[1] Wawqe-panaykuna, sichus mayqenniykichispas ima huchapipas tarisqa kawaqchis chayqa, qankuna iñiypi espiritual kaqkuna, llamp'u kay espirituwan hatariykachiychis. Qantapas, chay hinallatataq Satanasqa mana wateqanasunkipaq, qan kikiykita qhawakuy.
[2] Hukkuna-hukkunaq llasa q'epiykichiskunata apaysinakuychis. Chay hinapin Cristoq kamachikuy siminta hunt'ankichis.
[3] Sichus mayqenpas, mana imapaschu kashaspa, wakinkunamanta aswan allin kayta yuyan chayqa, pay kikintan q'otukun.
[4] Chay hinaqa, sapanka huk ruwasqanta t'aqwikuchun. Hinaspan pay kikillanpi hatunchakunanpaq kanqa. Manataqmi hukpichu hatunchakunanpaq kanqa.
[5] Chay hinaqa, sapanka hukmi pay kikinpa q'epintaqa apakunqa.
[6] Allin willakuy simi yachachikuy chaskiqqa, yachachiqninman tukuy allin kaqkunapi qoykuq kachun.
[7] Ama q'otukuychischu. Diosmantaqa manan pipas asikunmanchu. Tukuy imatachus runaqa tarpunqa, chayllatataqmi kosechanqapas.
[8] Aycha kuerponpaq tarpuqqa, aycha kuerpomantan ismupuq kaqkunallata kosechanqa. Espiritupaq tarpuqtaqmi ichaqa, Espiritumanta wiñay kawsayta kosechanqa.
[9] Manachus pisipasunchis chayqa, tiemponpin kosechasunchis. Chayrayku, allin kaqta ruwaspanchisqa amapuni sayk'usunchischu.
[10] Chay hinaqa, maykamachá atisunchis, chaykama llapapaqpas allin kaqta ruwapusun. Aswantaraqqa, iñiqmasinchiskunapaq allin kaqta ruwapullasunpuni.
[11] Qhawariychis, may hatuchachaq letrakunawanmi, kikin makiywanpuni qelqamuykichis.
[12] Pikunachus aycha kaqpi allin qhawarisqa kay munaqkunan, sirkunsidasqa kanaykichispaq qatirishasunkichis. Chaytaqa Cristoq krusninrayku, mana qatiykachasqa kanallaykichispaqmi qatirishasunkichis.
[13] Hinaqa, sirkunsidasqakunapas Kamachikuy Simitaqa manan hunt'ankupunichu. Chaywanpas, qankunaq aycha kayniykichispi hatunchakunankupaqmi sirkunsidasqa kanaykichista munanku.
[14] Ñoqan ichaqa, manapuni hayk'aqpas ñoqa kikiymantaqa hatunchakusaqchu. Aswanpas Señorninchis Jesucristoq krusnillanpin ñoqaqa hatunchakusaq. Paypa chawpintan Diosqa kay pachata ñoqapaq chakatapunña. Hinallataq ñoqatapas kay pachapaq chakatapuwanña.
[15] Cristo Jesuspiqa, sirkunsidasqa kaypas, mana sirkunsidasqa kaypas manan imapaqpas balenchu. Aswanpas mosoq kamasqa kaymi baleqqa.
[16] Hayk'an kay kamachikuyman hina puriqkunapaq thak kaypas, yanapaykuypas kachun. Aswantaraqqa Diospa llaqtan Israelpaq kachun.
[17] Ñoqaqa aycha kuerpoypin Señor Jesuspa ñak'arisqan markankunata apashani. Chayrayku kunanmanta ñawpaqmanqa amaña pipas rimapayawachunchu.
[18] Wawqe-panaykuna, Señorninchis Jesucristoq allinpaq qokuynin qankunaq espirituykichiswanpuni kachun. Ahinapuni kachun.