan Diosqa saminchasqapuni kachun. Paymi Cristopi tukuy espiritual saminchaywan hanaq pacha cheqaskunapi saminchawarqanchis.
[4] Payllataqmi, kay pachapas manaraq kamasqa kashaqtin, paypa ñawpaqenpi t'aqasqa, hinallataq mana qhelliyoq kananchispaq, Cristopi akllakuwarqanchis.
[5] Munakuywantaq imaynatachus munan, chayman hina Jesucristoq chawpinta wawachakapuspa wawan kananchispaq ñawpaqmantapachaña t'aqawarqanchis.
[6] K'ancharishaq allinpaq qokuynin yupaychasqa kananpaqmi, chaytaqa ruwarqan. Chay allinpaq qokuyninwantaqmi munakusqan Churinpi yanqallan saminchawarqanchis.
[7] Churintaqmi, qhapaq allinpaq qokuyninman hina, huchanchiskunata pampachaspa yawarninwan rantipapuwanchis.
[8] Hinan ñoqanchispaq tukuy yuyaysapa kaypipas, hinallataq tukuy yachaypipas allinpaq qokuyninta llimp'arichin.
[9] Hinallataqmi Diosqa pakasqa munaynintapas, imaynatachus munasqanman hina Cristopi reqsichiwarqanchis.
[10] Diosmi hanaq pachapi kaqkunatapas, hallp'a pachapi kaqkunatapas Cristo kamachikunanpaq huñupunqa. Chay hinapin Diospa wakichisqan tiempoqa, tiemponpi hunt'akunqapuni.
[11] Cristollapitaqmi Diosqa ñawpaqmantapacharaq, munasqanman hina, wakichisqa erensiata chaskinanchispaq akllakuwarqanchis. Hinan payqa, munayninpa yuyaychasqanman hina, tukuy imaymanakunatapas ruwanpuni.
[12] Ñoqaykun Cristopi ñawpaqtaraq suyakurqayku. Chay hinapin, ñoqaykuq chawpiykuta, k'anchariyninpas yupaychasqa kanqa.
[13] Payllapitaqmi qankunapas cheqaq simikunata uyarispa, qespi- kunaykichispaq kaq allin willakuypi kreerqankichis. Chaymi, paypi iñispa, prometisqan Santo Espiritunwan sellosqa kapunkichis.
[14] Kikin Santo Espirituqa, erensianchis chaskinanchispaq, garantianchismi. Diospa kaqkunata rantipapunanpaq garantiata qoqpas payllataqmi. Chaykunataqa, k'anchariyninpi yupaychasqa kananpaqmi ruwan.
[15] Chay hinaqa, chaykunaraykun, ñoqapas Señor Jesuspi iñiyniykichismantawan, llapallan t'aqasqakunapaq munakuyniykichismantawan uyarirqani.
[16] Hinan Diosman parlayniykunapi qankunamanta yuyarispayqa, grasiasta qospay manapuni sayk'unichu.
[17] Señorninchis Jesucristoq k'ancharishaq Dios Yayan, espiritual yachayta, hinallataq rikuchiyta qonasunkichispaqmi mañakuni. Chay hinapin payta allintapuni reqsinkichis.
[18] Hinan sonqoykichista k'anchaykunasunkichispaq mañakullanitaq. Chay hinapin, waqyakuyninpa suyakuynin imaynachus kasqantaqa yachankichis. Hinallataq t'aqasqakunapi erensiaq k'anchariyninpa qhapaq kaynin maychus kasqantapas yachallankichistaq.
[19] Hinallataq may hina niraq hatun atiynin ñoqanchis iñiqkunapaq kasqanta yachanaykichispaqmi mañakuni. Paypa atiyninqa kallpasapa ruwayninpa kayninman hinapunin.
[20] Diosmi, chay kallpanpa chawpinta Cristota wañusqakunapuramanta kawsarichimpurqan. Chay hinallataqmi, hanaq pacha cheqaskunapi paña ladonman tiyaykuchirqan.
[21] Llapan umalliqkunaqpas, kamachikuqkunaqpas, atiyniyoqkunaqpas, munayniyoqkunaqpas patanmanmi tiyaykuchirqan. Manataqmi kay tiempollapichu, aswanpas hamuq tiempopi llapa chay sutikunaq patanmanpunin tiyaykuchirqan.
[22] Llapan imaymanakunatapas Diosqa Cristoq chakinpa pachanmanmi churarqan. Hinallataq, llapan imaymanakunaq umalliqnin kananpaqmi iñiq t'aqaman paytaqa qorqan.
[23] Chay iñiq t'aqaqa paypa kuerponmi. Llapan imaymanakunata, llapanpi hunt'aykuqpa hunt'a kayninqa, chay kuerpollantaqmi.