[1] Kay simiqa hunt'aqpunin. Sichus pipas Diospa llank'anan qhawaq kayta yuyaykun chayqa, allin kaq llank'anatan yuyaykun.
[2] Chay hinaqa, Diospa llank'anan qhawaqqa, mana imamantapas huchachanan kanan. Hinallataq ch'ulla warmiq qosallan, ruwasqanpipas makilla kuidakuq, yuyaysapa, allin kaqllatapuni ruwaq, qorpachaqllapuni, yachachiytapas munaqllapunin kanan.
[3] Hinallataq mana machaq, mana saltaq sonqo, mana yanqallanmanta qolqe ganay munaq, aswanpas munakuqllapuni, mana huchatariy munaq, mana qolqe sonqo iman kanan.
[4] Hinallataq wasinpi allinta kamachikuqmi kanan. Wawankunatapas tukuy respetuyoqta, kasukuqta hap'iqmi kanan.
[5] Sichus pipas kikinpa wasinpi mana kamachikuyta atinchu chayqa, ¿imaynatataq Diospa iñiq t'aqantari kamachinman?
[6] Ama chayllaraq iñiqqa kachunchu. Hatunchakuy hunt'aykuqtinmi, saqraq huchachasqa kayninman urmaykunman.
[7] Hinallataqmi mana iñiqkunapaqpas allin kawsayniyoqmanta qhawarisqa kanan. Chay hinapin, mana pisipaq hap'isqachu kanqa, nitaq saqraq toqllanmanpas urmaykunqachu.
[8] Chay hinallataqmi, diakonopas respetanapaq hinapuni, mana iskay rimaq, mana sinchita binoman hap'ipakuq, nillataq yanqallanmanta qolqe ganay munaqkunachu kananku.
[9] Hinallataq iñiypa pakasqa yachayninta ch'uya konsiensiawan hap'iqkunan kananku.
[10] Paykunaqa, ñawpaqtaraq qhawarisqa kachunku. Chaymantataq, mana imamantapas huchachana kaspanku, diákonoq llank'ananpi llank'achunku.
[11] Chay hinallataq, warmikunapas qosankuta respetaq kachunku. Pitapas mana tumpaq, allin kaqllatapuni ruwaq, tukuy imapipas hunt'aqllapuni kananku.
[12] Diakonokunaqa, ch'ulla warmiq qosallanmi kananku. Hinallataq kikin wasinkutapas, wawankunatapas, allinta kamachiqmi kananku.
[13] Diakonokuna diákono kayninkupi allinta serbinku chayqa, paykuna kikinkupaqmi allinpaq qhawarisqa kayta tarikunku. Hinallataq, Cristo Jesuspi iñiyniyoq kasqankuta mana manchakuspa rimariytan tarinku.
[14] Usqhaylla qanman watukuq hamunayta suyakuspaymi kayta qelqamuyki.
[15] Ichaqa, sichus mana usqhaytachu hamusaq chayqa, imaynatachus Diospa wasinpi purinaykita yachanaykipaqmi qelqamuyki. Diospa wasinqa, kawsashaq Diospa iñiq t'aqanmi. Hinallataq cheqaq kaqpa tusaqninpiwan, teqsinpiwanmi.
[16] Cheqapaqmi Dios sonqo kaypa pakasqa yachayninqa may hatunpuni. Diosmi aycha kuerpopi rikuchisqa karqan. Espiritutaqmi chanin kasqanta sut'incharqan. Angelkunaq rikusqanmi karqan. Mana-judío runakunaman willasqan karqan. Kay pachantinpa kreesqanmi karqan. Hanaq pacha k'anchariypipas chaskisqallataqmi karqan.