[1] Chay hinaqa, Señorhawan ñoqaqa preso kashani. Chaymi, imayna waqyakuywanchus waqyasqa karqankichis, chayman hina Señorpa waqyasqankuna hinapuni purinaykichispaq balikuykichis.
[2] Tukuy huch'uyaykukuywan, llamp'u sonqo kaywan, hinallataq pasiensiaykukuywan, hukkuna-hukkunawan munakuypi pasiensiaykunakuychis.
[3] Thak kayman k'askakuspa, Espírituq hukllachasqanta k'uchillapuni waqaychaychis.
[4] Imaynan ch'ulla suyakuyllaman waqyasqa karqankichis, chay hinallataqmi ch'ulla kuerpolla, hinallataq ch'ulla Espiritulla kashan.
[5] Hinallataq ch'ulla Señorlla, ch'ulla iñiylla, ch'ulla bautismolla kashan.
[6] Ch'ulla Dios Yayallan llapapaq kashan. Paymi llapallata kamachin. Llapapaqpas Payllataqmi. Hinan Payqa, llapapi kashallantaq.
[7] Ichaqa, sapanka hukninchismanmi, allinpaq qokuy qosqa karqan. Diosqa, Cristoq tupusqanman hinan, qokuyta qowarqanchis.
[8] Chaymi Qelqaqa nin: ‘Preso kayta presochaspanmi hanaq pachaman wicharipurqan. Runakunamantaqmi qokuykunata qorqan,’ nispan. (Sal. 68:18)
[9] ¿Chay wicharipusqanri imaninantataq nin? ¿Manachu hallp'a pachaq aswan ukhun kamaraq ñawpaqtaqa uraykurqan ninanta nin?
[10] Pichus uraykurqan, pay kikillantaqmi tukuy hanaq pachakunaq ancha wichaynin kamaraq, llapan imaymanakunatapas hunt'aykunanpaq wicharipurqan.
[11] Pay kikillanpunitaqmi hukkunata apostolkuna kananpaq, wakinta Diospa rantinpi rimaqkuna kananpaq, wakintataq allin willakuy willaqkuna kananpaq, wakintañataq iñiq t'aqa michiqkuna, hinallataq yachachiqkuna kanankupaq churarqan.
[12] Chay hinapin, t'aqasqakunaqa Diospa llank'ananpi llank'anankupaq k'apakchasqa kanqaku. Chay hinapitaqmi Cristoq kuerponpas wiñarinqa.
[13] Llapallanchis iñiypi ch'ullalla kayman, hinallataq Diospa Churinta reqsiyman aypananchiskaman paykunaqa serbinqaku. Hinallataq k'apak qhari kananchispaq serbinqaku. Cristoqa k'apakmi. Chaymi paykunaqa Cristoq tupusqan, sayayninpa kayninman aypananchiskama serbinqaku.
[14] Hinaqa amaña wawakuna hinachu, tukuy imaymananiraq mana allin yachachikuy wayrawan, kay niqman, haqay niqman, apaykachachikushasunchu. Amallataq runakunaq tukuy toqllanwanpas, q'otunankupaq yachaysapa kayninkuwanpas, hinallataq imaymananiraq q'otukuq yachachikuyninkunawanpas apaykachachikushasunchu.
[15] Aswanpas munakuywan cheqaq kaqta qatikuychis. Hinaspa, tukuy imapi haqay umalliq Cristoman aypananchiskama wiñasunchis.
[16] Payllapipunin llapan kuerpoqa allin hap'inasqa kashan. Hinallataq llapa moqochukunapas hukllachasqa kaspa, llank'ayninkuwan kuerpoqa k'askanasqa kashan. Chay hinapin sapanka miembroq kikinpa ruwayninman hina, kuerpoqa wiñan. Hinan kuerpoqa munakuypi, hinallataq kallpayoq kaypi wiñashan.
[17] Chay hinaqa kaytan Señorpi nini, hinallataq kamachikuni: ‘Amaña mana iñiq runakuna hinaqa puriychisñachu. Paykunaqa yanqayachisqa yuyayninkupin purinku,’ nispay.
[18] Paykunaq sonqonkuqa rumiyachisqan kashan, manataqmi imatapas yachankuchu. Chayrayku yuyayninkuqa tutayaqllapipuni kashan. Paykunaqa Diospa kawsayninmanta sinchi karunchasqan kashanku.
[19] Paykunaqa mana p'enqakuyniyoqmanmi tukupurqanku. Hinan qhelli puriypi aychankuta mana watakuspa tukuy millay huchakunaman hap'iykachikunku. Hinallataqmi mana amikuywan huchallikunku.
[20] Qankunataqmi ichaqa, mana chay hinatachu Cristomantaqa yachaqakurqankichis.
[21] Cheqaqtapunin paymantaqa uyarirqankichis. Hinallataq cheqaq kaqpas Jesuspin kashan. Chay hinatan payqa yachachirqasunkichis.
[22] Sichus chay hinata yachachirqasunkichis chayqa, ñawpaq kawsaymanta rimaspanchisqa chay mawk'a runa kayniykichista wikch'upuychis. Chay mawk'a runaqa q'otukuq mana allin munasqankunawanmi waqllisqa kashan.
[23] Qankunataq ichaqa, yuyayniykichispa espiritunta mosoqyachiychis.
[24] Hinallataq mosoq runa kaywan p'achallikuychis. Mosoq runaqa, Diospa rikch'ayninman hina, chanin kaypi, hinallataq cheqaq ch'uya kaypi, kamasqan karqan.
[25] Chay hinaqa, huk kuerpollapi miembromasintinmi kanchis. Chayrayku llullakuyta wikch'upuychis. Qelqaqa ninmi: ‘Sapanka hukniykichis runamasiykichiswan cheqaq kaqta rimaychis,’ nispa. (Zak. 8:16)
[26] Nillantaqmi: ‘Phiñakuychis, ichaqa amataq huchallikuychischu,’ nispa. (Sal. 4:4) Hinaqa phiñasqalla kashaqtiykichis, ama intipas chinkaykuchunchu.
[27] Amallataq saqramanpas kampotaqa qoychischu.
[28] Pipas suwakuqqa, amaña suwakuchunñachu. Aswanpas, kikin makinkunawanpuni allin kaqta ruwaspa, pisichikuqkunaman haywarinanpaq llank'achun.
[29] Amapunitaq ima qhelli simitapas rimaychischu. Aswanpas uyariqkunata wiñachinaykichispaq, sumaq allin simikunata rimaychis.
[30] Rantipapuy p'unchaypaqmi Diospa Santo Espiritunwan sellasqa karqankichis. Chayrayku, amapuni paytaqa llakichiychischu.
[31] Tukuy hayaq sonqo kayta, phiñakuyta, k'arak phiñakuyta, qaparkachaykunata, k'arak k'amiykunata, hinallataq llapan mana allin kaqtawan wikch'upuychis.
[32] Aswanpas hukkuna-hukkunawan qoykukuqllapuni, hinallataq yanapaykukuqllapuni kaychis. Imaynan Diospas qankunata Cristopi pampacharqasunkichis, chay hinallatataq qankunapas hukkuna-hukkunawan pampachaykunakuychis.