[1] Ñawpaqtaraqqa arí mañakunapaq, Diosman parlaykunapaq, wakinpaqpas mañapunapaq, hinallataq grasiasta qonapaq llapallata balikuni. Chay hinata llapa runakunapaq ruwaychis.
[2] Hinallataq tukuy sumaq kawsaypi, thak kaypi, Diosta manchakuypi, respetanakuypi ima kawsananchispaq, reykunapaqpas, llapallan umalliqkunapaqpas, Diosman parlasun.
[3] Qespichiqninchis Diospa ñawpaqenpi chaskinanpaq hina kaqpas, hinallataq allin kaqpas chaymi.
[4] Paymi, llapa runaq qespisqa kanankuta, hinallataq cheqaq kaqta allintapuni reqsiyman chayanankuta munan.
[5] Diosqa ch'ullallan, runakunata Dioswan allipunachiqpas ch'ullallataqmi. Payqa Jesucristo runataqmi.
[6] Paymi llapan runata rantipapunanpaq pay kikinta qoykukurqan. Chaymantaqa tiemponpitaqmi willasqa karqan.
[7] Chaypaqtaqmi ñoqataqa, willakuq, hinallataq apóstol kanaypaq Diosqa churawarqan. Hinallataqmi iñiypi, cheqaq kaypi ima mana-judío runakunaq yachachiqninku kanaypaq, churawarqan. Chaytaqa, mana llullakuspaymi cheqaqtapuni Cristopi nini.
[8] Ama phiñakuspa, nitaq iskayaspa tukuy cheqaspi qharikuna ch'uya makinkuta altoman hoqarispa, Diosman parlanankutan munani.
[9] Chay hinallataq warmikunapas manchakuywan, huch'uyaykukuywan, kikinku qhawakuywan ima sumaqta p'achakuchunku. Amataq chukchankutapas k'achancharachikuspachu, nitaq qoriwanpas, nitaq perlawanpas, nitaq ancha balorniyoq p'achakunawanpas p'achakuspachu kashachunku.
[10] Aswanpas allin kaq ruwaykunawan Diosta manchakuq warmikuna kasqankuta willakuq hinapuni p'achakuchunku.
[11] Warmiqa, tukuy kasukuywan upallaspalla yachaqakuchun.
[12] Adanmi ñawpaqtaqa kamasqa karqan, chaymantañan Evaqa kallarqantaq.
[13] Chayraykun warmi ama qharita yachachinanta, nitaq kamachinantapas munanichu. Aswanpas upallaspalla kanankutan munani.
[14] Manataqmi Adanchu q'otusqaqa karqan, aswanpas warmin q'otusqa kaspa kamachikuytaqa p'akirqan.
[15] Chaywanpas ichaqa, sichus paykuna iñiypi, munakuypi, ch'uya kaypi, kikinta qhawakuypi takyanqaku chayqa, wawata wachakusqanwanmi qespisqa kanqa.