[1] Qankunataqmi kamachikuyta p'akisqaykichiskunapi, hinallataq huchaykichiskunapi wañusqa kasharqankichis.
[2] Chaykunapin qankunapas wak tiempopiqa, kay pachaq ruwayninkunaman hina, hinallataq wayrapi umalliqpa atiyninman hina purirqankichis. Chay wayrapi umalliqpa espiritunmi mana kasukuq runakunapipas kunan llank'ashan.
[3] Ñoqanchispas llapanchismi ñawpa tiempopiqa huchapakuq kayninchispa munasqankunapi purirqanchis. Aycha kuerponchispa munasqankunata ruwaspa, hinallataq mana allin yuyaykuykunata yuyaspan purirqanchis. Wakinkuna hina, kasqallan kaspanchistaqmi, k'arak phiñakuypa wawankuna karqanchis.
[4] Ichaqa, yanapaykukuq qhapaq Diosmi, ancha munakuq kasqanrayku munakuwarqanchis.
[5] Ñoqanchispas huchanchiskunapi wañusqa kashaqtinchismi, Cristowan kuskata kawsayta qowarqanchis. ¡Hinan qankunaqa allinpaq qokuyninwan qespichisqa karqankichis!
[6] Cristo Jesuswan kuskata kawsarichiwaspanchismi, paywan kuskallatataq hanaq pacha cheqaskunapi tiyaykuchiwarqanchis.
[7] Hamuq tiempokunapi, Cristo Jesuspi ñoqanchispaq sumaq sonqo kayninwan, may qhapaq allinpaq qokuyta reqsichinanpaqmi chaytaqa ruwarqan.
[8] Allinpaq qokuyninraykutaqmi, iñiypa chawpinta qespichisqa kankichis. Chayqa, manan qankunaqchu. Aswanpas Diospa qokuyninmi.
[9] Qespikuyqa, manan ruwaykunaraykuchu hamun. Chay hinapin, mana pipas hatunchakuyta atinqachu.
[10] Diospa ruwasqanmi kanchis. Paymi, allin ruwaykunata ruwananchispaq Cristo Jesuspi kamawarqanchis. Chay allin ruwaykunatan, Diosqa ñawpaqmantapacharaq, chaykunapi purinanchispaq wakichirqan.
[11] Chay hinaqa, qankunapas wak tiempopiqa, aychaman hina mana-judío runakunan karqankichis. Hinallataq aycha kuerpopi makiwan sirkunsidasqa nispa, sutiyasqakunan qankunata sutiyarqasunkichis. Nirqasunkichistaq: ‘Mana sirkunsidasqakuna,’ nispanku. Chaykunata yuyariychis.
[12] Chay tiempopiqa, mana Cristoyoq, hinallataq Israel llaqtayoq kaymanta karunchasqan karqankichis. Hinallataqmi promesa rimanakuykunamantapas mana reqsisqa, mana suyakuyniyoq, hinallataq kay pachapi mana Diosniyoq karqankichis. Chaykunatapas yuyarillaychistaq.
[13] Kunantaq ichaqa, Cristo Jesuspi qankunapas, wak tiempopi karunchasqa kashaspa, paypa yawarninpa chawpinta qayllaykuchisqa kapunkichis.
[14] Thak kayninchisqa paymi. Payllataqmi, aycha kuerponpi, t'aqanachiq cheqninakuy perqatapas thunispa, iskaynin llaqtakunatapas hukllaman tukuchirqan.
[15] Chay hinapin, Kamachikuy Simipi, kamachisqa kamachikuykunatapas chinkachipurqan. Hinan pay kikinpi, iskaynin t'aqa runakunamanta, ch'ulla mosoq runallataña kamarqan. Chay hinapin thak kayta ruwarqan.
[16] Kruspi wañusqanwanmi, Cristoqa iskaynin llaqtaq cheqninakuyninta p'uchukachispa, iskayninku huk kuerpollaña kapunankupaq Dioswan allipunachirqan.
[17] Hamuspantaqmi payqa, qankuna karunchasqa kashaqkunamanpas, hinallataq sispallapiña kashaqkunamanpas, thak kay allin willakuyta willarqan.
[18] Paypa chawpillantataqmi, judío runakunapas, manajudío runakunapas, ch'ulla Espiritullapi, Yayaman haykunanchispaq punkuqa kapuwanchis.
[19] Chay hinaqa, manañan wak suyumanta purikuqkunañachu kankichis. Aswanpas t'aqasqakunaq llaqtamasinkuna, hinallataq Diospa familianpi miembrokunañan kankichis.
[20] Apostolkunaq, hinallataq Diospa rantinpi rimaqkunaq teqsi churasqanku patapi hatarichisqan qankunaqa kankichis. Eskina hap'iq rumiqa kikin Jesucristopunitaqmi.
[21] Cristopitaqmi, llapan wasi hatarichisqaqa, allin hap'inachisqa Señorpi t'aqasqa cheqas kanankama wiñashan.
[22] Payllapitaqmi qankunapas, Espiritupi Diospa tiyanan wasi kanaykichispaq, kuska hatarichisqa kashankichis.