[1] Filipos llaqtapi kashaq, llapallan Jesucristopi t'aqasqa kaqkunamanmi, Cristo Jesuspa kamachinkuna, Pablopiwan, Timoteopiwan qelqamuykiku. Hinallataq chaypi kashaq iñiq t'aqata qhawaqkunamanwan, diakunokunamanwan qelqamuykiku.
[2] Dios Yayanchispa, hinallataq Señorninchis Jesucristoq allinpaq qokuyninpas, thak kayninpas qankunawanpuni kachun.
[3] Qankunamanta sapa kuti yuyarispaymi, Diosniyman grasiasta qoshallanipuni.
[4] Sapa kuti mañakuspaymi, kusisqa llapallaykichispaq mañakushallanipuni.
[5] Allin willakuy willaypipas qallarisqay p'unchaymantapachan kunankama huk sonqolla willaysiwarqankichis.
[6] Qankunapi allin ruwayta qallariqmi, Cristo Jesuspa p'unchayninkama, chay allin ruwasqanta tukupanqa. Chaytaqa allintapunin yachani.
[7] Chayraykun llapaykichismanta chay hina yuyaykuyniyqa chaninpuni. Sonqoypipunitaqmi kashankichis. Qankunaqa, llapa- llaykichismi preso kaqtiypas, allin willakuy defiendiypipas, takyachiypipas, Diospa allinpaq qokuyninpi ñoqawanpuni kasharqankichis.
[8] Jesucristoq ancha munakuyninwanpuni imaynatachus llapaykichista rikuykuytapuni munashasqaytaqa, Diosmi yachan.
[9] Kay hinataqmi, Diosman parlaspa mañakuyniyqa: Tukuy yachayniykichispi, hinallataq llapanta reqsiyniykichispi qankunaq munakuyniykichisqa aswan-aswantaraq askhayananpaqmi mañakuni.
[10] Aswan allin kaqllatapuni allinmi ninaykichispaq, Cristoq p'unchayninpi mana imamanta huchachana kanaykichispaq, hinallataq ch'uya sonqo kanaykichispaqmi mañakuni.
[11] Jesucristoq chawpinta hamuq chanin kaq ruruywan hunt'a kanaykichispaqmi mañakuni. Chay hinapi Diosqa, hatunchasqa, hinallataq yupaychasqa kananpaqmi mañakuni.
[12] Wawqe-panaykuna, ima sasachakuykunapas kawasqanqa, allin willakuy aswanta mast'arikunanpaqmi karqan. Chaytan yachanaykichista munani.
[13] Chay hinapin, llapan pretoriopi kaqkuna, hinallataq wakin runakuna ukhupipas, Cristorayku preso kasqayqa rikuchikun.
[14] Yaqapas llapallanmi wawqepanakunaqa, preso kasqaywan Señorpi kallpachasqa kanku. Chay hinapitaqmi, aswantaraq Diospa siminmanta mana manchakuspa, atispa mana atispapas rimarinku.
[15] Cheqapaq wakinkunaqa, enbidiakuspanku, hinallataq huchatarispankun Cristomantaqa willanku. Wakinñataq ichaqa, allin sonqowan willanku.
[16] Hukkunaqa, mana ch'uya sonqowanmi huchatarinankurayku Cristomantaqa willanku. Chaywantaqmi preso kayniyman, ñak'ariyta yapaykuyta yuyanku.
[17] Wakinkunataqmi ichaqa, allin willakuyta defiendinaypaq Diospa churawasqanta yachaspanku, munakuwasqankurayku willanku.
[18] Chaykunaqa, manan imananpaschu. Cheqaq willaqman tukuspa mana allin sonqowanña kaspapas, otaq cheqaqmantaña kaspapas, imaynanmantapas Cristollamantapunin willanku. Chaymi kusikuni. Ichaqa, aswantaraqmi kusikusaq.
[19] Qankunaqa, ñoqapaqmi mañakushankichis. Jesucristoq Espirituntaqmi yanapashawan. Chaymi, chay willakusqanpa chawpinta, preso kasqaymanta kacharisqa kanaytaqa yachani. Chayraykun kusikuni.
[20] Yuyaykusqayman hinapas, hinallataq suyakusqayman hinapas, manan imamantapas p'enqachisqachu kasaq. Aswanmi, lliw sonqo churayniywan, kunanpas, qhepamanpas, kawsashaqtiypas, otaq wañukapuqtiypas, Cristollapuni kuerpoypi hatunchasqa kanqa.
[21] Ñoqapaq kawsayqa Criston. Wañuytaqmi aswan allinniypaqraq kanqa.
[22] Sichus aycha kuerpoypi kawsayniyqa llank'asqay rurunanpaqraq kanqa chayqa, manan mayqentapas akllakuyta atinichu.
[23] Ichaqa, iskaynin ladomanta mat'imuwasqantan reparashani. Wañukapuspay Cristowan kuskaña kaytapas munashanin. Chaytaqmi ñoqapaqqa aswan allinraq kanman.
[24] Qankunarayku aycha kuerpoypi qhepakuyniymi ichaqa, qankunapaq aswan allinraq kashan.
[25] Allintapunin kaytaqa yachani: Qankunaqa wiñanaykichispunin, hinallataq iñiypipas kusikunaykichispunin. Chayrayku llapaykichiswan kashanaypaq, aswantaraqqa qankunawan qhepakunaytan yachani.
[26] Ñoqaqa, qankunaman huktawanmi hamusaq. Chay hinapin, qankunaq Cristo Jesuspi kusikuyniykichisqa, hamusqayrayku aswan allinraq kanqa.
[27] Cristomanta allin willakuyman hinallapuni kawsayniykichisqa kachun. Chay hinapin, qankuna qhawaq hamuqtiypas, otaq manaña hamuyta atisaqchu chaypas, qankunamantaqa allillantapuni uyariyta munani. Ch'ulla espiritullapi qaqata sayaspa kashaychis. Hinallataq iñiypa allin willakuyninrayku maqanakuyniykichispiqa kuskalla, hinallataq ch'ulla yuyayllapuni kashaychis. Chaytan uyariyta munani.
[28] Kontraykichispi hatariqkunataqa, amapuni imaynallanmantapas manchakuychischu. Chayqa, paykunaq wañuy ñak'ariyman chinkaripunankutan rikuchin. Qankunapitaqmi ichaqa, Diosmanta hamuq qespikuyniykichista rikuchin.
[29] Cristorayku iñinaykichispaqmi, Diosqa qankunaman Cristopi iñiyta qorqasunkichis. Manan paypi iñiyllatachu, aswanpas payrayku ñak'ariytawanmi qorqasunkichis.
[30] Ñoqaq ñak'ariyniykunatan rikurqankichis, hinallataq kunankamapas uyarishankichis. Chay hinallatataqmi qankunapas ñak'arishankichisña.