[1] Kurak wawqetaqa, aman phiñarikunkichu. Aswanpas huk taytata hina kallpachaykuy. Hinallataq waynakunatapas wawqekunata hinapuni kallpachaykullaytaq.
[2] Kurak panakunatapas, mamakunata hinapuni kallpachaykuy. Hinallataq sipaskunatapas, panakunata hinapuni tukuy ch'uya kaywan kallpachaykuy.
[3] Cheqaqmantapuni biuda warmikunata allinpaq qhawariy.
[4] Ichaqa, sichus mayqen biudaqpas wawankuna kan, otaq hawayninkuna kan chayqa, ñawpaqtaqa familian kaqkunaraq khuyapayakuq kayta yachachunku. Hinallataq tayta-mamankumanpas, machulankumanpas kutichipuyta yachachunku. Chaymi Diospa ñawpaqenpi allin kaq, hinallataq paypa chaskinanpaq hina kaqqa.
[5] Cheqaqmantapuni mana piñiyoq biudataqmi ichaqa, Diospi suyakuyninta churan. Payqa, mañakuyllapipuni, hinallataq Diosman parlayllapipunin tuta-p'unchay kashan.
[6] Kay pachapi q'ochukuykunaman kawsayninta hap'iykachikuqmi ichaqa, kawsashaspapas wañusqa kashan.
[7] Mana imamantapas huchachana kanankupaq, chay imaymanakunata kamachiy.
[8] Ichaqa, sichus pipas familianpaq, aswantaraqqa kikinpa wasinpaq pisisqanta mana churanchu chayqa, iñiytan mananchan. Hinaspapas mana iñiqmanta aswan mana iñiyniyoqraqmi kanpas.
[9] Biudakuna qelqasqa listapiqa, pichus ch'ulla qosaq esposallan karqan, hinallataq soqta chunka watayoqmanta wichayman kaq biudalla churasqa kachun.
[10] Hinallataq allin ruwayniyoqmanta reqsisqan kanan. Sichus pay wawankunata uywarqan, sichus karu llaqtayoqkunata qorpachaqllapuni karqan, sichus t'aqasqa kaqkunaq chakinta mayllirqan, sichus llakisqakunaman watuykukuq rirqan, hinallataq sichus tukuy allin ruwaykunallapipuni kasharqan chayqa, payllan listapi churasqaqa kanan.
[11] Sipas biudakunataqa, ama listaman churaychu. Paykunaqa, aycha kuerponkuq munasqanwan aysachikuspankun, Cristomanta t'aqakuspa kasarakuyta munankuman.
[12] Hinaspapas ñawpaq kaq iñiyninkuta wikch'upusqankuraykun huchachasqa kankuman.
[13] Hinallataq wasin-wasinta purispankun, qella kayta yachanku. Manataqmi qella kayllatachu, aswanpas simi apa kayta, imamanpas challpuykukuq kaytawanmi yachanku. Hinan mana rimana kaqkunata rimanku.
[14] Sipas kaqkunaqa, kasarakunankuta, wawayoq kanankuta, wasinkupi allinta qhawanankuta, hinallataq cheqnikuqkuna mana imaynanmantapas pisichashanankutan munani.
[15] Wakinkunaqa, ñan Satanaspa qhepanta chinkaripunkuña.
[16] Sichus huk iñiqpa qhariña, otaq warmiña kaspapas biudan kan chayqa, yanapaykuchun. Hinan iñiq t'aqata manaña gastachinqachu. Chay hinapitaqmi wakin cheqaqmantapuni biuda kaqkunata yanapaykunqa.
[17] Allin llank'aq umalliq wawqekunaqa, iskay kuti kamaraq allinpaq qhawarisqapuni kachunku. Aswantaraqqa, mana sayk'uspa Diospa siminpi llank'aqkuna, hinallataq yachachiqkunan chay hina qhawarisqaqa kananku.
[18] Qelqapas ninmi: ‘Era saruq torotaqa, aman senq'apankichu,’ nispa. (Deut. 25:4) Qelqaqa nillantaqmi: ‘Llank'apakuqqa, pagonta chaskinanpunin,’ nispa. (Mat. 10:10 Luk. 10:7)
[19] Aman ima tumpaytapas, huk umalliq wawqeq kontranpiqa chaskinkichu. Maypachachus iskay, otaq kinsa testigokunawan hamullaqtinmi chaskinki.
[20] Huchallikuspallapuni kashaqkunataqa, wakinkunapas manchakunankupaq, llapaq ñawpaqenpi phiñarikuy.
[21] Diospa ñawpaqenpi, Señor Jesucristoq ñawpaqenpi, hinallataq akllasqa angelkunaq ñawpaqenpiwanmi balikuyki. Ama manaraq tiemponpi chanincharuspachu, nitaq pimanpas sayapakuspachu, chay kamachikuykunataqa kasukunki.
[22] Aman piqpa patanmanpas makiykita usqhayllamanqa churaykunkichu. Nitaq wakin runakunaq hucha ruwasqankutapas ruwaysikunkichu. Aswanpas ch'uyallapuni waqaychakuy.
[23] Wiksa nanayniykihawa, hinallataq onqosqalla tarikusqaykihawa, amaña unutaqa ukyayñachu, aswanpas huk chikan binochata millp'uykuy.
[24] Wakin runakunaq huchankuqa, manaraq chaninchasqa kashaqtinmi yachakunña. Wakinpataqmi ichaqa, qhepamanña yachakun.
[25] Chay hinallataqmi allin kaq ruwaykunaqa, ñawpaqmantapacharaq yachakunña. Hinallataq mana allin kaq ruwaykunapas manapuni pakasqalla kaytaqa atinmanchu.