[1] Espiritutaqmi ichaqa, sut'itapuni qhepa tiempokunaman iñiymanta wakinkuna t'aqakunankuta willakun. Q'otukuq espiritukunata uyarispanku, hinallataq supaykunaq yachachikuyninta uyarispankun, iñiymanta t'aqakunqaku.
[2] Iskay-uya kaywanmi, konsiensianku sansashaq fierrowan ruphachisqa hina kaspanku, llullakuyta rimanku.
[3] Mana kasarakunankupaqmi kamachikunqaku. Hinallataq cheqaq kaqta reqsiqkunatapas, hayk'an iñiqkunatapas, Diospa kamasqan mikhunamanta grasiasta qospa mikhunankupaq kaqta, ama mikhunankupaqmi, kamachikunqaku.
[4] Diospa llapallan kamasqanqa allinpunin. Maypachachus grasiasta qospa chaskikusqaqa, manan imapas wikch'upunapaq hinaqa kanchu.
[5] Chaykunaqa, Diospa siminwan, hinallataq Diosman parlaywanmi ch'uyanchasqa kapun.
[6] Sichus chaykunamanta wawqe-pananchiskunaman yachachinki chayqa, Jesucristoq allin kamachinmi kanki. Hinan, iñiymanta simikunapi, hinallataq allin yuyaywan qatikusqayki allin kaq yachachikuypipas allin-allin wakichisqa kanki.
[7] Diospaq t'aqasqa kaq pisichaq thawtiykunata, hinallataq ñawpa payakunaq kuentonkunatapas wikch'upuy. Hinaspa qan kikiyki Dios sonqo kaywan p'achallikuy.
[8] Aycha kuerpopi ejersisioqa, pisillatan yanapawanchis. Dios sonqo kaywan p'achallikuymi ichaqa, llapanpipas yanapawanchispuni. Kunan kawsaypaqpas, usqhaylla hamuq kawsaypaqpas, promesayoqtaqmi kanpas.
[9] Kay simiqa hunt'aqmi. Hinallataq llapa runakunaq chaskinanpaq hinapunitaqmi kanpas.
[10] Kawsashaq Diospin suyakushanchis. Llapa runaq qespichiqnin, aswantaraqqa iñiqkunaq qespichiqninqa paymi. Chayraykun chaypaqpuni llank'anchis, hinallataq imaymanapipas runakunaqa pisipaq hap'iwanchis.
[11] Kaykunata kamachiy, hinallataq yachachiypas.
[12] Wayna kayniykitaqa, ama pipas pisichachunchu. Aswanpas iñiqkunapaq rimakuypipas, puriypipas, munakuypipas, espiritupipas, iñiypipas, hinallataq ch'uya kaypipas yachaqakunankupaq hinapuni kay.
[13] Hamunaykama, Qelqa ñawinchaypi, kallpachaykuypi, hinallataq yachachiypipuni kashay.
[14] Diospa ruwana qokuynin qanpi kashaqtaqa, amapuni qonqaruychu. Chaytaqa, umalliq wawqekunan, profesiakunaq chawpinta makinkuta qan pataman churaykuspa qorqasunkiku.
[15] Chaykunallapipuni yuyaymanaspa kashay. Chay hinapi, qanpa purisqaykipas, hinallataq iñiypi wiñasqaykipas, llapa runaq rikusqan kananpaq, chaykunata ruwaspallapuni kashay.
[16] Qan kikiykitapas, yachachikuytapas allintapuni qhaway. Chaykunallapipunitaq kashaypas. Sichus chayta ruwanki chayqa, qan kikiykitan qespichikunki, hinallataq uyariqniykikunatapas qespichillankitaqmi.