[1] Diospa sutinpas, hinallataq yachachikuypas ama k'arakta k'amisqa kananpaq, llapallan kamachi kayman watasqakunaqa, kikinkuq patronninkuta tukuy kasukuywan allinpaq qhawarisqata hinapuni hap'ichunku.
[2] Iñiq patronniyoqkunaqa, ama iñiq kasqanhawachu patronninkuta pisipaq hap'ichunku. Aswanpas iñiq patronkunan allin sirbiyta, hinallataq munakuyta chaskiqkunaqa kanku. Chayrayku kamachikunaqa, patronninku iñiq kasqanrayku aswan allintaraq serbichunku. Chaytayá yachachiy, hinallataq kallpachay.
[3] Pipas huk niraq yachachiqqa kanmanmi. Ichaqa manataq, Señorninchis Jesucristoq allin siminkunaman hinachu yachachishanmanmi. Hinallataq mana Dios sonqo kayman hinapaschu yachachiqqa kanmanmi.
[4] Sichus chay hina kanman chayqa, hatunchakuywanmi hunt'aykukun, manataq imatapas payqa yachanchu. Aswantaraqqa mana allinkunata rimaspanmi huchatariyllata munan. Chaykunamantataqmi enbidiakuykuna, huchatariykuna, k'arak k'amiykuna, millay yuyaykuykuna ima paqarimun.
[5] Hinallataq runapura mana yuyayniyoq kaspa, yuyayninkupipas waqllisqa, yanqa huchatarinku. Hinan cheqaq kaqqa paykunapi manaña kanñachu. Hinallataq Dios sonqo kaytaqa, imatapas tarinankupaq hina hap'inku. Paykunamanta t'aqakuy.
[6] Imachus kapuwasqanchiswan kusisqa kaqtinchismi, Dios sonqo kay simiqa hatun ganansia kapuwanchis.
[7] Kay pachamanqa, manan imatapas apamurqanchischu, chay hinallataqmi kay pachamantaqa mana imatapas apayta atisunchu.
[8] Mikhunanchispaqwan, p'achakunanchispaqwan, kapushawanchis chayqa, chaykunawan kusisqa kawsasunchis.
[9] Qhapaqyayta munaqkunaqa, wateqaymanwan, toqllamanwanmi urmaykunku. Hinallataq askha mana baleq k'iriq munapakuykunamanmi urmaykunku. Chay munapakuykunaqa, wañuy ñak'ariyman, hinallataq chinkaymanmi apaykun.
[10] Llapan mana allinkunaq saphinqa, qolqe sonqo kaymi. Hinan wakinkunaqa, qolqeta maskhaspanku, iñiymanta t'aqakapurqanku. Hinallataq sinchi nanaykunawan k'irichikurqanku.
[11] Qan ichaqa Diospa runan, tukuy chaykunamanta ayqekuy. Hinaspataq chanin kayta, Dios sonqo kayta, iñiyta, munakuyta, llamp'u kayta, samp'a kayta imallapuni qatikuy.
[12] Allintapuni iñiypi maqanakuy. Makiykita haywarispa, wiñay kawsayman hap'ipakuy. Chaypaqtaqmi waqyasqapas karqanki. Hinallataq askha testigokunaq ñawpaqenpi allin sut'inchakuyta sut'inchakapurqanki.
[13] Tukuy imaymanakunaman kawsay qoq Diospa ñawpaqenpi, hinallataq Cristo Jesuspa ñawpaqenpin chaykunataqa kamachiyki. Paymi Poncio Pilatoq ñawpaqenpi sut'inchakuspa rimarirqan.
[14] Señorninchis Jesucristoq rikhurimunankama chay kamachikuyta, ama qhellichasqata, ama pisipaq hap'isqata waqaychanki.
[15] Rikhurimunan tiempopitaqmi payqa saminchasqa, sapallan munayniyoq, reykunaq Reynin, hinallataq señorkunaq Señorninpas kasqanta rikhurimuspa rikuchinqa.
[16] Pay sapallanmi mana wañuq, mana asuykuy atina k'anchaypi tiyan. Paytaqa, manan pi runapas rikurqanchu, nitaq rikuytapas atinkumanchu. Payllamanpuni hatunchaypas, tukuy wiñaypaq atiyniyoq kaypas kachun. Ahinapuni kachun.
[17] Kunan tiempopi qhapaqkunata ama umankuta hoqarinankupaq, nitaq chay mana takyaq qhapaq kaykunapi suyakuyniyoq kashanankupaq kamachiy. Aswanpas kusikunanchispaq tukuy imaymanakuna qowaqninchis Diospi suyakuyninkutaqa churachunku.
[18] Allin kaqta ruwachunku, allin kaq ruwaypi qhapaq kachunku. Kaqninkumanta qoykuy munaqllapuni, hinallataq haywarikuqllapuni kachunku.
[19] Chay hinapin, kikinkupaq allin teqsichasqa qhapaq kayta, hamuq tiempopaq huñushanku. Hinallataq, wiñay kawsaymanpas hap'ipakushanku.
[20] Yaw Timoteo, imatachus kamachisqata kasukuy. Mana baleq rimaykunamantawan, yanqa thawtiykunamantawan, hinallataq, ‘yachaysapa rimaykuna,’ nispa sutiyasqanku yanqa simikunamantapas ayqekuy.
[21] Chaykunapi kawsaspankun wakinkunaqa iñiymanta pantaykapunkuña. Allinpaq qokuyqa qanwanpuni kachun. Ahinapuni kachun.